D sẽn na n zãms nebã Biiblã to-to tɩ b bɩ tẽebã pʋgẽ

Pipi babgo: Biibl zãmsg maaneg ne ned yaa bõe?

¹ Dũniyã gill zugu, kiuug fãa Wẽnnaam nin-buiidã sẽn maand Biibl zãmsg ne neb sõor kolga milyõ a yoobe. D sã n zãms neb nins sẽn zãmsd Biiblã sõma, d tõe n sõng-b lame tɩ b bɩ tẽebã pʋgẽ n wa rɩk b mens n kõ Wẽnnaam n deeg lisgu, tɩ bãmb me wa ‘tõog n zãms neb a taaba.’ (2 Tɩm. 2:2) Y ratame n sõng y sẽn zãmsd Biiblã ne a soabã t’a bɩ tẽebã pʋgẽ woto bɩ? Sẽn sɩng ne Rĩungã Tʋʋmd seb-kãngã, b rãmb nins sẽn na n pʋglã na n talla sõss sẽn pʋgd taaba, sẽn na n wilg bõn-kãsems d sẽn segd n maan n zãms Biiblã ne neb tɩ b bɩ tẽebã pʋgẽ.

² Wakat ning d sẽn tõe n gʋls tɩ yaa Biibl zãmsgã: Tõnd sã n sõsd ne ned Biiblã zug wakat fãa, baa yaa sõs-koeese, n tũnugd ne Biiblã la sebr a to b sẽn wilg tɩ d tõe n tall n zãmsa neba, d maanda Biibl zãmsgo. Baa ya a soabã zak noor la d yalsd wakat fãa n maand woto tɩ yaa ne telefõn me, yaa Biibl zãmsgo. D sẽn wilg a soabã Biiblã zãmsg sẽn maand to-to wã poore, d sã n leb n tɩ maan zãmsgã naoor a yiibu, tɩ wõnd a na n ket n kẽngda taoore, d tõe n gʋlsa moonegã tʋʋmd kɩbay sebr zug tɩ Biibl zãmsgo.

³ Yaa Baood seb-bilã ne Bãngr sebrã la d tar n zãmsd Biiblã ne neb wʋsgo. Tõnd sã n zãms seb-kãensã a yiibã n sa, tɩ yaa vẽeneg t’a soabã bɩta tẽebã pʋgẽ baa yaa bilf-bilfu, la d leb n neẽ t’a soabã nanda bũmb ning a sẽn zãmsdã, rẽ d tõe n kẽnga taoor ne zãmsgã Balm-y Wẽnnaam sebrã pʋgẽ. Y tõe n talla Y tõe n yɩɩ Wẽnnaam zoa! seb-bilã n zãms Biiblã ne neb nins sẽn pa karem n zãag zĩig bɩ sẽn ka tõe n karem sõma wã.

⁴ Ne Biiblã zãmsg maasem, b tõog n sõnga neb milyõ rãmb tɩ b lebg a Zezi karen-biis hakɩka. (Mat. 28:19, 20) Y sã n tũ sagls nins b sẽn na n kõ sõss nins sẽn na n pʋglã pʋsẽ, y na n tõog n zãmsa Biiblã ne neb tɩ b bɩ tẽebã pʋgẽ.