**D paas d koe-moonegã minim: D wilg kɛlgdã tõnd sẽn tar Biiblã yetame sebrã n zãmsd nebã Biiblã to-to**

Saglgã yõodo: D sã n mi n yet nebã tɩ d kãabd-b-la Biiblã zãmsg zaalem, wʋsg tõeeme n pa wʋmd a võor ye. B tõe n tẽedame tɩ d ratame tɩ b wa naag neb sull n zãms Biiblã, pa rẽ bɩ b tagsdẽ tɩ d na n gʋlsd-b-la lɛta n zãmsd-ba. Woto yĩnga, wall tɩ d yet nebã tɩ d kãabd-b-la Biiblã zãmsgã, yɩta sõma tɩ d wilgd-b tõnd sẽn maand rẽ to-to wã. Baa yaa zak noore, d tõe n wilga d sẽn zãmsd nebã to-to wã minit a wãn pʋgẽ, tɩ tall yamleoogo.

Ad d sẽn tõe n maan dẽ to-to:

Y sã n wilg kɛlgdã y waoongã võor n sa, bɩ y sok-a n ges a sã n tʋll n bãnga vɩɩmã sẽn na n yɩ to-to beoog-daare.
Yeel-y-yã-a tɩ neb wʋsg me rat n bãnga vɩɩmã sẽn na n yɩ to-to wã, la y lak Biiblã sɩd yetame sebrã sagsã zĩig n wilg-a. Wilg-y-yã-a tɩ sebrã sõssã võor wʋmb pa toogo, la tɩ b tõe n sõng-a lame t’a bãng Biiblã sẽn yet beoog-daarã la bũmb a taab wɛɛngẽ. Rẽ poor bɩ y kos-a t’a yãk gom-zug ning sẽn noom-a tɩ y sõse.
Kõ-y-yã-a sebr a yembre, la y wilg-a sak ning a sẽn yãkã sẽn beẽ. Yeel-y-yã-a tɩ sogsgã sẽn be sõsgã sɩngrẽ wã leoor bee sulã pʋsẽ.
A sã n tõe bɩ y kos-a t’a karem pipi sullã, la y sok sokrã tɩ y naag taab n bao leoorã. Rẽ poor bɩ y karem leoorã sẽn tik vɛrse ninsã tɩ y sõse, la y wilg-a leoorã yãmb sẽn dẽeg y sebrã pʋgẽ wã.
Karm-y sull ning sẽn pʋgdã, la so-kãngã bɩ y kos kɛlgdã t’a leok ne a meng goama.
Pẽg-y-yã-a, la y rɩk sɛk n lebg n wa kẽng taoor ne sõsgã.
Sã n tõe bɩ y wilg-a video ning sẽn be tõnd sɩtã pʋgẽ t’a gom-zugã yaa: Wãn to la d zãmsd ned Biiblã?

Mak-y woto ki-kãngã:

Pʋʋs-y-yã a Zeova n kos t’a sõng-y tɩ y paam ned n sɩng Biiblã zãmsgo.—Fil. 2:13.
Koe-moonegã sasa, mao-y tɩ baa yaa vugr bɩ y sõng kɛlgdbã tɩ b bãng d sẽn tar Biiblã yetame sebrã n zãmsd nebã Biiblã to-to, pa rẽ bɩ y wilg-b Wãn to la d zãmsd ned Biiblã? video wã.