Babg 12 soaba: D sẽn na n zãms nebã Biiblã to-to tɩ b bɩ tẽebã pʋgẽ
D sõng karen-biisã tɩ b sɩng Biiblã zãmsg ne neba
1 Tõnd Biiblã karen-biis sã n wa sɩng koe-moonegã yiibu, b tõe n yaeesdame tɩ b pa na n tõog n sɩng Biiblã zãmsg ne nebã ye. Wãn-wãn la d tõe n sõng-b tɩ b kɩs sɩd tɩ b tõe n pidsa koe-moonegã nen-kãngã sẽn tar yõod wʋsgã? —Mat. 24:14; 28:19, 20.
2 Biiblã karen-biig sã n wa sek a na lebg koe-moond sẽn pa reeg lisgu, a tog n zoe n maanda Wẽnnaam tʋʋmdã lekolle. Zãmsg ning a sẽn paamd beenẽ a sẽn segend a sõssã la a wɛgsd-bã na n sõng-a lame t’a bɩɩs karen-saamd tõod nins sẽn na n sõng-a t’a ‘yɩ tʋm-tʋmd sẽn kõn zoe yãnde, la sẽn togsd sɩd koɛɛga tɩrg bala.’—2 Tɩm. 2:15.
3 Zãms-y-b ne mak-sõng ning y sẽn kõtã: A Zezi segla a karen-biisã b tʋʋmdã yĩnga, a sẽn kõ-b sagls sẽn yaa vẽenese, la a kõ-b mak-sõngã. A yeelame: “Karen-biig sã n zãms tɩ seke, a na n yɩɩ wa a karen-saamba.” (Luk 6:40) Y sẽn dɩkd a Zezi togs-n-taar n kõt mak-sõng y koe-moonegã pʋgẽ wã tara yõod wʋsgo. Karen-biigã sã n get makr ning y sẽn kõt koe-moonegã pʋgẽ wã, a na n bãngame tɩ y sẽn lebgd n tʋgd n kaagd nebã yaa sẽn na yɩl n sɩng Biiblã zãmsg ne-ba.
4 Wilg-y karen-biigã tɩ d sã n kãab ned Biiblã zãmsgo, pa tɩlae tɩ d wilg a soab d sẽn zãmsd Biiblã ne nebã to-to ball-ball ye. Naoor wʋsgo, d sã n tik Biiblã zãmsg sɛbã sull a ye bɩ a yiib zut n wilg d sẽn maand rẽ to-to wã bala, sekame. Sagls sẽn wilgd d sẽn tõe n maan rẽ to-to bee seb-kãngã seb-neng a 8 wã, la yʋʋmd 2002 yʋʋm-vẽkr kiuug Rĩungã Tʋʋmd seb-neng a 6.
5 Sã n zemsame bɩ y kɩt tɩ karen-biigã yãag yãmb mengã wall koe-moond a to sẽn tar minim tɩ b tɩ zãms neb Biiblã. A tõe n kõo leoor sull zugu wall verse sẽn tar yõod sullã pʋgẽ zugu. Rẽ, karen-biigã sã n gũusd n getẽ, a na n bãnga b sẽn zãmsd Biiblã ne nebã to-to wã sõma. (Yel. 27:17; 2 Tɩm. 2:2) Pẽg-y-yã la a y wilg-a a sẽn tõe n maan sõma n paas to-to.
6 D sã n sõng sẽn nan sɩngd-b koɛɛgã moonegã tɩ b lebg Wẽnnaam Gomdã karen-saam dãmba, na n segl-b lame tɩ b tõog n maan ‘tʋʋm sõng’ ning sẽn yaa sɩng Biiblã zãmsg ne nebã. (2 Tɩm. 3:17) Sɩd kõta sũ-noogo, d sã n naagd-b n boond nebã ne nonglem n yet-b tɩ: “Ned ninga sẽn dat-a, bɩ a reeg vɩɩm koom zaalem.”—Wil. 22:17.