“Mam na n yɩɩ wãn n bãng tɩ ned ka wilg maam?”

¹ Evãnzill moond a Filip sẽn sʋk Etiopi enikã n na n bãng a sã n da wʋmda bũmb ning a sẽn da karemd Wẽnnaam Gomdã pʋgẽ wã võorã, rao wã leokame: “Mam na n yɩɩ wãn n bãng tɩ ned ka wilg maam?” Ne sũ-noogo, a Filip sõng-a lame t’a wʋm koe-noogã a Zezi wɛɛngẽ wã võore, tɩ rẽ baas ne rao wã lisg reegr zĩig pʋgẽ. (Tʋʋ. 8:26-38) A Filip ra sakda tʋntʋmd ning a Zezi sẽn kõ tɩ b ‘maan buud fãa neb tɩ b yɩ karen-biis n lis bãmb la b zãms bãmbã.’—Mat. 28:19, 20.

² Wala a Filip sẽn maanã, tõnd me tog n saka tʋntʋmd ning a Zezi sẽn kõ tɩ b maan karen-biisã. Baasg zãngã, Etiopi enikã sẽn bɩ tẽebã wɛɛngẽ ne tʋʋlem ningã, naoor wʋsgo tõnd ka yãt tɩ yaa woto ne neb nins tõnd sẽn zãmsd Biiblã ne wã ye. Rao wã sẽn yaa ned sẽn tuub n lebg Zʋɩfã ra mii Gʋlsg Sõamyã sõma la a tar sũ-sõngo. A sẽn da baood bal yaa sak t’a Zezi yaa Mesi ning b sẽn kãabã. Yaa tʋʋm-toog menga, sã n mik tɩ b rãmb nins tõnd sẽn zãmsd ne wã ka mi Biiblã sõma, sã n mik tɩ ziri tũudmã zãmsg kẽes-b-la weoogo, bɩ b mengã zu-loees sẽn ka nana wã yaa zɩɩb ne-ba. Bõe n na n sõng tõnd tɩ d tõog tɩ Biibl karen-biisã wa rɩk b mens n kõ n deeg lisgu?

³ Bãng-y Biibl karen-biigã tẽeb ratem sẽn ya a soab n welge: Yʋʋmd 1998 sa-sik kiuugã D Rĩungã Ministɛɛrã seb-paasdem goma wakat ning d sẽn tog n dɩk n zãms ne ned Baood seb-bilã la Bãngr sebrã pʋsẽ woglem yelle. A ra kõo sor-wilgr kãngã: “Yaa tɩlae tɩ d sɩf zãmsgã tʋʋlem tɩ zems ne karen-biigã yɛl sẽn yaa to-to la a tõodo. . . . Sẽn ya a soab fãa d ka rat n maan tɩ karen-biigã ka paam võor-wʋmb sẽn yaa vẽeneg d sẽn dat tɩ zãmsgã kẽng tʋʋlgã yĩng ye. Karen-biig fãa segd n talla yẽbgr sẽn yaa kãn-kãe a tẽeb ne Wẽnnaam Gomdã a sẽn paam paalmã pʋgẽ.” Woto yĩnga, bɩ y ra maan zãmsgã yãg-yãg Bãngr sebrã pʋgẽ n makd n dat n zãms-a n sa kiis a yoob pʋgẽ ye. Tõeeme tɩ yaa tɩlae tɩ b rɩk wakat sẽn yɩɩd kiis a yoob hal wʋsg sẽn na yɩl n sõng neb kẽer tɩ b bɩ n ta lisg zĩigẽ. Wakat ning y sẽn maand zãmsgã semen ne a to wã, rɩk-y sẽk ning fãa sẽn yaa tɩlae wã sẽn na yɩl n sõng karen-biigã t’a wʋm bũmb ning a sẽn zãmsd Wẽnnaam Gomdã pʋgẽ wã võor la a sak-a. Wakat kẽere, tõe n yaa tɩlae tɩ y rɩk semen a yiib bɩ a tãab sẽn na yɩl n zãms Bãngr sebrã sak a yembr n sa. Rẽ na n kõ-y-la sẽk tɩ y karem la y kõ vẽnegr verse rãmbã b sẽn sõdgã wʋsg zutu.—Rom 12:2.

⁴ Baasg zãnga, yaa wãn to yẽ, yãmb sã n baas Bãngr sebrã n mik tɩ karen-biigã sẽn wʋmd sɩdã võor to-to wã pa seke, bɩ a sũurã nan ka tusd-a zãng-zãng t’a rɩk sard n sak sɩdã la a rɩk a vɩɩmã n kõ Wẽnnaam? (1 Kor. 14:20) Bõe la yãmb tõe n maan yɛs sẽn na yɩl n tees-a sor ning sẽn tar n debd vɩɩmẽ wã zugu?—Mat. 7:14.

⁵ Pids-y Biibl zãmsdã tẽeb ratem: Sã n yaa vẽeneg tɩ neda bɩta tẽebã wɛɛngẽ, baa yaa maasg-maasga, la t’a nanda bũmb ning a sẽn zãmsdã, dẽ bɩ y kẽng taoor ne Biiblã zãmsg sebr a yiib soab pʋgẽ, Baood seb-bilã ne Bãngr sebrã baasg poore. Tõe tɩ pa wakat fãa la woto yaa tɩlae ye, la sã n segd n yɩ woto, bɩ y kẽng taoor ne zãmsgã Paix véritable sebrã, Unis dans le culte sebrã, bɩ Parole de Dieu sebrã pʋgẽ. Tigingã sã n ka tar seb-kãensã, koe-moondb wʋsg sẽn yɩɩd tara seb-kãensã n tõe n dɩk-b n tʋme. Yaa Parole de Dieu sebrã bal la b tõe n tũnug ne Demande de publications formilɛɛrã (S-14) n kose. Sẽn ya a soab fãa, b segd n denga nand n zãms Baood seb-bilã ne Bãngr sebrã. B segd n sõda Biibl zãmsgã, lebg-n-tɩ-ges rãmbã, la wakat ning b sẽn dɩk n kẽng taoor ne zãmsgã n ning rapoorã pʋgẽ. B tõe n kell n maana woto, baa karen-biigã sã n deega lisg tɩ sebr a yiib soabã zãmsg ka sa.

⁶ Woto rat n yeelame tɩ b rãmb nins sẽn deeg lisg paalem la sẽn zãms sebr a yembr balã segda masã n le paam sõngr sẽn na yɩl n zãms sebr a yiib soabã bɩ? Ka tɩlae ye. Baasg zãnga, tõe tɩ b lebga neb sẽn le ka moonda bɩ tõeeme tɩ b ka bɩt tẽebã wɛɛngẽ, n tagsdẽ tɩ b rata sõngr sẽn na yɩl n tũ sɩdã sõma n yɩɩd b vɩɩmã pʋgẽ. B segdame n yã tʋʋmdã yel-gɛt n yaool n lebs n sɩng zãmsg ne koe-moond sẽn deeg lisgu. Baasgo, yãmb sã n mi neb kẽer sẽn zãms Bãngr sebrã pĩnd n da ka tol n bɩ n ta rɩk-m-meng-n-kõ la lisg zĩigẽ, y tõeeme n yãk yam n ges b sã n na n tʋllame n lebs n sɩng b Biibl zãmsgã.

⁷ Yaa kiris-neb nonglmã bãnde, d sã n get neb nins fãa sẽn wilgd ratem tɩ tõnd zãmsd ne wã yell neere. Tõnd bõn-datlã yaa sõng Biibl karen-biigã t’a tõog n paam Wẽnnaam Gomdã sɩd bãngr sẽn yaa kãseng n yɩɩda. Dẽ a na n tõogame n dɩk sard vẽeneg sẽn yẽbg bãngr zug n sak sɩdã la a rɩk a vɩɩmã n kõ a Zeova, n mak rẽ ne koom lisgu.—Yɩɩl 40:9; Ef. 3:17-19.

⁸ Etiopi enikã sẽn deeg lisgã poorã, yãmb tẽra bũmb ning sẽn maan bɩ? “A leb n dɩka a sor ne sũ-noogo,” wala a Zezi Kirist karen-bi-paalga. (Tʋʋ. 8:39, 40) Bɩ tõndo, la b rãmb nins tõnd sẽn tõogd n teesd sɩdã sor zugã paam sũ-no-kãseng Wẽnnaam a Zeova sõgenega pʋgẽ, masã la wakat sẽn pa sat pʋgẽ!