Sõs-paal sẽn na n sõng tõnd tɩ d sɩng Biibl zãmsg ne nebã
1. Sõs-paal bʋg la b na n ningd Gũusg Gasgã pʋgẽ, la yaa bõe yĩnga?
1 Yʋʋm-vẽkr kiuugã tɛka, Gũusg Gasgã ne farendã d sẽn kãabd nebã pʋgẽ, sõs-paal la b na n yiisdẽ, tɩ na n sõng tõnd tɩ d sɩng Biiblã zãmsg ne nebã. A gom-zugã la woto: “Wẽnnaam Gomdã sẽn yete.” Baa ne neb kẽer sẽn na n dat n karem rẽ b toorã, b ninga sõs-kãensã n dat tɩ d sõs b zug ne nebã.
2. Sõsgã yaa wãn-wãna?
2 Sõsgã sẽn yaa to-to: Gom-zugã la gom-zu-biyã fãa yaa sogsgo, d sẽn tõe n sok d kɛlgdbã. B ninga vɛrse rãmb a pʋgẽ, tɩ d tõe n lak Biiblã n wilg ned t’a yã a toore. Sulã yaa koeese, tɩ d tõe n kell n yals yĩngr n sõs b zug ne neda. Sõsg fãa gomda Biiblã yetame sebrã yelle, tɩ na n sõng-d tɩ d wa kell n zãms-a Biiblã ne seb-kãngã.
3. D sã n wa moond zak-zaka, wãn to la d tõe n tall sõs-kãngã n sɩng Biiblã zãmsg ne ned zĩig pʋgẽ?
3 D sẽn tõe n tall-a n tʋm to-to: Y sã n wa kãabd nebã periodik rãmbã, y tõe n sok-b-la sokr bũmb ning yell sõsgã sẽn gomdã zugu. Wala makre, yʋʋm-vẽkr pipi daar Gũusg Gasgã gomda Biiblã yõod yelle. Y tõe n soka y kɛlgdã woto: “Yãmb tagsdame tɩ Biiblã yaa Wẽnnaam Gomd bɩ, bɩ yaa sebr wa sɛb a taabã bala? [Bas-y t’a leoke.] Mam nongẽ lame n wilg yãmb bũmb rẽ wɛɛngẽ.” Karm-y pipi sokrã, n karem pipi sullã, la y lak Biiblã n karem vɛrse wã. Lebs-y n karem sokrã la y bas t’a leoke. Y sã n ges tɩ y tõe n sõsa sull a ye bɩ a yiib zug n paase, bɩ y kell n maan woto. Nand tɩ y looge, wilg-y-yã-a sokr ning sẽn pʋgdã, la y rɩk sɛk ne-a n lebg n wa sõs ne-a rẽ zugu. Lebgd-y n kẽnd semen fãa n sõsd ne-a hal n tãag Gũusg Gasg a to sẽn na n wa. Y sã n dat me y tõe n kãaba a soabã Biibl zãmsg y pipi sõsgã sasa. A sã n sak bɩ y tũnug ne sebrã pʋgẽ sõsgã n wilg-a Biibl zãmsg sẽn maand to-to.
4. D sã n lebg n na n tɩ ges neda, wãn to la d tõe n tall sõs-kãngã n sõng-a?
4 Y leb n tõe n talla sõs-kãngã n sõng neb nins y sẽn kẽnd n kõt periodik rãmbã, la ned ning fãa y sẽn lebg n tɩ gese. Y tõe n yeela woto: “Sõs-paal la b ning Gũusg Gasgã pʋgẽ. Mam nongẽ lame n wilg yãmb a sẽn tõe n sõng-y to-to.” Wẽnd na kɩt tɩ sõs-kãngã sõng neb wʋsg tɩ b bãng Biiblã sẽn sɩd yet bũmb ningã.—1 Tɩm. 2:4.