D sẽn na n zãms nebã Koe-noog sẽn yit Wẽnnaam nengẽ! sebrã to-to
Na n sõng-d lame tɩ d lebg n tɩ ges nebã la d zãms-b Biiblã
1. Seb-paalg bʋg la b yiis rasem a tãab tigs-kãsengã sasa n na n sõng-d tɩ d tõog n lebg n tɩ ges nebã la d zãms-b Biiblã?
1 “Bɩ f gũus ne f sũurã tagsgo!” rasem a tãab tigs-kãsengã sasa, d sũy yɩɩ noogo, d sẽn paam seb-paalg sẽn na n sõng-d tɩ d tõog n lebg n tɩ ges nebã la d zãms-b Biiblã. A gom-zugã yaa Koe-noog sẽn yit Wẽnnaam nengẽ! Seb-kãng wõnda Bõe la Wẽnnaam dat tɩ tõnd maane? sebrã, la a na n ledg-a lame. A zãmsgã yaa koeese. Woto na n sõnga tõnd tɩ d kell n yals yĩngr meng n zãms ned Biiblã. Bõe la Wẽnnaam dat tɩ tõnd maane? sebrã gomda b sẽn dat tɩ kiris-nebã maan bũmb ningã yelle, tɩ tõe n yɩ toog ne karen-bi-paals kẽer tɩ b tũ. Seb-paalgã yẽ gomda koe-noog ning sẽn be Biiblã pʋgẽ wã yelle.—Tʋʋ. 15:35.
2. Bõe yĩng tɩ b yiis Koe-noog sẽn yit Wẽnnaam nengẽ! sebrã?
2 Bõe yĩng tɩ b yiis sebrã? Saam-biisã sẽn be tẽns toor-toorã da rata sebr sẽn na n sõng nebã nana-nana tɩ b tʋll n bãng sɩdã, la sẽn na n kɩt tɩ b wa sak tɩ d tũnug ne Biiblã yetame sebrã n zãms-b Biiblã. Yaa seb-kãng la d tar n zãmsd Biiblã ne nebã n yɩɩda. Neb kẽer sẽn zoet seb-bedr zãmsg mi n sak n zãmsa Biiblã, d sã n tũnug ne seb-bila. Sẽn paase, b lebga seb-biyã ne buud goam wʋsgo, tɩ b karengã me yaa nana.
3. Bõe n kɩt tɩ seb-kãngã yaa toor ne sɛb a taabã?
3 Sebrã sẽn yaa to-to: D sẽn gʋls d sɛbã d sẽn tar n zãmsd Biiblã ne nebã to-to wã, yaa sẽn na yɩl tɩ b tõog n karem la b bãng sɩdã tɩ pa tũ ne ned a to sõngr ye. La seb-kãngã yaa toore. D gʋls-a lame tɩ ned sã n dat n wʋm a võore, rẽnda koe-moond sõng-a. Dẽnd nand tɩ y bas-a ne neda, bɩ y reng n sõs sull a ye wall a yiib zugu. Sulã yaa koeese, tɩ y tõe n yals zak noor n sõse, pa rẽ bɩ koosmã la tʋʋmã zĩigẽ. Baa ne sẽn yaa sõma tɩ y sɩng ne pipi zãmsgã, pa wẽng tɩ y yãk zĩig ning fãa y sẽn datã n sɩng ye.
4. Wãn to la sebrã na n sõng tõnd tɩ d tik Biiblã meng zug n zãms nebã?
4 Naoor wʋsgo, d sɛbã sogsgã leoor bee sulã pʋsẽ. La seb-kãngã pa woto ye. Leoorã bee Biiblã pʋgẽ. Neb wʋsg nong n bãnga leoorã Biiblã pʋgẽ n yɩɩd sẽn be tõnd sɛbẽ wã. Rẽ n so tɩ sebrã fãa la bal pʋgẽ, b ninga vɛrse-rãmbã n pa paas b goamã ye. Y tog n karma vɛrse-kãens Biiblã pʋgẽ. Woto sõngda Biibl karen-biisã tɩ b bãng tɩ b sẽn zãmsd bũmb ningã yita Wẽnnaam nengẽ.—Ezai 54:13.
5. Bõe yĩng tɩ karen-saambã segd n deng n segl zãmsgã sõma?
5 Sebrã pa wilgd vɛrse-rãmbã fãa võor ye. Bõe yĩnga? Bala b gʋls-a lame tɩ karen-biigã tõe n sok sogsgo, la a bas tɩ karen-saambã tũnug ne a tõogã n sõng-a t’a wʋme. Dẽnd yɩta sõma tɩ y segl y meng neer zãmsg fãa yĩnga. La bãng-y tɩ y pa segd n gom wʋsg ye. Yaa sɩd tɩ tõnd nonga vɛrse-rãmbã wɛgsgo, la d sã n bas tɩ Biiblã karen-biig wilgd a sẽn wʋmd vɛrse võor to-to, na n sõng-a lame n yɩɩda. D sã n sokd-a sogsgo, na n sõng-a lame t’a tags vɛrse-rãmbã zugu.—Tʋʋ. 17:2.
6. Wãn to la d tõe n tall sebrã a) n sõng neb sẽn tar sãmb-sãmb ne Wẽnnaam la ne Biiblã? b) n moon zak-zaka? d) n sɩng Biibl zãmsg ne ned d pipi sõsgã sasa? e) d sã n wa lebg n na n tɩ ges neda?
6 Wa d sẽn kãabd nebã sɛb kẽer d sẽn tar n zãmsd-b Biiblã, y tõe n kãaba ned sebrã sasa ning fãa, baa tɩ pa rẽ la d segd n kãab kiuugã pʋgẽ. Neb wʋsg sũy na n yɩɩ noogo, b sẽn na n tall seb-kãngã n sɩng Biibl zãmsg b pipi sõsgã sasa wã. Sẽn paase, wa b sẽn yeel tigs-kãsengã sasa wã, d sã n sɩd tʋm ne seb-kãngã sõma lebg-n-tɩ-ges rãmbã sasa, na n talla yamleoog wʋsgo.—Ges-y seb-neng a 5-7 zĩ-gũbsã.
7. Wãn to la y tõe n tall seb-kãngã n zãms ned Biiblã?
7 Zãmsgã sẽn segd n yɩ to-to: Y tõe n deng n soka sogsg nins b sẽn gʋls tagd-tagdã tɩ rẽ poor bɩ y karem sull ning sẽn leokd sokrã, la vɛrse ning b sẽn yet tɩ b karma. Sẽn paase, sok-y sokr sẽn na n sõng y sõsd-n-taagã t’a wʋm vɛrse-rãmbã võore. Nand tɩ y gom sull ning sẽn pʋgdã yelle, bɩ y kos kɛlgdã t’a leok sokr ning b sẽn gʋls tagd-tagdã n bãng a sã n wʋma sullã võor sõma. Sɩngrẽ wã, yɩta sõma tɩ zãmsg fãa sasa bɩ y leok sokr a yembre. La bilf-bilfu, y tõe n wa sõsda zãmsg a yembr tõr zugu.
8. Bõe la d segd n yeel n yaool n karem vɛrse, la bõe yĩnga?
8 B sẽn yet tɩ b karem vɛrse-rãmb ninsã leokda sogsgã b sẽn gʋls tagd-tagdã. Y sã n wa rat n karem vɛrse, yɩta sõma tɩ y ra yeel tɩ: “Tʋm-tʋmd a Poll ra yeela woto,” wall “D ges a Zeremi sẽn da reng n togsã” ye. Y sã n maan woto, y kɛlgdã tõe n tagsame tɩ yaa ninsaal tagsg la y togsda. Dẽnd yɩta sõma tɩ y yeel tɩ: “Wẽnnaam Gomdã yeta woto,” bɩ “Ges-y Biiblã sẽn da reng n togsã.”
9. Zãmsgã sasa, y tog n karma vɛrse-rãmbã fãa bɩ?
9 Rẽ yĩnga, y tog n karma vɛrse-rãmbã fãa bɩ, bɩ yaa b sẽn yet tɩ b karma bala? Rẽ bee ne yɛlã sẽn yaa to-to. B pa ning vɛrse-rãmb nins fãa sẽn be sebrã pʋgẽ wã zaalem yĩng ye. Vɛrse fãa tara võore, tɩ y tõe n sõs a zugu. La sasa kẽere, tõe tɩ karen-biigã sẽk sẽn pa waoogã, wall a sẽn pa tõe karengã yĩnga, y na n karma vɛrse-rãmb nins b sẽn yet tɩ b karma bala.
10. Wakat bʋg la y tõe n wa sɩng zãmsgã ne Biiblã yetame sebrã?
10 Wakat ning y sẽn tõe n wa sɩng zãmsgã ne Biiblã yetame sebrã: Y sã n wa zãmsd ned Koe-noogã sebr n wa kɩs sɩd tɩ lebga Biibl zãmsgo, y tõe n kell n kẽnga taoor ne zãmsgã n baas sebrã, wall y ledg-a ne Biiblã yetame sebrã. Yaa koe-moond fãa n na n bãng wakat ning a sẽn na n zãms Biiblã yetame sebrã ne a karen-biigã. Y sã n na n zãmsa seb-kãng ne-a, rẽ yĩnga yaa tɩlae tɩ y sɩng ne pipi sakã bɩ? Rẽ bee ne karen-biig fãa yɛl sẽn yaa to-to. Zãmsg kẽer sẽn be Koe-noogã sebrã pʋgẽ la b wɛgs sõma Biiblã yetame sebrã pʋgẽ. Y sã n lebg n sõs zãms-kãens zutu, na n nafa karen-biisã kẽere.
11. Bõe yĩng tɩ d segd n tʋm ne seb-kãngã sõma?
11 Nebã pa wae n wʋmd koe-noog dũni-kãngã pʋgẽ ye. Rẽ n so tɩ d sẽn paam n wilgd nebã tɩ Wẽnnaam Rĩungã rɩta naam, la tɩ ka la bilfu a na n kɩtame tɩ namsg buud fãa sa la a lugl dũni-paalg tɩrlem sẽn na n zĩnd a pʋgẽ wã yaa zu-zẽkr bũmbu. (Mat. 24:14; 2 Pɩɛ. 3:13) Tõnd kɩsa sɩd tɩ neb wʋsg sẽn wʋmd koe-kãngã wã na n sak n deegame t’a Ezai sẽn yeel bũmb ningã yaa sɩda. A yeela woto: “Neb nins sẽn wat ne koe-noogã nao tara dasãnde. Bãmb kẽnda tãensã zut n moond laafɩ koɛɛga, la b togsd koe-noogo, la b moond fãagr koɛɛgã n yet Siõ nebã tɩ: ‘Yãmb Wẽnnaamã dɩta naam.’” (Ezai 52:7) Bɩ y tũnug ne seb-kãngã n sõng neb nins ko-yũud sẽn tarã tɩ b wʋm koe-noog ning sẽn yit Wẽnnaam nengẽ wã!
[Zĩ-gũbri, seb-neng a 5]
Zĩis nins nebã sẽn pa nong tɩ d gom Wẽnnaam bɩ Biiblã yellã:
● Tẽns kẽer pʋsẽ, koe-moondbã mikame tɩ b sã n pʋd gom-biis nins sẽn yaa “Wẽnnaam” bɩ “Biiblã,” nebã pa rat n kelg koɛɛgã ye. Sã n yaa woto yãmb babgẽ wã, y sã n wa seg ned pipi n na n sõs ne-a, bɩ y gom bũmb sẽn pak nebã fãa yelle. Wala makre, d sẽn dat goosneem sẽn yaa sõma wã, d sẽn dat sagls sẽn tõe n sõng zakã rãmbã, la d sẽn baood tɩ d beoog daarã yɩ neerã. Y sã n sõs ne ned n bãng t’a kɩsa sɩd tɩ Wẽnnaam beeme la t’a tara bas-yard ne Biiblã, y tõe n kãab-a-la Koe-noogã sebrã.
[Zĩ-gũbri, seb-neng a 6]
D sã n wa moond zak-zaka:
● “Tõnd kaagda nebã n na n sõng-b tɩ b bãng bũmb ning Wẽnnaam sẽn pʋlem ninsaalbã. Yãmb zoe n soka y meng Wẽnnaam sã n na n sɩd kɩtame tɩ namsg buud fãa sa ka la bilf bɩ? [Bas-y t’a leoke.] Seb-kãngã wilgda Biiblã zĩig ning y sẽn tõe n paamẽ sokrã leoore. [Kõ-y-yã-a sebrã, la y karem zãmsg a ye wã pipi sullã ne Zeremi 29:11.] Woto wã, pa zems tɩ y tags tɩ Wẽnnaam datame tɩ d beoog-daarã yɩ neer sɩdã? [Bas-y t’a leoke.] Y sã n data, y tõe n talla sebrã. M tõe n lebg n waame tɩ d sõs sull a yiib-n-soabã zugu, n bãng Wẽnnaam sẽn na n maan to-to tɩ namsg buud fãa sa.” Sã n mik tɩ kɛlgdã tara sẽka, y tõe n kell n sõsa sull a yi wã la vɛrse-rãmb nins b sẽn yeel tɩ b karma zugu. Rɩk-y sɛk n lebg n tɩ leok zãmsgã sokr ning sẽn pʋgdã.
● “Neb wʋsg nong n pʋʋsdame sẽn yɩɩd fãa b sã n wa tar zu-loeese. Yãmb me pʋʋsdame bɩ? [Bas-y t’a leoke.] Yãmb tagsdame tɩ Wẽnnaam kelgda pʋʋsg fãa bɩ, bɩ pʋʋsg n be sẽn pa tat a yam? [Bas-y t’a leoke.] Mam tara sebr sẽn wilgd Biiblã sẽn leokd sogs-kãensã to-to. [Kõ-y-yã-a sebrã, la y naag taab n sõs zãmsg 12 soabã pipi sullã zugu, la y karem Biiblã zĩig ning b sẽn yeel tɩ d karma.] Wẽnnaam sẽn kelgd pʋʋsgã pa noom yãmb sɩda? La sẽn na yɩl tɩ pʋʋsgã naf-yã, y segd n bãnga Wẽnnaam sõma. [Wilg-y-yã zãmsg a yiib-n-soabã ne a gom-zu-bõonesã.] Y sã n data, m tõe n kõ-y-la sebrã tɩ nindaar bɩ d naag taab n ges Biiblã sẽn leokd sogs-kãensã to-to.”
● “Nebã wʋsg tagsda dũni-kãng sẽn na n baas to-to wã yelle. Yãmb tagsdame tɩ d tõe n tẽe manegr bɩ? [Bas-y t’a leoke.] Neb wʋsg sã n bãng tɩ koe-nood n be Biiblã pʋgẽ sẽn kɩtd tɩ d tẽed manegre, lingd-b lame. Ad sogsg kẽer seb-kãngã sẽn leokde.” Kõ-y-yã-a sebrã la y yeel-a t’a ges yaoolem seb-nengã n yãk sokr ning sẽn pak-a n yɩɩda. Dẽ poor bɩ y lak zĩig ning sẽn leokd a sokrã, la y wilg-a Biibl zãmsg sẽn maand to-to. Rɩk-y sɛk n lebg n tɩ leok zãmsgã sokr ning sẽn pʋgdã.
[Zĩ-gũbri, seb-neng a 7]
Kãab-y Biibl zãmsg y pipi sõsgã sasa:
● “D bee yãmb sakã pʋgẽ n wilgd nebã b sẽn tõe n zãms Biiblã to-to. Seb-kãngã tara zãmsg 15 sẽn tõe n sõng yãmb tɩ y yã sogs kẽer sẽn tar yõod leoor yãmb mengã Biibl pʋgẽ. [Wilg-y-yã pipi la yaoolem seb-nensã.] Yãmb zoe n makame n na n bao n wʋm Biiblã võor bɩ? [Bas-y t’a leoke.] Ges-y d sẽn tõe n tall sebrã n zãms Biiblã nana-nana to-to. [Lak-y zãmsg a 3 soabã zĩigẽ, n sõs sokr a 3 soabã pipi sullã zugu, la y karem Wilgr 21:4, 5. Sẽk sã n beẽ, bɩ y sõs sull ning sẽn pʋgdã zugu, la y karem vɛrse-rãmb nins b sẽn yeel tɩ d karma.] Y sã n data, m tõe n basa sebrã ne-yã. D nongẽ lame tɩ y mak Biiblã zãmsg baa yaa vugr n gese, tɩ sã n yɩ y noog bɩ d kell n kẽng taoor ne zãmsgã. Nindaare, d tõe n sõsa pipi zãmsgã zugu. Zãmsgã yaa seb-neng a ye bala.”
[Zĩ-gũbri, seb-neng a 7]
Modg-y n bas-y sebrã lebg-n-ges sasa:
● Y sã n lebg n na n tɩ ges ned sẽn wilg t’a rat n bãng n paasame, bɩ y yeel woto: “M sũur nooma wʋsg m sẽn leb n yã yãmba. M zãa sebr n na n wa kõ-yã. Yaa sebr sẽn wilgd Biiblã sẽn leokd sogsg wʋsg sẽn tar yõodo. [Kõ-y-yã-a sebrã la y kos-a t’a ges yaoolem seb-nengã.] Zãmsg bʋg n noom yãmb n yɩɩda? [Bas-y t’a leoke, tɩ rẽ poor bɩ y lak zãmsg ning a sẽn yãkã zĩigẽ.] Ges-y seb-kãngã sẽn tõe n sõng-d tɩ d bãng Biiblã sẽn leokd sokrã to-to.” Sõs-y sull a ye bɩ a yiib zug la y karem vɛrse-rãmb nins b sẽn yeel tɩ d karma, n wilg-a Biibl zãmsg sẽn maand to-to. Zoe n yaa Biibl zãmsg la y sẽn sɩngã. Kõ-y-yã-a sebrã la y rɩk sɛk n lebg n wa nindaare. Y sã n sa zãmsgã, bɩ y lebg n sõs zãmsg a to a sẽn yãk zugu, wall sebrã pipi zãmsgã zugu.