Seb-paal d sẽn na n kãab nebã!
1. Seb-bʋg la d na n kãab nebã sɩpaolg kiuugã, la bõe yĩng tɩ b yiis seb-kãngã?
1 Yʋʋmd 2009 rasem a tãab tigis-kãseng gom-zug sẽn yɩ “Bɩ y gũ!” wã sasa, d paama seb-bil gom-zug sẽn yet tɩ La Bible — Quel est son message ? Sɩpaolg kiuugã, tigimsã fãa na n kãaba nebã seb-kãngã dũniyã gill zugu. Wãn to la seb-kãngã na n naf nebã? Neb wʋsg pa mi Biiblã sõma ye. Sẽn yɩɩd fãa neb nins sẽn pa kiris-nebã. Rẽ n so tɩ sebrã neng a 3 pʋgẽ, b yeel tɩ b yiisa sebrã n na n wilg bũmb ning sẽn be Biiblã pʋgẽ wã koɛɛg-koɛɛga.
2. Wãn to la d tõe n kãab ned seb-bilã?
2 D sẽn tõe n kãab sebrã to-to: D tõe n yeela woto: “M nongẽ lame n bãng yãmb tagsg bũmb ning b sẽn yeel ka wã zugu. [Karm-y 2 Tɩmote 3:16.] Neb wʋsg sak n deegame tɩ gom-kãensã yaa sɩda. La yãmb yẽ? [Bas-y t’a leoke.] Tõnd tũudmã sẽn yaa a soab fãa, tara yõod tɩ d bao n bãng Biiblã sẽn yet bũmb ningã d toore. [Karm-y seb-neng a 3 pipi sullã.] Yãmb sã n karem seb-kãngã sẽn yaa Biiblã tõr kʋmsgã, y na n yãame tɩ Biiblã tara gom-zug a ye la koɛɛg sẽn yaa takɩ.”
3. Bõe me la d tõe n yeele, sẽn yɩɩd fãa a soabã sã n pa kiris-neda?
3 Ad bũmb a to me d sẽn tõe n yeele, sẽn yɩɩd fãa a soabã sã n pa kiris-neda: “M nongẽ lame n bãng yãmb tagsg Wẽnnaam Gomdã (bɩ Sebr Sõngã) sẽn yet bũmb ning ka wã zugu. [Karm-y Yɩɩl Sõamyã 37:11.] Yãmb tagsdame tɩ gom-kãensã sã n wa pidsi, vɩɩmã na n yɩɩ wãn-wãn tẽngã zugu? [Bas-y t’a leoke.] Woto yaa bũmb nins Wẽnnaam sẽn kãab nebã buud fãa wã bilf bala.” Karm-y seb-neng a 3 pipi sullã, la y kõ-a sebrã.
4. Wãn to la d tõe n tũnug ne sebrã n sɩng Biibl zãmsg ne neda?
4 Sɩng-y Biibl zãmsg ne nebã: D sã n lebg n na n tɩ ges ned sẽn deeg sebrã, d tõe n tẽeg-a-la bũmb ning yell d sẽn da gomã, n lak babg ning sẽn gomd rẽ yellã, n tik sogsg nins sẽn be a baasgẽ wã n sõs sull a ye bɩ a yiib zugu. Sã n mik tɩ d ratame n tol n sɩng zãmsgã Biiblã yetame sebrã pʋgẽ, d tõe n karma sẽn be seb-bilã poorã, la d kõ-a Biiblã yetame sebrã, n kos-a t’a wilg sak ning sẽn noom yẽ. A sã n yãke, bɩ d naag taab n karem sull a ye bɩ a yiibu. Sɩpaolg kiuugã, bɩ d fãa modg n kãab nebã seb-bilã!