D sɩng Biiblã zãmsg ne neb b zagsa noyã, la ne telefõnnã
1, 2. Wãn-wãn la d tõe n maneg d sẽn zãmsd Biiblã ne nebã to-to wã tɩ zems ne neb nins sẽn pa tar sẽkã?
1 Rũndã-rũndã, nebã pa tar sẽk ye. Baasgo, neb wʋsg nanda tẽebã yɛla. Wãn-wãn la d tõe n sõng-b tɩ b tɩgs b tẽebã ratem? (Mat. 5:3, NW ) Koe-moondb wʋsg tõe n sɩnga Biiblã zãmsg ne nebã b zagsã noy bɩ ne telefõnne. Rẽ yĩnga y tõe n maana boto n yaalg y koe-moonegã bɩ?
2 Sẽn na yɩl n sɩng Biiblã zãmsg ne nebã, d segd n segla d meng tɩ weer sã n paam fãa bɩ d wilg-b d sẽn zãmsd Biiblã ne nebã to-to wã. Wãn-wãna, la yɛ la d tõe n maan dẽ?
3. Bõe yĩng tɩ d segd n wilgd d sẽn zãmsd Biiblã ne nebã to-to d pipi kẽngrã, la wãn to la d tõe n maan rẽ?
3 Zak noore: Y sã n seg ned sẽn sak n na n sõs ne-y Biiblã zug a zak noor t’a pa yet tɩ y kẽ pʋgẽ n zĩndi, bɩ y lak sull y sẽn da reng n segl zĩigẽ bala, wala makre, Baood seb-bilã pipi zãmsgã pipi sullã n sɩnge. Karm-y sullã n sok sokr la y sõs verse a ye wall a yiib zutu. Naoor wʋsgo, y tõe n maana rẽ zak noor minit a nu bɩ 10 pʋgẽ. Sõsgã sã n yɩɩ nedã noog bɩ y rɩk sɛk n lebg n tɩ sõs ne-a sull nins sẽn pʋgdã a ye bɩ a yiib zug nindaare.—Y tõe n paama sagls b sẽn kõ Biiblã zãmsg sɩngr ne nebã zĩig pʋgẽ wã wɛɛngẽ yʋʋmd 2002 yʋʋm-vẽkr Rĩungã Tʋʋmd seb-neng a 6 pʋgẽ n paase.
4. Wãn-wãn la d tõe n sɩng Biiblã zãmsg ne ned a zak noor d sã n wa lebg n tɩ na n ges-a?
4 Y sã n wa lebg n na n tɩ kaag nebã, y tõe n tũnuga ne manesem sẽn wõnd woto n sɩng Biiblã zãmsg ne-ba. Wala makre, y tõe n wilga Baood seb-bilã n tik zãmsg a yiib-n-soabã sẽn gomd Wẽnnaam yʋʋrã yellã n sõs ne-a sull a 1 ne a 2 zutu. Poorẽ, y tõe n tika sull a 3 ne a 4 n sõs Biiblã sẽn yet bũmb ning a Zeova zʋgã wɛɛngẽ wã. Sẽn pʋgdã, y tõe n sõsa sull a 5 ne a 6 la fotã sẽn be seb-neng a 5 wã zugu, n wilg Biiblã zãmsg sẽn sõngd-d tɩ d bãng a Zeova to-to. Y tõe n maana zãms-kãensã fãa nao zug ne ned a zakã noore.
5, 6. a) Bõe yĩng tɩ neb kẽer tõe n dat tɩ b tũnug ne telefõnnã n zãms-b Biiblã? b) Bõe la d tõe n yeel n wilg ned tɩ b tõe n tũnuga ne telefõnnã n zãms Biiblã ne-a?
5 Ne telefõnnã: Tõe tɩ neb kẽer na n saka b sẽn na n tũnug ne telefõnnã n zãms-b Biiblã n yɩɩd b sẽn na n wa zãms-b b zagsẽ wã. D rɩk makr ne kibar ning sẽn pʋgdã: Saam-bi-poak sẽn da wa n moond zak-zaka, a sega pʋg-bɩɩg sẽn yaa ma sẽn tar nug-tʋʋmd tɩ sẽk ka-a ye. Saam-bi-poakã sẽn da pa tõe n le tɩ yã-a yirã yĩnga, a yãka yam n na n sõs ne-a ne telefõnne. Pagã yeelame t’a sɩd pa tar sẽk n na n sõs Biiblã zug ye. Tɩ saam-bi-poakã yeel-a yaa: “Baa yaa ne telefõnnã menga, minit 10 bɩ 15 pʋgẽ bala, y tõe n zãmsa bũmb Biiblã pʋgẽ.” Tɩ pagã leoke: “Y sã n na n tũnuga ne telefõnnã n maan dẽ m sakame!” Sẽn pa kaoose, b sɩnga Biiblã zãmsg telefõnnẽ wã n pa vaandẽ ye.
6 Rẽ yĩnga neb nins y sẽn tʋgd n kaagdẽ wã kẽer na n sakame tɩ b tũnug ne telefõnnã n zãms-b Biiblã bɩ? Y tõe n tũu goam nins b sẽn bilgã wall y tõe n yeela a soab woto bala: “Y sã n data, d tõe n tũnuga ne telefõnnã n sõs Biiblã zug ne taaba. Woto sakda ne-y n yɩɩd bɩ?” D sã n maneg d sẽn zãmsd Biiblã ne nebã to-to wã tɩ zems ne b yɛlã, d tõe n sõng-b lame tɩ b ‘yã Wẽnnaam bãngra sẽn yaa to-to.’—Yel. 2:5; 1 Kor. 9:23.