D sẽn tõe n maan to-to n sɩng Biiblã zãmsg ne neb nins sẽn deeg zʋrno rãmbã
1. D kãabda nebã zʋrno rãmbã n dat n wa tõog n maan bõe?
1 Sibr fãa d nong n kãabda nebã Gũusg Gasgã la Réveillez-vous ! wã koɛɛgã mooneg sasa. La woto yaa pipi bũmb d sẽn maand n wa tõog n zãms pʋ-peelem dãmbã tɩ b bãng sɩdã. Sagls nins sẽn pʋgdã tõe n sõng-d lame tɩ d bãng d sẽn tõe n tũnug ne Biiblã yetame sebrã to-to n sɩng Biibl zãmsg ne neb nins d sẽn lebgd n tʋgd n getẽ wã. Y tõe n maneg-b lame tɩ zems ne y koɛɛgã mooneg zĩigẽ nebã, la y lebg n dɩk-b ne y meng goama. Y tõe n tũnuga ne sagls a taab me yãmb sẽn tagsd tɩ yaa sõma.
2. Wãn to la d tõe n tũnug ne Biiblã yetame sebrã neng a 4-6 n sɩng Biiblã zãmsg ne neda?
2 Tũnug-y ne seb-neng a 4-6: Y sã n wa lebg n na n tɩ sõs ne neda, y tõe n yeela woto: “Zʋrno nins mam sẽn da kõ yãmbã gomda Biiblã yelle. Ges-y bũmb ning sẽn kɩt tɩ Biiblã kareng tar yõod wʋsgo.” Karm-y Ezai 48:17, 18; Zã 17:3 bɩ verse a to sẽn wilgd tɩ Biiblã kareng tara yõodo. Wilg-y-yã Biiblã yetame sebrã la y kõ-a. Rẽ poore y tõe n yeela goam nins sẽn pʋgdã:
◼ “Biiblã kõt-d-la saagr hakɩk beoog daar yĩnga.” Wilg-y y kɛlgdã seb-neng a 4-5 wã la y sok-a woto: “Bũmb nins b sẽn kãab ka wã sʋka, bʋg la yãmb rat tɩ pidsi?” Wilg-y-yã sak ning sẽn gomd bũmb ning a sẽn yãkã yelle, la a sã n sak bɩ y sõs ne-a koɛɛg-koɛɛg sull a yembr bɩ a yiib zugu.
◼ Wall y tõe n yeela woto: “Biiblã leokda sogsg sẽn tar yõod wʋsgo.” Wilg-y-yã seb-neng a 6 la y sok woto: Rẽ yĩngã yãmb zoe n soka y meng sogsg nins sẽn be seb-neng kãngã tẽngrã bɩ? Lak-y sebrã zĩig ning y sẽn tõe n paam sokrã leoor n sõs ne-a koɛɛg-koɛɛg sull a yembr bɩ a yiib zugu.
◼ Wall y tõe n wilg-a-la sagsã zĩiga, la y sok-a n ges sak bʋg n noom-a. Rẽ poor bɩ y lak sak kãng zĩigẽ n wilg-a koɛɛg-koɛɛg y sẽn zãmsd nebã Biiblã to-to.
3. Wãn to la d tõe n sɩng Biibl zãmsg ne ned sẽn deeg zʋrno rãmb sẽn gomd: a) Yɛlã sẽn tar kengr dũniyã zugã yelle? b) Zak pʋg vɩɩm yelle? d) D sẽn tõe n tall bas-yard ne Biiblã yelle?
3 Pipi sõsgã baasgẽ bɩ y sok sokre: Bũmb a to sẽn tõe n sõng-y yaa y sẽn na n sok kɛlgdã sokr pipi sõsgã baasgẽ, sẽn na yɩl n tõog n wa leok nindaare. Kɛlgdã sã n sak zʋrno rãmba, bɩ y sok-a sokr la y wilg-a tɩ y na n wa leoka nindaare. Modg-y n zems-y ne kɛlgdã n yãk wakat takɩ y sẽn na n seg taaba, la y modg n lebg n kẽng la y ra vaal ye. (Mat. 5:37) Yãmb sã n lebg n kẽnge, bɩ y tẽeg y kɛlgdã sokrã la y lak Biiblã yetame sebrã zĩig ning sẽn leokd sokrã n sõs ne-a koɛɛg-koɛɛg sull a ye bɩ a yiib zugu. Kõ-y-yã sebr tɩ yẽ me tõog n tũ sõsgã. Ad makr a wãna:
◼ Zʋrnall ning kɛlgdã sẽn deegã sã n gomd yɛlã sẽn tar kengr dũniyã zugã yelle, nand tɩ y looge y tõe n yeela woto: “Toeeng bʋg la Wẽnnaam na n wa ne tẽngã zugu? Nindaare, d na n yãa Biiblã sẽn leokd sok-kãngã to-to.” Y sã n wa lebg n tɩ ges y kɛlgdã bɩ y wilg-a seb-neng a 4-5 wã. Y tõeeme me n sok woto: “Yel-beedã sẽn be wã yaa Wẽnnaam n dat woto bɩ?” Y sã n wa lebg n tɩ ges y kelgdã, bɩ y wilg-a sull a 7-8 pipi sakã pʋgẽ.
◼ Zʋrnall ning kɛlgdã sẽn deegã sã n gomda zak pʋg vɩɩm yelle, nand tɩ y looge y tõe n soka y kɛlgdã woto: “Bõe la zakã ned kam fãa tõe n maan tɩ b zakã vɩɩm yɩ noog n yɩɩda?” Y sã n wa lebg n tɩ ges a soabã bɩ y sõs sull a 4 sẽn be sak 14 pʋgẽ wã zugu.
◼ Zʋrnall ning kɛlgdã sẽn deegã sã n wilgdame tɩ ned tõe n talla bas-yard ne Biiblã, nand tɩ y looge y tõe n sok-a-la woto: “Biiblã sã n wa gomd siãnsã yelle, rẽ yĩngã a sẽn yetã zemsame bɩ?” Y sã n wa lebg n tɩ ges-a, bɩ y sõs sull a 8 sẽn be sak a 2 pʋgẽ wã zugu.
4. Ned ning sẽn deega zʋrno rãmbã sã n pa sak Biiblã yetame sebrã, bõe la d tõe n maane?
4 Sõsg fãa baasgẽ bɩ y sok sokr y sẽn na n wa leok nindaare. Y sã n wa tõog n zãmsd Biiblã ne-a wakat fãa, bɩ y sɩng ne sebrã pipi sakã n tɩ tãag a baasg sakã. La kɛlgdã sã n pa sak Biiblã yetame sebrã, bõe la y tõe n maane? Y tõe n ket n kẽnd n kõt-a-la zʋrno rãmbã la y sõsd ne-a Biiblã zugu. Y sã n ket n modg n maand woto, a tõe n wa saka Biiblã zãmsgo.
5. D sã n wa kãab zʋrno rãmbã, bõe me la d segd n modg n maane?
5 Gũusg Gasgã la Réveillez-vous ! wã tõe n kɩtame tɩ ned rat n bãng Biiblã sẽn sɩd yet bũmb ningã. Woto yĩngã, bɩ d modgd n sɩngd Biiblã zãmsg ne neb nins sẽn sak n deeg zʋrno rãmbã. D sã n maand woto, d tũuda a Zezi sẽn yet tɩ d ‘maan karen-biis la d zãms-bã.’—Mat. 28:19, 20.