D sẽn tõe n tall “ Amour de Dieu ” sebrã n zãms ned Biiblã to-to
1. B yiisa “ Amour de Dieu ” sebrã bõe yĩnga?
1 D sũy sɩd yɩɩ noog wʋsgo, d sẽn wa n paam “ Gardez-vous dans l’amour de Dieu ” sebrã d rasem a tãab tigis-kãsengã gom-zug sẽn yɩ ‘Wẽnnaam vʋʋsem sõngã wilgda tõnd sorã’ sasa wã. Wa b sẽn togs baraarã, b yiisa seb-kãngã n na n sõng-d tɩ d bãng a Zeova noyã sõma, la d nong-ba. B pa yiis-a n na n sõng-d tɩ d bãng Biiblã zãms-kãsems ye. D pa na n kãab seb-kãngã zak ne zak moonegã sasa ye.
2. Wãn to la d na n tʋm ne seb-kãngã, la ãnd rãmb la d na n tall-a n sõnge?
2 Masã tɛka, yaa seb-kãngã n na n lebg sebr a yiib-n-soab d sẽn na n zãmsd neb nins sẽn zãms Biiblã yetame sebrã n sa wã. Tẽeg-y tɩ nebã yɛl pa yembr ye. Karen-biig fãa sẽn zãmsd Biiblã la a tũud a noyã n bɩt to-to wã yaa toor ne a to rẽnda. D segd n maana zãmsgã tɩ zems ne karen-biigã yɛl sẽn yaa to-to. Y segd n kɩtame t’a wʋm y sẽn zãmsd-a bũmb ningã võor sõma. D pa segd n tall seb-kãngã n sɩng Biiblã zãmsg ne ned sẽn zoe n zãms tõnd sɛb a taabã, n yaool n pa kẽnd tigissã, la a pa rat n toeem a vɩɩmã n tũ bũmb nins b sẽn zãms-a wã ye.
3. D sã n zãmsda ned Biiblã ne Balm-y Wẽnnaam sebrã, bõe la d segd n maane?
3 Y sã n da zãmsda ned Biiblã ne Balm-y Wẽnnaam sebrã tɩ ket sags a wãn tɩ y baase, y sã n data, y tõe n baas-a lame la y sagl karen-biigã t’a karem “ Amour de Dieu ” sebrã a toore. La sã n mik tɩ zãmsgã nan pa zãag zĩiga, yɩta sõma tɩ y bas seb-kãng la y rɩk seb-paallã n sɩng zãmsgã ne a pipi sakã. Wa d sẽn minim n maand ne Biiblã yetame sebrã, yaa tõnd n get d sã n segd n vaeesa vẽnegr nins sẽn be sebrã baasgẽ wã ne karen-biigã.
4. Karen-biig sã n pa baas Biiblã yetame sebrã la “ Amour de Dieu ” sebrã zãmsg n yaool n deeg lisgu, bõe la y segd n maane?
4 La karen-biig sã n deeg lisg t’a nan pa baas Biiblã yetame sebrã la “ Amour de Dieu ” sebrã zãmsgo, a lisgã poore, a segd n baasa seb-kãensã. Baa a lisgã poore, y ket n tõe n gʋlsda Biibl zãmsgã ne lebg-n-tɩ-gesã y rapoorã zugu. Koe-moond sã n yãag-y lame, yẽ me tõe n sõda lɛɛrã a rapoorã zugu.
5. Wãn to la d tõe n tall “ Amour de Dieu ” sebrã n sõng koe-moondb nins sẽn bas koɛɛgã moonegã?
5 Kãsem dãmbã sã n wa yãk-y tɩ y zãms Biiblã ne koe-moond sẽn bas koɛɛgã moonego, b tõe n yãka sõss takɩ y sẽn segd n vaees ne a soabã “ Amour de Dieu ” sebrã pʋgẽ n kõ-yã. La y pa segd n zãms ne a soabã n kaoos ye. Ad seb-kãngã b sẽn nan yiisã sɩd na n sõng-d lame tɩ d kell n pa ‘Wẽnnaam nonglmã pʋgẽ’!—Ziid 21.