D sẽn na n segl la d maan Biibl zãmsg ne neb to-to

1. A Zezi kõo a karen-biisã noor tɩ b moon koe-noogã n ‘maan neba tɩ b yɩ karen-biisi.’ (Mat. 24:14; 28:19, 20) Yaa d sẽn na n zãmsd Biiblã ne nebã la d sɩd tõe n maan tɩ b lebg karen-biisi. Sẽn mik tɩ tʋʋm kãngã sẽn tar yõod wʋsgã naaga tõnd balengã pʋgẽ wã, d segd n modga wa d sẽn tõe tɛk n segendẽ la d maand Biibl zãmsg ne nebã.

2. D sẽn na n segl Biibl zãmsg ne ned to-to: Segl Biibl zãmsg ne ned pa f sẽn na n karemd zãmsgã la f gẽesd verse rãmbã bal ye. Sẽn na yɩl tɩ zãmsgã kẽ Biibl zãmsdã sũuri, rẽnda d maan-a ne manesem sẽn na n kɩt t’a tʋlg a sũurã pʋgẽ n tũ a sẽn zãmsdã.

3. Nananda, tõnd mengã segd n wʋma zãmsgã võore. D segd n bãnga verse rãmbã fãa yõod sula pʋsẽ, la Biibl zãmsdã sẽn tõe n tũ-b to-to. D sã n gom n tadg gom-yẽgã zutu, sõngda tõnd tɩ d ra yĩm-b ye. D segd n tũusa zãmsgã tags-kãsemse, n tags d sẽn na n maan to-to n taas-b Biibl zãmsdã. Sẽn paase, d segd n ninga karen-biigã Biiblã bãngr sẽn ta zĩig ninga d yamẽ, n paas zĩis nins sẽn yɩ toog ne-a t’a sak yɛl kẽerã, zĩis nins a sẽn segd n maneg a zʋgã n paasã, la yɛl a taaba. D tõe n soka d mense: ‘Wãn to la m tõe n tũnug ne tagsa wã la verse nins sẽn be zãmsgã pʋgẽ wã n sõng-a t’a bɩ tẽebã pʋgẽ?’ Wakat ninga, tõe n yaa tɩlae tɩ y maan vaeesg n paase. Y sã n dat tɩ Biibl zãmsdã sɩd rɩ zãmsgã nafa fãa, rɩlla y segl neere.

4. Y sã n wa segend Biiblã zãmsg ne nedã, a Zeova pʋʋsg tara yõod wʋsgo. Pʋʋsgã pʋgẽ, bɩ y gom yɛl takɩ sẽn tɩ loe ne nedã la a bõn-daabã yelle. Kos-y a Zeova t’a sõng-y tɩ y maan tɩ zãmsgã kẽ a sũurã.—1 Kor. 3:6.

5. D sẽn na n maan Biibl zãmsg ne ned to-to: D segd n maana modgr n tõog n sõng ned t’a sak sɩdã. Lagem ne Biibl zãmsdã n karem sebrã karem-zaalg woto wã bal tõe n sõng-a lame t’a paam bãngrã, la rẽ yĩnga a tẽeda bũmb ning a sẽn zãmsdã bɩ? Sõng-y zãmsdã t’a bãng saglsã sẽn pak yẽ mengã to-to, la bũmb ning a sẽn segd n maan n tũ a sẽn zãmsã.—Kol. 3:10.

6. Gũus-y n da wa bas-y tɩ sõasgã wẽnemd n tees gom-zut sẽn ka tɩ loe vẽeneg ne bũmb nins y sẽn zãmsdã ye. Y tõe n goma bõn-kãens yell zãmsgã poor bɩ wakat a to. Leb n yaa bũmb sẽn tar yõod wʋsg tɩ y kɩt tɩ zãmsdã leok ne a meng gom-biisi, n da karemd sebrã pʋgẽ bal n leokdẽ ye. Rẽ na n sõng-y lame tɩ y bãng a sã n wʋmda zãmsgã võor bɩ a pa wʋmde.

7. Karen-sãam-sõng gomd n tadgda tags-yẽgã zutu, sẽn na yɩl tɩ pa Biibl zãmsdã pʋ-tẽerẽ sõma. A Zezi maana rẽ, n tũnug ne sogsg sẽn tɩ loe ne yɛlã nif menga. (Mat. 16:13-16; 17:24-27) Sogsgã sõngd-y lame tɩ y bãng Biibl zãmsdã sã n wʋmda zãmsgã võore, la sẽn be a sũurã pʋgẽ me. A Zezi leb n tũnuga ne makr toɛy-toɛy sẽn yaa nana tɩ b võor wʋmb ka toog n sõng a kɛlgdbã tɩ b tags a sẽn da yetã zugu.—Mat. 13:31-33; 24:32, 33.

8. Zãmsgã baasgẽ bɩ y modg tɩ verse yẽgã zĩnd zãmsgã lebg-n-ges pʋgẽ. Maan-y sogsg sẽn na n sõng-y tɩ y bãng Biibl zãmsdã sẽn tagsd bũmb ning ne a sẽn zãmsã, tɩ wilgd a sẽn tõe n tũ-a to-to. Yãmb sã n lebg n wa n na n kẽng taoor ne zãmsg ning sẽn pʋgdã, bɩ y reng n lebg n ges nindaarẽ zãmsgã tags-kãsems wa sẽn zemse.

9. D zãmsda nebã n dat tɩ b yɩ a Zeova sõgen dãmba. Rẽ yaa zu-noogo la leb n yaa zɩɩb sẽn yaa kãseng me. Rẽ yĩnga y tõe n maaname tɩ y sẽn zãmsd nebã Biiblã to-to wã yɩ sõma n paas bɩ? D segd n modga wa d sẽn tõe tɛka, d sã n wa segendẽ la d maand Biibl zãmsg ne nebã.—1 Tɩm. 4:15, 16.