D sɩng Biiblã zãmsg ne sẽn deegd-b periodik-rãmbã
1. Bõe yĩng t’a Zeova siglgã sɩng n sagend tõnd tɩ d mao n paam neb n kẽnd n kõt periodik-rãmbã?
1 Neb wʋsg nonga tõnd sɛbã kareng la b pa rat n sak tɩ d zãms-b Biiblã ye. Rẽ n so tɩ hal daar zãra, a Zeova siglgã sagend koe-moondbã tɩ b modg n paam neb b sẽn na n kẽnd n kõt periodik-rãmbã kiuug fãa. B sã n paamd d sɛbã n karemdẽ, tõe n kɩtame tɩ b wa nong Wẽnnaam Gomdã. (1 Pɩɛ. 2:2) Sẽn paase, bũmb b sẽn karem tõe n yɩɩ sabab tɩ b sak tɩ d zãms-b Biiblã.
2. Wãn to la d tõe n wilg tɩ d rata sẽn deegd-b periodik-rãmbã neere?
2 D zãgs d sẽn bʋdã koom: Y sã n paam ned n kẽnd n kõt-a periodik-rãmbã, yɩta sõma tɩ y mi n bao n sɩng sõsga, la y yõg zood ne-a. Rẽ na n sõng-y lame tɩ y bãng bũmb ning sẽn pak-a, a sẽn tẽede, la sõng-y me tɩ y tõog n gom tɩ kẽ-a. (Yel. 16:23) Segend-y y mens sõma kaagr fãa yĩnga. Sã n tõe bɩ y gom bũmb takɩ sẽn be periodik-rãmbã pʋgẽ yelle, la rẽ sẽn tik vɛrse ninga. Woto, na n yɩɩ wa y zãgsda bũmb ning y sẽn bʋd a sũurẽ wã koom. (1 Kor. 3:6) Gʋlsd-y kaagr fãa daare, periodik ning y sẽn kõ, y sẽn gom bũmb ning yelle, la vɛrse nins y sẽn wɛgse.
3. Naoor a wãn la d segd n tɩ kaag ned sẽn deegd periodik-rãmbã?
3 Naoor a wãn la d segd n tɩ kaag-ba? Kiuug fãa, y segd n kẽnd n kõt-b-la periodik-rãmbã. La y sã n tõe, wall sẽn deegd-a periodik-rãmbã sã n data, bɩ y kaag-a naoor a wãn kiuug fãa. Makre, y sã n tɩ kõ-a periodik-rãmbã, semen a ye bɩ a yiib poore, y tõe n tɩ kaag-a lame, n yeel-a woto: “M pɩʋʋg n na n wilg-y-la bũmb sẽn be periodik nins m sẽn kõ-yã pʋgẽ.” Woto tõe n kɩtame t’a tʋlg n karem sõsg ning yell y sẽn gomã. La sã n mik t’a zoe n karmã bũmb ning y sẽn wilg-a wã, y tõe n sok-a-la sã n yɩ-a-la noogo, la y sõs rẽ zug bilfu. A sã n nonga tõnd sɛbã karengo, y sã n tɩ kaag-a, bɩ y wilg-a sebr ning d sẽn kõt nebã kiuugã pʋgẽ wã.
4. Bõe la y tõe n maan n bãng ned sẽn deegd periodik-rãmbã sã n datame tɩ y zãms-a Biiblã?
4 Ra n gũ-y tɩ sẽn deegd-a periodik-rãmbã kos Biibl zãmsg tɩ y yaool n sɩng ye. Kãab-y-yã zãmsgã. Baa a sã n da zoe n zãgsa Biiblã zãmsgo, bɩ y mi n wilg-a “Sogsg Biiblã sẽn leokde,” sẽn yaa sõsg sẽn be Gũusg Gasgã pʋgẽ wã. Rẽ tõe n kɩtame t’a wa tʋlg n sõs ne-do. Tõe meng t’a sak tɩ y sɩng Biiblã zãmsgo. La baa a sã n pa sak n na n zãms Biiblã, y tõe n ket n kẽnd n kõt-a-la periodik-rãmbã, n sõng-a t’a bãng Biiblã n paase.