D paas d koe-moonegã minim: D sõng sẽn nong n deegd-b periodik-rãmbã

Saglgã yõodo: Neb wʋsg nonga tõnd sɛbã kareng la b pa rat n sak tɩ d zãms-b Biiblã ye. Tõe tɩ b nonga b tũudmã, wall b tagsdame tɩ b pa tar sẽk n na n zãms Biiblã ye. La b sẽn paamd tõnd sɛbã n karemdẽ wã, b tõe n wa nonga Wẽnnaam Gomdã. (1 Pɩɛ. 2:2) Wala makre, periodik ning sõsg tõe n kẽ-b lame, pa rẽ bɩ b yɛlã tõe n wa toeemame tɩ b sak tɩ d zãms-b Biiblã. D sã n kẽnd n kaagd-ba, na n gãnega b yam, la sõng-d me tɩ d bãng bũmb ning sẽn pak-ba. Woto, tõe tɩ d wa paam n sɩng Biiblã zãmsg ne-ba.

Ad y sẽn tõe n maan dẽ to-to:

Modg-y tɩ neb nins sẽn nong n karemd Gũusg Gasgã la Réveillez-vous ! wã paamd-b kiuug fãa. Kiuugã pʋgẽ, y tõe n baoa daar n kẽng n tɩ sõng-b tɩ b wʋm bũmb b sẽn karem periodik ning pʋgẽ võore, wall y zã sebr ning d sẽn kãabd nebã kiuugã pʋgẽ wã n tɩ kõ-ba. Gʋlsd-y kaagr fãa daare, periodik ning y sẽn kõ, y sẽn gom bũmb ning yelle, la vɛrse nins y sẽn wɛgse.—Ges-y yʋʋmd 2014 yʋʋm-vẽkr kiuugã Rĩungã Tʋʋmd sebr neng a 3 wã.
Segl-y y meng kaagr fãa yĩnga. Y pa segd n kẽnd n kõt a soabã sɛbã bal ye. Y tog n sõsda ne-a, la y mao n bao a zoodo. Rẽ na n kɩtame tɩ y tõog n sõng-a t’a bãng Biiblã n paase.
Bao-y n sɩng-y Biiblã zãmsg ne-a. Ned sẽn nong n deegd periodik-rãmbã sã n sok-y sokr n dat n bãng Biiblã sẽn yete, bɩ y zã sebr sẽn leokd sokrã n kẽng tɩ y sõse. Sõsgã poor bɩ y sok-a sokr y sẽn na n wa leok nindaare. Y sã n nong n tikd Biiblã, pa rẽ bɩ sebr d sẽn tar n zãmsd Biiblã n sõsd ne neda, baa yaa koɛɛg-koɛɛga, yaa Biibl zãmsgo. Yãmb zoe n kõ y kɛlgdã Koe-noog sebrã, n wilg-a d sẽn zãmsd neb Biiblã to-to bɩ? Y zoe n wilg-a-la Bõe yĩng tɩ y tog n zãms Biiblã? video wã, pa rẽ bɩ Wãn to la d zãmsd ned Biiblã? video wã bɩ? Baa a soabã sã n da pa sak n na n zãms Biiblã, a yɛlã tõe n wa toeemame. Woto yĩnga, leb-y n kãab-y-yã-a Biiblã zãmsgo.

Mak-y woto ki-kãngã:

Gʋls-y neb nins y sẽn dat n kẽnd n kõt periodik-rãmbã yʋya. Modg-y tɩ b paam periodik nins sẽn nan yi wã, la y wilg-b tɩ b sã n data, y na n wat n kõt-b-la kiuug fãa.