Yãmb sogsgã leoore

◼ Saam-bi-poak sã n na n tɩ zãms ned Biiblã zak noor tɩ saam-biig yãag-a, saam-bi-poakã segd n pila a zug bɩ?

Saam-bi-poak sã n na n tɩ zãms ned Biiblã tɩ saam-biig yãag-a, saam-bi-poakã segd n pila a zugu. (1 Kor. 11:3-10) Kell-y n pa-y “Wẽnnaam nonglmã pʋgẽ” sebrã neng 210 sull a 1 wã yeela woto: “Wakat ninga, rao sẽn deeg lisg tõe n tũu pag n kẽng a Biibl zãmsg tɩ yaa pagã n na n lʋɩ taoore. . . . Sẽn mik t’a maanda bũmb rao sẽn da segd n maanã yĩnga, a segd n pila a zugu.” Yaa zak noor wall zak pʋgẽ, pa rẽ bɩ zĩig a to la saam-bi-poakã zãmsd ned Biiblã tɩ rao sẽn yaa koe-moond yãag-a, a segd n pila a zugu.

La saam-bi-poakã tõe n kẽngame n na n tɩ kaag ned t’a soabã reeg-a a zakã noore. Baa koe-moond sẽn yaa rao sã n yãag-a, a sẽn kaagd ned ningã sẽn nan pa Biibl karen-biigã, pa tɩlae tɩ saam-bi-poakã pil a zug ye. A sã n kẽngame n na n tɩ wilg tõnd sẽn zãmsd Biiblã ne nebã to-to, wall n na n tik sebr a ye d sẽn tar n zãmsd Biiblã ne nebã zug n sõse, pa tɩlae t’a pil a zug ye. Sẽn mik tɩ yaa bilf-bilf la ned sẽn yit n yalsd a zak noor tɩ d sõsd ne-a Biiblã zug wat n lebg Biibl karen-biigã, koe-moondbã segd n gũusame n bãng wakat ning saam-bi-poak sẽn segd n pil a zugu.