Yãmb sogsgã leoore

◼ Seb-bʋs la d segd n tall n zãms nebã Biiblã?

Yaa Biiblã yetame sebrã la d tar n zãmsd nebã Biiblã. Yaa sɩd tɩ pa wẽng tɩ d tall sebr a to wala seb-vãadã n sɩng Biiblã zãmsg ne ned ye. La d sã n sɩng Biiblã zãmsg ne ned sebr a to pʋgẽ, d segd n basa seb-kãng la d zãms a soabã Biiblã yetame sebrã n da bas tɩ kaoos ye. Bala b talla Biiblã yetame sebrã n zãms neb tɩ wom bi-sõma.

D sã n zãms ned Biiblã yetame sebrã zãng n sa t’a tũud bũmb ning a sẽn zãmsa, d segd n zãms-a-la Balm-y Wẽnnaam sebrã. (Kol. 2:7) B wilga bũmb ning sẽn kɩt tɩ b segl seb-kãngã a neng a 2 pʋgẽ. Be b yeta woto: “Biiblã sagenda neb nins fãa sẽn nong Wẽnnaamã tɩ b ‘bãng’ sɩd kãens sẽn tar yõod wʋsgã ‘yalem la b woglem la b zulum.’ (Efɛɛz rãmba 3:18) B segla seb-kãngã rẽ yĩnga. D tẽedame t’a na n sõng-y lame tɩ y bɩ tẽebã pʋgẽ la a segl-y sõma n paas tɩ y kẽn so-sẽk ning sẽn tar n debd vɩɩmã zĩigẽ Wẽnnaam dũni paalgã sẽn yaa tɩrgã pʋgẽ.”

A soabã sã n deeg lisg tɩ y ket n nan pa zãms sɛb a yiibã fãa n sa, y segd n modgame n kell n baase. La baa ne a soabã sẽn deeg lisgã, ned ning sẽn zãmsd sebrã ne-a wã tõe n gʋlsa lɛɛr dãmbã, a sẽn lebgd n tʋgd n get-a wã, la Biibl zãmsgo, a rapoorã zugu. Ned ning sẽn na n tũ-a n kẽnga me tõe n gʋlsa lɛɛr dãmbã.