**D paas d koe-moonegã minim: D kãab nebã Biiblã yetame sebrã**

Saglgã yõodo: Biiblã yetame sebrã yaa d pipi tʋʋm-teoog d sẽn tar n zãmsd nebã Biiblã. La nand tɩ d tall-a n zãms ned Biiblã, d segd n deng n kõ a soab sebrã. Rẽ n so tɩ tõnd ned kam fãa segd n modg n kãabd nebã Biiblã yetame sebrã sõma koe-moonegã sasa. (Yel. 22:29) Sagls toor-toor n be d sẽn tõe n tik n kãab ned sebrã, tɩ koe-moond fãa segd n yãk sẽn yaa sõma ne-a n yɩɩda.

Ad y sẽn tõe n maan dẽ to-to:

Sok-y kɛlgdã sokr y sẽn mi tɩ y tõe n kell n tika sebrã sak zug n leoke. Y tõeeme meng n ges sogsg nins sẽn be sak fãa sɩngrẽ wã, n yãk sokre. Kɛlgdã sã n leok sokrã, bɩ y karem vɛrse sẽn zemse, la y wilg-a sebrã sull ning sẽn leokd sokrã, tɩ sã n tõe bɩ y sõs rẽ zug koɛɛg-koɛɛga.
Y leb n tõe n tika sebrã sɩngr-goamã, n sok kɛlgd sokre, la y wilg-a sebrã sak ning sẽn leokd sokrã. Wala makre, y tõe n goma bũmb sẽn nan maan tɩ b gomd a yell zʋrnallẽ, la y wilg tɩ neb wʋsg tʋll n bãnga sogsg nins sẽn be seb-neng a 3 wã leoore. Y tõeeme me n yeel kɛlgdã tɩ y kaagda nebã n taasd-b koe-noog beoog-daarã wɛɛngẽ. Rẽ poore, bɩ y wilg imaaz-rãmbã sẽn be neng a 4-5 wã, la y sok-a woto: “Bũmb nins b sẽn kãab ka wã sʋka, bʋg la yãmb dat tɩ pidsi?” Y tõe n yeela kɛlgdã me tɩ y sõngda nebã tɩ b paamd sogsg nins sẽn pak nebã leoore. Rẽ poore, bɩ y wilg-a sogsg nins sẽn be neng a 6, la y kos-a t’a yãk a sẽn date.
Tall-y sebrã n sɩng Biibl zãmsgo. Y tõe n yeela woto: “Tõnd kãabda nebã seb-kãngã d sẽn tar n zãmsd nebã Biiblã. Yãmb zoe n yã-a lame bɩ? [Bas-y t’a leoke.] Y sã n tara Biible, y tõe n kõ-m-la minit a wãn tɩ m wilg-y y sẽn tõe n tall sebrã n zãms Biiblã to-to.”

Mak-y woto ki-kãngã:

Y zak pʋgẽ Biibl zãmsgã sasa, bɩ y mak y sẽn tõe n kãab ned sebrã to-to.
Koe-moonegã sasa, bɩ y wilgd y tũud-n-taasã yãmb sẽn magd n na n yeel bũmb ning n yaool n kãab ned sebrã. (Yel. 27:17) Y sẽn kãabd nebã sebrã to-to wã sã n pa womd biis bɩ y toeeme.