Yãmb tũnugda ne Baood seb-bilã n sɩngd Biibl zãmsg ne neb bɩ?
1 Rẽ yĩnga yãmb miimi tɩ yãmb sã n sõsd Biiblã zug wakat fãa ne ned sẽn dat n bãng n paase, n zãmsd-a bũmb sɛb nins b sẽn sagl tɩ b tʋm ne wã a yembr pʋgẽ, baa zãmsgã sã n yaa koɛɛga yãmb maanda Biibl zãmsg ne neda sɩda? N-ye, sɩd yaa woto baa y sã n yalsa zakã noor bɩ yaa ne telefõn la y maan zãmsgã. Bõe yĩng tɩ y ka na n modg wʋsg n sɩng Biibl zãmsg a woto ne neb sig-noy la sigr kiisã ne Baood seb-bilã maasem?
2 Segl-y y mens neer sẽn na yɩl n tõog n sɩng Biibl zãmsgo: Y sã n kãabd Baood seb-bilã bɩ y bãng y sẽn dat n gom bũmb ning yellã vẽenega. Sã n yaa lebg-n-tɩ-ges la y maanda, bɩ y tẽeg bũmb ning yell y sẽn da gom pipi kẽngrẽ wã. Sʋk-y y meng woto: ‘Seb-bilã sul bʋs la m tõe n wilg sẽn na yɩl tɩ sõasgã kẽng taoore, tɩ wa baas ne Biibl zãmsgo?’ Y sa n moond zak-zaka, ges-y gom-zut bʋs n tõe n zĩnd yamleoog ne bi-bɩɩga, ned sẽn kʋʋle, raoa, bɩ paga. Vaees-y seb-bilã gom-zut zĩigẽ n yãk gom-zug neba sẽn na n tʋll n bãng yɛl a zug n paase. Y sã n yãka yam ne y sẽn na n yeel bũmb ning n kãab sebrã, bɩ y mak n maan dẽ naoor wʋsg n minim. Woto yaa bũmb a ye sẽn na n sõng tɩ y tõog n sɩng Biibl zãmsgo.
3 Yʋʋmd 2002, yʋʋm-vẽkr kiuugã Rĩungã Tʋʋmd seb-paasdem kõo “Sagls [a nii] sẽn na yɩl n kãab Baood seb-bilã.” Zĩ-gũbr ning sẽn yaa “Manesem sẽn na yɩl n sɩng Biibl zãmsg zĩig pʋgẽ” wã wilgda d sẽn tõe n tũnug ne seb-bilã to-to n sɩng zãmsg ne neba. Y tõe n tũnuga ne pipi saglgã goama n yeel woto:
◼ “Yãmb miimi tɩ minit a wãn pʋgẽ bala, yãmb tõe n paama sʋk-kãseng a yembr sẽn tɩ loe ne Biiblã leokr bɩ? Wala makre, bõe yĩng tɩ tũudum wʋsg be n yet tɩ b yaa kiris-neb tũudum? Yãmb zoe n sʋka y meng yel-kãngã bɩ?” A soabã leokr poor bɩ y lak zãmsg 13 wã zĩigẽ n sõs pipi sul a yiibã zutu. Sẽk sã n beẽ bɩ y karem la y sõs verse a yembr bɩ a yiib zutu. Rẽ poor bɩ y sʋk yaoolem sʋkrã sẽn be seb-nengã zugẽ wã, la y yeele: “Zãmsgã zĩis a taabã sẽn ketã wilgda bãn a nu sẽn kɩtd tɩ b tõe n bãng tũudum hakɩkã sẽn ya a soaba. M sũur na n yɩɩ noog tɩ m lebg n wa ges zĩ-kãensã ne yãmba.”
4 Ket-y n pẽdgdẽ: Tũnug-y ne sor buud fãa y sẽn paam n mak Biibl zãmsg sẽn maand to-to ne Baood seb-bilã n wilgi. Kos-y a Zeova t’a ning y modgrã barka. (Mat. 21:22) Y sã n ket n pẽdgdẽ, tõe tɩ y na n paama zu-noog n sõng ned t’a sak koe-noogã!