D zãms Adorez Dieu sebrã

B yãka Adorez le seul vrai Dieu sebrã t’a yaa sebr d sẽn segd n zãms ne nin-paals nins sẽn zãms Bãngr sebrã n baasã. Tõnd sã n zãms seb-kãngã tigingã sebr zãmsgẽ, na n segl-d lame tɩ d tʋm ne-a sõma koe-moonegã pʋgẽ, la leb n paas tõnd nonglmã la d mi-beoogã ne a Zeova la ne a siglgã. Wãn to la d tõe n dɩ Adorez Dieu sebrã zãmsg nafa tɩ pidi?

Zãmsgã taoor-lʋɩt sẽn segd n maane: Sẽn yaa sak a ye tõr la d na n zãmsd semen fãa wã yĩngã, sebrã zãmsg yel-gɛtb segd n pʋɩɩ wakatã ne yam tɩ zemse. B ka na n sõs n kaoos pipi sulã zut ye, sẽn na yɩl n wa paam sẽk n sõs saka sul a taabã sẽn tar yõod n yɩɩdã sẽn be taoorã zutu. Koɛɛg-koɛɛg bala, y sã n sõs lebg-n-ges zĩ-gũbrã sẽn be sak fãa baasgẽ wã zugu, na n sõnga nebã tɩ b tẽeg zãmsgã tags-kãsemse.

Adorez Dieu sebrã sags fãa pʋɩ-sʋk la bal tara sogsg b sẽn ning be, sẽn na yɩl tɩ d bʋgs la d sõs b zutu. D tõe n dɩka makr ne sẽn be seb-nens 48-9 wã. Pa tɩlae tɩ karemdã naag sulã ne sogs-kãens n karem me ye. Yel-gɛtã sã n wa maand zĩ-kãens ne sullã neba, sẽk sã n beẽ a segd n kɩtame tɩ b karem verse rãmbã b sẽn sõdgã la b sõs b zutu.

Reng-y n segl pĩnda: Seglg sẽn yaa sõma pa f sẽn na n dẽes leoorã bal ye. D sã n bʋgs verse nins b sẽn sõdgã zut neere, na n sõng-d lame tɩ d segl d leoorã, la pa rẽ bal ye, sẽn yɩɩd fãa na n sõngd-d lame tɩ d segl d sũyã. (Ɛs. 7:10) Tõnd fãa tõe n sõngame n keng taab raoodo, n kõt d leoorã n ka baoodẽ n na n soog goamã d yembr ye.—Rom 1:11, 12.

Adorez Dieu sebrã zãmsg na n sõnga tõnd tɩ d pẽneg a Zeova, a leb n na n segl-d lame tɩ d sõng pʋ-peelem dãmbã tɩ b wa naag-d n balm-a. (Yɩɩl 95:6; Zak 4:8) Bɩ d fãa rɩ Adorez Dieu sebrã zãmsg nafa tɩ pidi.