Biiblã yetame wã yaa sebr d sẽn na n tar n zãmsd nebã Biiblã
1 D rasem a tãab tigis-kãsengã gom-zug sẽn yɩ “Wẽnnaam sakrã” sasa, d sũy sɩd yɩɩ noog d sẽn paam sebr t’a gom-zugã yaa Biiblã sɩd yetame tɩ bõe wã. Tigis-kãsengã wat-b sũy yɩɩ noogo, b ned kam fãa sẽn paam sebrã yĩnga. Wãn-wãn la d na n tall seb-paal-kãngã n tʋme? B maan-a-la sẽn na yɩl n tɩ d tall-a n zãms nebã Biiblã. Baa ne d sẽn na n sɩng-a zãma wã kãabg tʋʋlg kiuugã pʋg balã, b sagenda koe-moondbã tɩ b tall-a n sɩng Biiblã zãmsg ne nebã masã tɛka.
2 Ne neb nins d sẽn zoe n zãmsd Biiblã: Koe-moondb nins sẽn zoe n zãmsd Biiblã ne neb Bãngr sebrã wall Baood seb-bilã pʋgẽ wã segd n bãnga wakat ning b sẽn na n kẽng taoor ne b zãmsgã seb-paallã pʋgẽ, la b sẽn na n maan dẽ to-to. D sã n sɩnga zãmsgã sẽn nan pa kaoose, d tõe n lebs n sɩng-a-la ne Biiblã yetame wã pipi sakã. Sã n mik tɩ d ra zoe n zãmsa Bãngr sebrã n zãage, d tõe n gesa seb-paallã sak ning sẽn zems ne Bãngr sebrã zãmsg ning d sẽn vaeesdã n sãag ne zãmsgã seb-paallã pʋgẽ. La d sã n da kolga Bãngr sebrã baasgo, d tõe n yãka yam n baas-a.
3 Sãmbg sẽn ka be, d fãa mii neb wʋsg seb-paallã zãmsg sẽn na n nafe. D segd n tika sebrã zãmsg sẽn pʋg taab to-to wã n kãab b ned kam fãa Biiblã zãmsgo. Wala makre, neb nins sẽn zoe n zãms Baood seb-bilã wall Bãngr sebrã n yaool n nan pa bɩ n ta lisgã tõe n dat n lebs n sɩnga zãmsgã seb-paallã pʋgẽ. Roagdbã tõe n yãka yam n tall-a n zãms b kambã tɩ b bãng Wẽnnaam daabã takɩ.—Kol. 1:9, 10.
4 Sebr a yiib-n-soabã zãmsgo: Biiblã karen-biig sã n zãms Biiblã sɩd yetame tɩ bõe wã n sa, sebr a to bee a sẽn tõe n zãms n paas bɩ? N-ye. Biiblã karen-biig sã n bɩt baa yaa bilf-bilf la a nong bũmb nins a sẽn zãmsdã, b tõe n dɩka Balm-y sɩd Wẽnnaam yɛngã n zãms-a n paase. D kɩsa sɩd tɩ seb-paallã na n sõng-d-la d karen-biisã maaneg tʋʋmd pʋgẽ wʋsgo.—Mat. 28:19, 20.