D sẽn na n maan Biibl zãmsg ne ned to-to
1 Wãn-wãn la d tõe n maan yirẽ Biibl zãmsg ne ned tɩ yɩ sõma? Mak-sõng sẽn yaa kãseng bʋg la d tara? Wãn-wãn la d tõe n wilg verse rãmbã sẽn be zãmsgã pʋgẽ wã yõodo? Ãnda n segd n karem sulã? Biibl zãmsgã sẽn maand to-to wã sẽn yãk a toogo, bõe yɛs n tõe n sõng karen-biigã t’a tall nonglem ne sɩdã? Bẽd-bʋs la d tog n gili?
2 Biibl zãmsg ne ned sẽn maand to-to: Sɩd-sɩdã yirẽ Biibl zãmsg ne nebã tũuda Gũusg Gasgã zãmsg makre. B segda pipi n karem sullã b sẽn na n zãmsã. Rẽ poore, sẽn kõt-a zãmsgã karemda sʋkr ning sẽn tɩ loe ne sullã b sẽn gʋlsã, la a bas tɩ karen-biigã leoke. Karen-biigã sã n ka mi a sẽn na n leok to-to, zãmsgã kõat na n maana karen-biigã sʋgsg sẽn na n sõng-a t’a tags b sẽn sõsd bũmb ningã zug n bãng leokr ning sẽn zemsã.
3 Wilg-y verse rãmbã yõod sẽn ya a soab ne tagsa nins sẽn be sullã pʋgẽ wã. Wilg-y karen-biigã a sẽn tõe n maan to-to n bãng verse rãmbã goam sullã pʋgẽ n bake, la y sõng-a t’a tags n bãng verse rãmbã võor ne sullã tagsa. B sã n sõdga verse rãmb bal n ka naag ne b goamã, yaa sõma tɩ y gẽes-b Biiblã pʋga, sã n ka b goama wogma wʋsgo. Rẽ poor bɩ y kɩt tɩ karen-biigã karem-ba, la a wilg b sẽn teend sullã tagsa bɩ b sẽn kõt vẽnegr n paasd b zut to-to.
4 Sõng-y karen-biigã t’a tall nonglem ne sɩdã: Sagl-y karen-biigã t’a segl zãmsgã neere. Wilg-y-yã-a vẽeneg tɩ karengã tara yõod sẽn na yɩl n tõog n zãms n bãnge. Karen-biigã na n kell n kẽngda taoore, a sã n karemd zãmsgã sɛb la a bʋgsd b zut n paasdẽ. Koe-moondb kẽer basdame tɩ karen-biigã karem sulã fãa zãmsgã wakate. Koe-moondb a taab karemda sulã ne Biibl zãmsã n deesd taaba. D segd n tagsa sõma zĩ-kãngã wɛɛngẽ, tɩ sẽn segd n pak-d n yɩɩd yaa karen-biigã taoor kẽngr tẽebã wɛɛngẽ.
5 Y tõe n maana zãmsgã ne karen-biigã wala karen-biisã sẽn karemd lekoll dãmbẽ wã to-to t’a bãng yɛl wʋsgo, la rẽ yĩnga a tẽeda bũmb ning a sẽn zãmsdã bɩ? A tog n bãngã zãmsgã sẽn pak a mengã vɩɩm to-to n tõog n tall nonglem hakɩk ne sɩdã. A tagsg yaa wãn-wãn ne bũmb ning a sẽn zãmsdã? Wãn to la a tõe n tũ bũmb ning a sẽn zãmsã? Tũnug-y ne vaees-n-bãng sʋgsg sẽn na yɩl tɩ zãmsgã kẽ karen-biigã sũurẽ.
6 Gil-y bẽdsã: Y sã n wa maand Biibl zãmsg ne neda, bẽds n be tɩ y segd n gili. Karen-biigã sã n sʋk yɛl sẽn ka tɩ loe ne zãmsg ning b sẽn maandã, nong n yaa sõma n yɩɩd tɩ y sõs yel-kãens zut zãmsgã baasgẽ bɩ wakat a to. Sẽn paase, tara yõod tɩ y kɩt tɩ karen-biigã leok ne a meng no-goamã n da karem sebrã goam ye. Rẽ na n sõnga yãmb sẽn yaa zãmsgã kõatã tɩ y bãng karen-biigã sã n wʋmda zãmsgã võore.
7 Bõe yĩng tɩ y ka na n yãk bõn-datl n paam baa yaa Biibl zãmsg a yembr n maandẽ? Woto ka yɩt bũmb sẽn yaa toogo, y sã n teeg a Zeova, la y maand zãmsgã wa b sẽn maand Gũusg Gasgã zãmsg to-to wã ye. Yaa Biibl zãmsg ne neb b yiyã n yaa manesem ning sẽn yaa sõma n yɩɩd sẽn na yɩl n zãms sɩdã neb a taab la d maan karen-biisi. Y sã n maand woto, yãmb me na n paama sũ-noog y sẽn naagd n pidsd a Zezi noor ning sẽn be Matɩe 28:19, 20 pʋgẽ wã yĩnga.