Bĩng-y-yã

Sagls koe-moonegã yĩnga

D sẽn na n tʋm ne seb-paasdem kãngã to-to

Sagl-kãensã wʋsg sẽn yɩɩd zoe n puka pĩnd Rĩungã Tʋʋmd sɛb pʋsẽ. Mak-y n tũ bãmb wʋsg y kasetã kũun pʋgẽ wa y sẽn date, n ges y sẽn tõe n paam biis ninsi. Bĩng-y seb-paasdem kãngã tɩ y sã n wa segend y meng koe-moonegã yĩng bɩ y lebg n ges-a.

Yãmb koɛɛgã sã n yaa takɩ, tõeeme n kɩt tɩ ned tʋlg n kelg Wẽnnaam Gomdã. Sʋk-y sʋkr sẽn yaa takɩ, tɩ rẽ poor bɩ y karem leoorã Biiblã pʋgẽ koɛɛg-koɛɛga. Y tõe n mak n tũu sagl-kãensã:

“Yãmb sã n tagsd beoog-daarã yelle, y saagdame tɩ yɛlã na n baasa neer bɩ y tara sãmbse? [Bas-y t’a leoke.] Biiblã reng n togsa yɛlã sẽn wat ne yɩɩrã d sẽn ne rũndã-rũndã wã waoong la b baasg sẽn na n yɩ to-to.”—2 Tɩm. 3:1, 2, 5; Yel. 2:21, 22.

“Laafɩ wã yell paka neb wʋsg rũndã-rũndã. Yãmb miimi tɩ Wẽnnaam kãabame t’a na n welga zu-loeesã sẽn tɩ loe ne laafɩ wã wakat fãa yĩng bɩ?”—Ezai 33:24; Wil. 21:3, 4.

“Rẽ yĩnga yãmb miimi tɩ Biiblã reng n wilgame tɩ yaa goosneem a yembr bal n na n wa baas n dɩ naam dũniyã gill zug bɩ?—Dan. 2:44; Mat. 6:9, 10.

“Yãmb tagsdame t’a Zezi Kirist sã n wa rɩt naam tẽngã zugu, yɛlã na n yɩɩ wãn-wãna?”—Yɩɩl 72:7, 8.

“Neb wʋsg namsda b sẽn yaa pag bɩ raoa, b tũudum bɩ b buud sẽn ya a soaba yĩnga. Sã n yaa ne yãmba, Wẽnnaam tagsg yaa wãn-wãn ne namsg a woto?”—Tʋʋ. 10:34, 35.

“Tõnd miimi t’a Zezi wakatã a maana yel-soalem wʋsgo. Y sã n da tõe n kos-a t’a maan yel-solemd a to n paase, bʋg la y ra na n tʋlg t’a maane?”—Yɩɩl 72:12-14, 16.

“Neba wʋsg sẽn yɩɩd yam yaa n yii ne zu-loeesã kɩbay kelgre. B sẽn dat yaa b tɩɩm. La yɛ la tõnd tõe n sɩd paam tõnd zu-loeesã tɩɩm?”—2 Tɩm. 3:16, 17.

“Soaalã (bɩ, tõnd Ba sẽn be Arzãna) pʋʋsg pʋgẽ, yãmb mii Rĩung ning yãmb sẽn pʋʋsd t’a wa wã sẽn ya a soab bɩ?”—Wil. 11:15.

Sõss sɩngdse

Sʋgsg nins sẽn be tẽngrã yaa sõss gom-zut sẽn yit Comment raisonner sebrã pʋgẽ. Sʋkrã poore b wilga seb-neng ning zĩigẽ b sẽn tõe n yã leoorã sebrã pʋgẽ.

Nin-tɩrsã fãa rebda saasẽ bɩ? (61)

Yaa tɩlae tɩ ned kẽng saasẽ n yaool n paam sũ-noog hakɩk beoog-daar bɩ? (62)

Rẽ yĩnga zemsame tɩ d tẽ Wẽnnaam bɩ? (106)

Wẽnnaam sɩd maanda yɩɩr ne bũmb nins sẽn paamd ninsaalbã bɩ? (107)

Wẽnnaam yaa ned buud sɩd-sɩd bɩ? (108)

Bõe yĩng tɩ tar yõod tɩ d bãng Wẽnnaam yʋ-peellã la d tũnug ne-a? (200)

Sɩd-sɩda a Zezi Kirist yaa Wẽnnaam bɩ? (205)

Bõe n tõe n sõng n maneg kãadem? (229)

Bõe yĩng tɩ wẽnemã be wʋsg woto? (237)

Ãnda n so dũni kãngã: Wẽnnaam bɩ a Sʋɩtãana? (250)

Bõe yĩng tɩ d kʋʋndẽ la d kiidẽ? (253)

Sẽn ki-bã halhaal yaa wãn-wãna? (255)

Wẽnnaam sakda tũudum toɛy-toɛya fãa bɩ? (310)

Ned tõe n maana wãn n bãng tũudum ning sẽn yaa sɩdã? (316)

Bõe la Wẽnnaam Rĩungã na n maane? (336)

A Sʋɩtãan tõogã rũndã-rũndã dũniyã pʋgẽ taa zĩ-bʋgo? (368)

Bõe yĩng tɩ Wẽnnaam bas tɩ namsg beẽ? (375)

Ninsaal vɩɩmã võor yaa bõe? (434)

Sagls sẽn na yɩl n kãab Baood seb-bilã

“Sãmbg kae tɩ y na n sakame tɩ neb wʋsg tẽeda Wẽnnaam ye. Neb nins fãa sẽn tẽed-a wã sakame tɩ yɛl n be tɩ Wẽnnaam baood tɩ tõnd maane. La bũmb ning zug neba sẽn ka tõe n zems taabã la woto: Bõe la Wẽnnaam baood tɩ tõnd maane?” Rẽ poor bɩ y wilg Baood seb-bilã, n lak zãmsg a 1 wã zĩigẽ, n sõs a zugu

“Zagsã zu-loees sẽn lebg wʋsg rũndã-rũndã wã, yãmb zoe n sʋka y meng n ges bũmb ning b sẽn tõe n maan n paam sũ-noog zak pʋgẽ bɩ?” A soabã leokr poor bɩ y wilg tɩ Biiblã pʋgẽ, Wẽnnaam wilga d sẽn tõe n maan to-to n paam sũ-noog zakã pʋgẽ. Karm-y Ezai 48:17. Rẽ poor bɩ y lak Baood seb-bilã zãmsg a 8 wã zĩigẽ, n wilg Biiblã verse rãmb b sẽn sõdg be, sẽn kõt zakã ned fãa sor-wilgr sẽn be bas-m-yam. Karm-y sʋgsgã sẽn be zãmsgã sɩngrẽ wã. Sʋk-y a soabã n ges a sã n datame n karem leoorã.

“Seb-bi kãngã tara Biiblã zãms-kãsems fãa. Seb-neng fãa zugu, y na n yãa sʋgsg sẽn nams neb sẽn na maan yʋʋm pi-gĩn leoore. Wala makre, Wẽnnaam raabã ne tẽngã yaa bõe?” Lak-y zãmsg a 5 wã zĩigẽ, n karem sʋgsgã sẽn be zãmsgã sɩngrẽ wã. Sʋk-y nedã n bãng sʋkr ning leoor a sẽn dat n bãng n yɩɩdã, la y karem sul nins sẽn tɩ loe ne rẽ wã, n karem verse nins sẽn zemsã. Wilg-y-yã-a t’a tõe n paama sʋgsg a taaba leoor nana-nana woto me. Kãab-y tɩ y na n lebg n wa sõsa ne-a sʋkr a to zugu.

“Yãmb tagsdame tɩ yaa bõe n wat ne nen-kɛglem tʋʋma lekoll dãmbẽ wã? Yaa kambã sẽn ka yã wubrã yĩng bɩ? Bɩ yaa bũmb a to, wala a Sʋɩtãan pãn-tusdga?” Bas-y t’a leoke. Nedã sã n yeel tɩ ya a Sʋɩtãan n wa ne rẽ, bɩ y karem Wilgri 12:9, 12. Wilg-y tɩ ya a Sʋɩtãan n wat ne gudgr dũniyã pʋgẽ wã. Rẽ poor bɩ y lak Baood seb-bilã zãmsg a 4 zĩigẽ, n sʋk nedã n ges a sã n zoe n sʋka a meng n ges a Sʋɩtãan sẽn yitẽ. Kẽng-y taoor n karem la y sõs pipi sul a yiibã zutu. La a soabã sã n yeel tɩ yaa “kambã sẽn ka yã wubrã” n wa ne nen-kɛglem tʋʋma lekoll dãmbẽ wã, bɩ y karem 2 Tɩmote 3:1-3 n wilg manesem-wẽns nins sẽn sõng n wa ne yel-kãngã. Rẽ poor bɩ y lak Baood seb-bilã zãmsg a 8 wã zĩigẽ, n karem sull a 5 wã, la y kẽng taoor ne sõasgã.

“Yãmb tagsdame tɩ yaa bũmb sẽn zemse, tɩ d gũ tɩ Naandã kõ tõnd bãngr ning sẽn segdã sẽn na yɩl tɩ d tõog n vɩɩmd ne sũ-noog zakã pʋgẽ bɩ?” A soabã leokr poore, bɩ y wilg Baood seb-bilã. Lak-y zãmsg a 8 wã zĩigẽ, la y wilg t’a tara noy sẽn yit Biiblã pʋgẽ zakã ned fãa yĩnga. Kãab-y-yã-a tɩ y na n makame n wilg a sẽn tõe n zãms seb-bilã n tũnug ne Biiblã to-to tɩ naf-a wʋsgo.

“Yãmb tagsdame tɩ rũndã-rũndã vɩɩmã ne a zu-loeesã d sẽn maood ne wã pʋgẽ, pʋʋsg tõe n sɩd sõnga tõnd bɩ? [Bas-y t’a leoke.] Neb wʋsg yetame tɩ pʋʋsgã kõt-b-la pãnga. [Karm-y Filip rãmba 4:6, 7.] Baasg zãnga, nina tõe n tagsame tɩ Wẽnnaam ka reegd a pʋʋsg ye. [Lak-y Baood seb-bilã zãmsg a 7 wã zĩigẽ.] Seb-bi kãngã wilgda pʋʋsgã sẽn tõe n naf tõnd wʋsg to-to.”

“Tõnd sõsda ne d yagsã bũmb ning sẽn kɩt tɩ tũudum toɛy-toɛy wʋsg be dũniyã zugã. La yaool n yaa Biibl a yembr bal n be. Sã n yaa ne yãmba, bõe yĩng tɩ tũudmã wɛɛngẽ zũnd-zãnd woto beẽ? [Bas-y t’a leoke. Lak-y Baood seb-bilã zãmsg 13 zĩigẽ, n karem sʋgsg nins sẽn be sɩngrẽ wã.] Y sã n karem zãms-kãngã, y na n paama sʋgs-kãensã leoor sẽn tat yam.”

Y sã n bas Gũusg Gasgã la Réveillez-vous ! wã zʋrno rãmb ne neda, sʋk-y-yã-a n ges a sã n na n sakame tɩ y karm-a sul koɛɛg a yembre.

A sã n kõ-y sor bɩ y lak Baood seb-bilã zãmsg a 5 wã zĩigẽ. Wilg-y sʋgsg nins sẽn be zãmsgã sɩngrẽ wã, n kos-a t’a kelg pipi sʋkrã leoore, y sã n wa karemd pipi sullã. Pipi sullã kareng poore, bɩ y sʋk-a sʋkrã t’a kõ a leoore. Kãab-y-yã-a sebrã, t’a sã n sak sebrã bɩ y maan segls n lebg n wa paam sʋgsg a yiibã sẽn pʋgdã leoor nindaare.

Sagls sẽn na yɩl n kãab Bãngr sebrã

Ne Biiblã y nugẽ, sɩng-y woto: “Tõnd karemda verse n wilgd ned ning fãa d sẽn seg yãmb zĩigẽ ka rũndã. Verse wã yetame . . . ” Karm-y Zã 17:3, la y sʋk woto: “Yãmb yãa bũmb ning b sẽn kãab tɩ d na n paamame d sã n tar bãngr ning sẽn segdã bɩ? [Bas-y t’a leoke.] Yɛ la ned tõe n paam bãngr a woto?” A soabã leokr poor bɩ y wilg-a Bãngr sebrã la y yeele: “Seb-kãngã wilgda bãngr ning sẽn tar n debd vɩɩm sẽn-kõn-saẽ wã. A kõta bãng-kãnga, n leokd sʋgsg wʋsg neba sẽn nong n tar Biiblã zugã.” Wilg-y sagsã zĩiga, la y sʋk a soabã n ges a sã n da zoe n maana a meng sʋkr gom-zut kãensã zutu.

“Yãmb zoe n sʋka y meng n gese, Wẽnnaam sã n sɩd maanda yɩɩr ne yɛl-kɛgã la namsgã d sẽn ne tɩ gũbg tõndã, bɩ sẽn paamd tõnd mengã bɩ? [Bas-y t’a leoke.] Biiblã kɩtdame tɩ d tall bas-m-yam tɩ Wẽnnaam nonga tõndo, la t’a na n sõng-d lame tɩ d põs toog wakate.” Karm-y Yɩɩl Sõamyã 72:12-17 babs kẽere. Lak-y Bãngr sebrã sak a 8, n wilg t’a kõta sʋkr neb milyõ rãmb sẽn sʋk b mens leoor sẽn kengd pɛlga, sẽn yaa: Bõe yĩng tɩ Wẽnnaam bas tɩ namsgã beẽ? Sã n tõe, bɩ y sõs tagsa sẽn tik Biiblã zug kẽere, tɩ b gom b yell sul a 3 n tɩ ta a 5 wã pʋsẽ, bɩ n lebg n wa maan dẽ lebg-n-tɩ-gesã wakate.

“Tõnd wʋsg sẽn yɩɩd talla nin-nongds sẽn maan kaalem. Yãmb zoe n sʋka y meng n ges d sã n na n leb n yã-b lame bɩ? [Bas-y t’a leoke.] A Zezi kõo kaset sẽn wilgd tɩ b tõe n vʋʋgã tõnd nin-nongdsã. [Karm-y Zã 11:11, 25, 44.] Baa ne yel-kãngã sẽn zĩnd sẽn na maan yʋʋm kob-gĩna, a wilgda Wẽnnaam sẽn kãab t’a na n maan n kõo tõndã.” Lak-y Bãngr sebrã seb-neng 85, n karem gʋlsem ning sẽn be yimaasã zugã. Rẽ poor bɩ y wilg yimaasã sẽn be seb-neng 86, la y gom a zugu. Sẽn na yɩl n segl nindaar waoongã yĩnga, bɩ y sʋk woto: “Yãmb datẽ lame n bãng bũmb ning sẽn kɩt tɩ ninsaalbã kʋʋndẽ la b kiidẽ wã bɩ?” Lebg-y n wa-y nindaarã n sõs sak a 6 zugu.

“Yãmb zoe n sʋka y meng n ges bũmb ning sẽn kɩt tɩ ninsaalbã baood yõ-wokã bɩ? A soabã leokr poor bɩ y lak Bãngr sebrã sak a 6, n karem sull a 3. Sõs-y verse rãmbã b sẽn sõdgã zutu. Sẽn tɩ loe ne sʋgsg a yiibã sẽn be sullã baasgẽ wã, sʋk-y nedã n ges a sã n datame n bãng leoorã. A soabã sã n yeel t’a ratame bɩ y sõs ne-a sul a wãna sẽn pʋgdã zutu.

“Tõnd sʋkda nebã n dat n bãng b sã n tẽeda gom-kãngã . . . ” Karm-y Sɩngre 1:1, la y sʋk woto: “Yãmb sakame tɩ gom-kãngã yaa sɩd bɩ?” Nedã sã n sakame, bɩ y yeele: “Mam me tagsda woto. La rẽ yĩnga, yãmb tagsdame tɩ sẽn yaa Wẽnnaam n naan bũmb fãa wã, yaa yẽ me n kɩt tɩ wẽnema beẽ wã bɩ?” Reeg-y a soabã leokre, la y karem Koɛɛg Soaba 7:29. Lak-y Bãngr sebrã sak a 8, n karem sull a 2. A soabã sã n ka sak Sɩngre 1:1 wã sẽn yetã, bɩ y sagl-a t’a vaees kaset ning sẽn wilgd tɩ Naandã beeme wã.—Ges-y Comment raisonner sebrã, seb-neng 72-4.

“Yãmb sakame tɩ rũndã-rũndã vɩɩm manesmã sẽn toeemd tao-tao wʋsg woto wã, d rata sor-wilgr sẽn be bas-m-yam vɩɩmã pʋgẽ bɩ? [Bas-y t’a leoke.] Baa ne a sẽn yaa sebr ning sẽn yaa kʋdr n yɩɩdã, Biiblã kõta sagl-sõma rũndã-rũndã vɩɩmã la zak pʋgẽ vɩɩm sũ-noogã yĩnga.” Rẽ poor bɩ y lak Bãngr sebrã sak a 2, n karem sull 10, la sull 11 wã pipi gomde, n naag ne 2 Tɩmote 3:16, 17 wã.

“Yãmb datẽ lame n bãng tõnd ne tẽngã beoog-daar sẽn na yɩ a soab bɩ? [Bas-y t’a leoke.] Biiblã kʋmsda beoog-daarã sẽn na n yɩ a soabã ne gom-bi-yɛng bala: Arzãna! Yaa zĩ-kãng la Wẽnnaam ning pipi rao wã ne a pagã a sẽn da wa n naan-bã. Ges-y b sẽn bilg a sẽn da tog n yaa to-to.” Lak-y Bãngr sebrã seb-neng a 8, la y karem sull a 9 wã, sẽn be gom-zu-bil ning sẽn yaa “Vɩɩm arzãn pʋgẽ” wã tẽngrã. Rẽ poor bɩ y sõs tagsa wã sẽn be sull 10 pʋgẽ wã zugu, la y karem Ezai 55:10, 11 wã. Kãab-y-yã-a tɩ y na n kẽnga taoor ne sõasgã n wilg vɩɩmã sẽn na n yɩ to-to Arzãna b sẽn na n lebs n luglã pʋgẽ, n sõs sull 11-16 zutu.

Y sã n wa lebg n na n tɩ ges neb nins y sẽn bas Gũusg Gasgã la Réveillez-vous ! wã zʋrno rãmbã, y tõe n yeela woto:

“Nindaarẽ m sẽn wa wã, yɩɩ ne sũ-noog la m sẽn bas Gũusg Gasgã zʋrnall ne-yã. Tõe tɩ y yãame tɩ zʋrnallã gom-zug zãng yaa Gũusg Gasgã moonda a Zeova Rĩungã. Rũndã mam datẽ lame n wilg Rĩung kãng sẽn ya a soaba, la a sẽn na n wa ne bũmb ning n kõ yãmb la y zaka rãmba.” Rẽ poor bɩ y lak Baood seb-bilã zãmsg a 6 zĩigẽ, n karem la y sõs n kaoos tɩ zems ne a soabã sẽn tar sẽk ning rẽ yĩnga.

“Mam waa yãmb nengẽ sẽn pa kaoos n bas ne yãmb Gũusg Gasgã la Réveillez-vous ! wã zʋrno rãmba. Zʋrno kãensã kɩtdame tɩ neba waoog Biiblã ne a vɩɩm manesem noyã n paase. M tagsdame tɩ tara yõod wʋsg tɩ ned kam fãa wʋm Wẽnnaam Gomdã võore. Rẽ n so tɩ m lebg n wa n na n wilg-y bũmb sẽn na n sõng-y tɩ y maan dẽ.” Wilg-y Baood seb-bilã bɩ Bãngr sebrã, la y kãab-a Biibl zãmsgo.

Y sã n wa kãabd seb-kʋd nins sẽn tar seb-nens 192 wã, y tõe n mak n maana woto:

“Neb wʋsg wilgda vẽeneg tɩ kareng sẽn yaa sõma raab beeme. Sã n yaa ne yãmba, karen-bʋg buud la ned segd n maan n tõog n paam sũ-noog sẽn yaa kãseng n yɩɩd la a tõog n pids yɛl wʋsg a vɩɩmã pʋgẽ? [Bas-y t’a leoke. Rẽ poore, bɩ y karem Yelbũna 9:10, 11.] Seb-kãngã [togs-y sebrã y sẽn kãabda gom-zugu] tika Biiblã zugu. A wilgda bãngr ning bal sẽn tar n debd vɩɩm sẽn-kõn-saẽ wã.” Wilg-y a soabã makr sẽn yaa takɩ sebrã pʋgẽ, la y sagl-a t’a karm-a.

Sɛb a taaba

B tõe n yãa sagls a taab sẽn na yɩl n kãab sɛb la seb-bi a taab Publications de la Société Watch Tower — Index rãmbã pʋsẽ zĩ-kãensã tẽngre:

Présentation

Liste par publication

Manesem sẽn na yɩl n sɩng Biibl zãmsg zĩig pʋgẽ

Sẽn na yɩl n sɩng Biibl zãmsg zĩig pʋgẽ, mak-y n tũnug ne manesem kãensã a yembre:

“Yãmb miimi tɩ minit a wãn pʋgẽ bala, yãmb tõe n paama sʋk-kãseng a yembr sẽn tɩ loe ne Biiblã leokr bɩ? Wala makre, . . . ” Rẽ poor bɩ y sʋk sʋkr a yembr sẽn be Baood seb-bilã zãmsg a yembr sɩngrẽ, sẽn yaa sʋkr y sẽn tagsd t’a soabã na n tʋllame n bãng a leoore.

“Mam tek n yalsame n na n wilg-y Biibl zãmsgã d sẽn maand ne nebã zaalmã sẽn maand to-to. Mak-n-wilgã rɩkda minit a nu bala. Yãmb tara minit a nu bɩ?” A soabã sã n leok tɩ n-ye, bɩ d yãk pipi zãmsgã sẽn be Baood seb-bilã pʋgẽ wã n mak zãmsgã n wilgi, n yãk verse a yembr bɩ a yiib bal n karem. Rẽ poor bɩ y sʋke: “Wakat bʋg la y na n yã minit 15 tɩ d maan zãmsg ning sẽn pʋgdã?”

“Neb wʋsg tara Biiblã, la b ka mi t’a leokda sʋgsg nins sẽn yaa kãsems n yɩɩdã tõnd fãa sẽn tare, beoog-daarã wɛɛngẽ wã ye. Y sã n tũnug ne seb-kãngã [Baood seb-bilã bɩ Bãngr sebrã] sẽn zems lɛɛr a ye rasem a yopoe fãa, y tõe n wʋma Biiblã zãms-kãsems võor kiis a wãn pʋsẽ bala. M sũur na n yɩɩ noog tɩ m wilg-y zãmsgã na-kẽndr sẽn yaa to-to.”

“Mam waame n na n kãab-y yirẽ Biibl zãmsg zaalem. Sã n tõeyã, m na n dɩka minit a wãn bal n mak neb sẽn sõsd Biiblã zug to-to sẽn yɩɩd tẽns 200 pʋsẽ b yir ne b zak rãmb n wilgi. D tõe n tũnuga ne gom-zu-kãensã a yembr tɩ yɩ tõnd sõsgã tikri. [Wilg-y Bãngr sebrã sags zĩiga.] Sag-bʋg la y rat n yɩɩd tɩ d sõs a zugu?” Yaas-y t’a soaba yãk gom-zug ning a sẽn data. Lak-y gom-zug ning a sẽn yãkẽ wã n sɩng zãmsgã ne pipi sullã.

“Mam kõta neba Biibl zãmsg zaalem, la m tar sẽk n tõe n zãms karen-biis n paase. Yaa seb-kãngã sẽn tik Biiblã zugã la tõnd tũnugd ne. [Wilg-y Bãngr sebrã.] Zãmsgã kaoosda kiis a wãn bala, la a kõt sʋgsg kẽer leoor wala: Bõe yĩng tɩ Wẽnnaam bas tɩ namsgã beẽ? Bõe yĩng tɩ d kʋʋndẽ la d kiidẽ? Bõe n paamd tõnd nin-nongdsã sẽn maan kaalmã? La wãn-wãn la tõnd tõe n pẽneg Wẽnnaam? M tõe n maka zãmsg a yembr sẽn maand to-to n wilg bɩ?”

Yãmb sã n tara manesem n sɩngd sõsg sẽn kɩtd tɩ nebã ket n wilgd nonglem ne sɩdã, bɩ y ket n maand woto! Yãmb wee n zems-a ne sebr ning y sẽn kãabd kiuugã pʋgẽ wã bala.