D yãka wakat takɩ n na n pʋɩ seb-bi-paallã wʋsgo
1 Yɛl nins sẽn maand dũniyã zug rũndã-rũndã wã sãamda neb wʋsg sũyã, la neb sõor bilf bal n mi bũmb ning sẽn kɩt tɩ yel-kãens beẽ wã, bũmb ning sẽn wate, la b sẽn segd n maan to-to n paam fãagr bʋ-kaoor ning sẽn watã sasa. (Eze. 9:4) Sẽn na yɩl n sõng-b tɩ b wʋm tõnd wakatã yɛl võore, sig-noy kiuug rasem 16 tẽne wã tɛk n tãag sigr kiuug rasem 12 hatã, d na n pʋɩya Ket-y n gũusdẽ! seb-bilã zĩig zãnga.
2 D tõe n kãaba seb-bilã d sẽn wat n moond zak-zakã, d sã n lebg n tɩ kaagd nebã, koe-mooneg sẽn pa yãk wakatã sasa wall d sã n wa moond koosmã zĩisẽ. La d pa segd n pʋɩ Ket-y n gũusdẽ! seb-bilã yaar ye. D na n kõ-a-la neb nins bal sẽn na n wilg tɩ b sɩd rat n bãnga Biiblã sẽn yet bũmb ning dũniyã yɛl võor wɛɛngẽ wã. D tõe n kõo neb nins sẽn pa wilgd tɩ b rat n bãnga koɛɛgã sõma wã seb-vãoogo.
3 Y tõe n yeela woto n paam tɩ ned kelg-yã:
◼ “Yel-beed la zu-loe-kãsems nins sẽn wae zĩig zãnga namsda neb wʋsgo. [Tẽeg-y yell nebã sẽn mi yãmb babgẽ wã.] Rẽ yĩnga yãmb miime tɩ b ra reng n goma bõn-kãensã yell Biiblã pʋgẽ bɩ? [Bas-y t’a leoke. Rẽ poor bɩ y karem verse nins b sẽn sõdgã sʋk a ye sẽn zemse, wala Matɩe 24:3, 7, 8; Luk 21:7, 10, 11; 2 Tɩmote 3:1-5.] Biiblã wilgda tõnd sẽn vɩ wakat ningã la bũmb ning sẽn gũud ãdem-biisã vẽenega. Yãmb rat n bãnga rẽ n paas bɩ? [Bas-y t’a soabã leoke. A soabã sã n sɩd kelga sõma bɩ y kãab-a seb-bilã.] Tõnd pa koosd seb-bilã ye, la y sã n dat n kõ ligd bilf n teel d tʋʋmdã d sẽn tʋmd dũniyã gill zugã, yɩt-d-la noogo.”
4 Y leb n tõe n yeela woto n kɩt tɩ b kelg-yã:
◼ “Rũndã-rũndã, neb wʋsg sũy sãama yel-beed sẽn maan dũniyã zug bɩ sẽn paam bãmb mensã yĩnga. Kẽer sokda b mens n dat n bãng bõe yĩng tɩ Wẽnnaam pa gɩdg yel-kãense. Biiblã kõt-d-la bas-m-yam tɩ Wẽnnaam na n kẽesa a toog ka la bilf n kɩt tɩ ãdem-biisã namsg sa. Ges-y bõn-sõma nins Wẽnnaam sẽn na n maan tɩ naf ãdem-biisã. [Karm-y Yɩɩl Sõamyã 37:10, 11.] Rẽ yĩnga y tʋll n bãngame n paas bɩ?” Y sõsgã baasgẽ bɩ y wilg a soabã t’a tõe n kõo yamleoog kũuni.
5 Bao-y n bãng-y ned ninga fãa sẽn sak n deeg seb-bilã yʋʋr la a adɛrse, la y wa modg n lebg n tɩ gʋʋl a soabã ratem. B na n wa wilga d sẽn tõe n maan dẽ to-to, yʋʋmd 2005 sigr kiuug Rĩungã Tʋʋmd sebrẽ. Y pipi kẽngrã bala, ned sã n wilg t’a tʋll n bãnga ne a sũur fãa, y tõe n talla Ket-y n gũusdẽ! seb-bilã bɩ sebr a to, wala makre Baood seb-bilã, n sɩng Biiblã zãmsg ne a soabã zĩig pʋgẽ.
6 Y na n paama seb-bilã b sẽn na n wɛgs sõs-kãngã tʋʋmd tigisg ningã poore. B sagenda koe-moondbã ne so-pakdbã tɩ b reeg sɛb sõor sẽn na n sek seb-bilã pʋɩɩb sɩngr pipi rayã pʋsẽ bala. Bɩ y a Zeova ning tʋʋm kãngã sẽn yaa toor zallã barka, tɩ pẽg a yʋʋrã la naf pʋ-peelem dãmbã zĩig fãa.—Yɩɩl 90:17.