D sẽn tõe n zãms nebã Biiblã b zagsã noy la ne telefõnnã maasem to-to
1. Bõe yĩng la d sẽn zãmsd nebã Biiblã?
1 D sã n wa paam n sɩng Biiblã zãmsg ne neda, d sũur sɩd yaa noogo! La d sẽn datã pa paam ned sẽn tʋll n zãms Biiblã bal ye. Tõnd sẽn zãmsd nebã Biiblã yaa sẽn na yɩl tɩ b wa lebg Kiristã karen-biis hakɩka. (Mat. 28:19, 20) Bõe n tõe n sõng-d tɩ d tõog n maan dẽ?
2. Biiblã zãmsg ne ned a zak noor la ne telefõnnã maanda wãn-wãna, la bõe yĩng tɩ rẽ yaa sõma?
2 Ne neb nins sẽn pa tar sẽkã: Rũndã-rũndã, nebã sẽk lebgda bilf n paasdẽ. Zĩis kẽere, yaa neb bilf bal n na n sak n dɩk lɛɛr tõr n zãms Biiblã. Sẽn na yɩl n kõ nin-kãensã kasetã, b sagend-d lame tɩ d sɩng zãmsgã ne-b b zagsã noy bɩ ne telefõnnã maasem. Sɩngrẽ wã, zãms-kãng tõe n yɩɩ koɛɛg-koɛɛga, n tek Biiblã verse rãmb a wãn zut sõsg sẽn tik sebr wala Biiblã yetame wã sull a ye bɩ a yiib zugu. Ad koe-moondb wʋsg sẽn zãmsd Biiblã ne nebã b zagsã noy masã la ne telefõnnã sɩd seka pẽgre!
3. Bõe yĩng tɩ d pa segd n tek kẽnd n zãmsd ned Biiblã a zak noor koɛɛg-koɛɛg bala?
3 La d segd n kẽnd n zãmsd ned Biiblã a zak noor bal n pa satẽ bɩ? Ayo. Baa ne d sẽn mi tɩ d sã n sɩng zãmsgã ne ned paalem, d pa segd n dɩkd a sẽkã wʋsgã, b sagend-d-la woto: “Y sã n sɩng zãmsgã tɩ kɛlgdã tʋll n bãng koɛɛgã sõma n paase, y tõe n paasa sẽk ning y sẽn dɩkd n zãmsd-a wã.” Rẽ tara yõodo. D rɩk makre: Wala kom sã n wʋm biig tɩ loog tɩ b na n dɩlg-a, b kõt-a-la rɩɩbã bilf-bilf hal t’a wa tõe n dɩ sõma. La b sã n kõt-a rɩɩbã bilf-bilf wakat fãa n pa paasdẽ, a pa na n tol n ye paam a pãngã la a bɩ wa sẽn segdã ye. Woto me, sẽn na yɩl tɩ Biibl karen-biig bɩ n lebg Wẽnnaam sõgne, b pa segd n tek zãmsd-a koɛɛg-koɛɛg wakat fãa ye.—Heb. 5:13, 14.
4. Biiblã zãmsg ne ned zak pʋgẽ nafa la bʋse?
4 Biiblã zãmsg zak pʋgẽ: Yɩta sõma tɩ d maand zãmsgã zak pʋgẽ bɩ zĩig a to sẽn zemse. Rẽ na n kɩtame tɩ zãmsgã yɩ nana la a sõng karen-biigã t’a wʋm Wẽnnaam Gomdã võore. (Mat. 13:23) Leb n na n sõnga karen-saambã me t’a segl zãmsgã tɩ zems ne karen-biigã yɛla. Sẽn paase, d sã n dɩkd sẽk sõma n zãmsd ned Biiblã, kɩtdame t’a bãngd Wẽnnaam Gomdã sõma t’a tẽebã paasdẽ.—Rom 10:17.
5. Wãn-wãn la d tõe n kɩt tɩ ned sẽn zãmsd Biiblã a zak noor wa sak tɩ d kẽed a zakã pʋgẽ n zãmsd-a?
5 Wãn-wãn la y tõe n kɩt tɩ ned y sẽn zãmsd Biiblã a zak noor sak tɩ y wa kẽed a zakã pʋgẽ masã n zãmsd-a? Y sã n zãms Biiblã ne-a zakã noor koɛɛg-koɛɛg naoor a wãn poore, y tõe n wa wilg-a lame tɩ y rat n paasa sẽk ning y sẽn dɩkd n zãmsd-a wã bilfu. Wall y tõe n sok-a-la woto: “Rũndã, y tõe n yãa sẽk tɩ d zĩnd n vaees sõs-kãngã ne taab bɩ?” Pa rẽ bɩ y sok-a woto: “Wakat a wãn la y na n dɩk rũndã tɩ d sõs gom-zu-kãngã zugu?” La a sã n pa sake, y segd n ket n zãmsd-a-la koɛɛg-koɛɛg a zakã noore. Y sã n wa paam weer nindaar bɩ y mak n ges a sã n na n sakame tɩ y kẽ zakẽ n zãms-a.
6. Yaa bõe yĩng la d sẽn moond koɛɛgã, la wãn to la sõs-kãngã saglsã tõe n sõng-d tɩ d tõog n maan rẽ?
6 D sẽn ket n baood neb nins sẽn zems ne fãagrã, d pa segd n yĩm bũmb ning sẽn kɩt tɩ tõnd zãmsd nebã Biiblã ye. D sẽn datã yaa sõng pʋ-peelem dãmbã tɩ b wa rɩk b mens n kõ a Zeova n deeg lisg n balm-a. Bɩ Wẽnd na ning-d barka, modgr nins fãa d sẽn maand d koe-moonegã pʋgẽ sẽn na yɩl n maan karen-biisã yĩnga.—2 Tɩm. 4:5.