Tʋʋmd sẽn kõt sũ-noog wʋsgo
1. Tʋʋm-bʋg la d tʋmd n sõngd nebã rũndã-rũndã?
1 Pipi kiris-nebã wakatẽ, nebã sẽn yã a Zezi sẽn sõng bãad dãmb tɩ b paam laafɩ wã, b sũy yɩɩ noog wʋsgo. (Luk 5:24-26) Rũndã-rũndã, tõnd me sũy yaa noogo, d sẽn paam n sõngd nebã tɩ b bãngd a Zeova wã. (Wil. 22:1, 2, 17) D sã n karem kibar sẽn wilgd a Zeova Gomdã la a vʋʋsem sõngã sẽn sõng neb tɩ b toeem b vɩɩmã, noogda d sũy wʋsgo. La sẽn kõt sũ-noog n yɩɩda, yaa d sẽn na n paam n zãmsd ned Biiblã.
2. D sã n sõng ned t’a bãng Biiblã sẽn yetã, bark bʋs la d paamda?
2 Wẽnnaam yʋʋr la bõe? Bõe yĩng t’a bas tɩ namsgã beẽ? Bõe la Wẽnnaam Rĩungã na n maan n kõ nebã? D sũy yaa noogo, d sẽn tõe n leok nebã sogsgã, la d sẽn ne nebã sẽn bãngd Biiblã sẽn yetã tɩ kõt-b sũ-noogã. (Yel. 15:23; Luk 24:32) Karen-biigã bãngr sã n paasdẽ, a tõe n wa pʋta Wẽnnaam yʋ-peellã, n manegd a meng sõma, n bas tʋʋm-yoodã, la a togsd neb a taabã bũmb ning a sẽn zãmsdã. A sã n wa tõog n dɩk a meng n kõ a Zeova n deeg lisgu, a na n lebga tõnd saam-biig la d tʋmd-n-taaga. Woto fãa kõt-d-la sũ-noogo.—1 Tes. 2:19, 20.
3. Bõe la d tõe n maan n paam ned sẽn dat n zãms Biiblã?
3 Yãmb me tõe n paama ned n zãms Biiblã: Yãmb sã n dat n naag n tʋm tʋʋm-kãngã sẽn kõt sũ-noogã, bɩ y kos a Zeova t’a sõng-y tɩ y paam ned sẽn dat n zãms Biiblã, la y modg n bao. (1 Zã 5:14) Moon-y zĩig ning la wakat ning y sẽn tõe n yã neba. Kãab-y nebã Biibl zãmsg wakat fãa. (Koɛ. 11:6) Ned sã n bʋd bũmbu, a zãgsda koom. Yãmb me sã n paam ned sẽn kelg koɛɛgã, bɩ y lebg n kẽng n tɩ sõng-a t’a bãng n paase.—1 Kor. 3:6-9.
4. Bõe yĩng tɩ d segd n modg n kãab nebã Biibl zãmsg wakat fãa?
4 Neb wʋsg n ket tɩ tɩrlem kom la ko-yũud tar-ba. Ãnd n na n zãms Biiblã ne-ba, n sõng-b tɩ b ratmã pidsi? (Mat. 5:3, 6) Bɩ d sak ne yamleoog n moon koɛɛgã, n sõng nebã tɩ b lebg a Zezi karen-biis tɩ saabã nan pa ta ye.—Ezai 6:8.