D reng n segl zãmsgã sõma
1. Bõe yĩng tɩ d segd n sõng karen-biisã tɩ b nong bũmb nins b sẽn zãmsdã?
1 D sã n zãmsd ned Biiblã, d segd n deng n segla zãmsgã sõma sẽn na yɩl n tõog n zãms-a tɩ kẽ a sũurã t’a sak n tũ a Zeova? D sã n sõng-a t’a nong bũmb nins a sẽn zãmsdã, d modgrã na n woma biisi. La woto na n kenga a raoodo. (Tõo. 6:5; Yel. 4:23; 1 Kor. 9:26) La wãn to la d tõe n zãms karen-biisã tɩ kẽ b sũy sõma?
2. Wãn to la pʋʋsgã tõe n sõng tõnd tɩ d segl zãmsgã sõma?
2 D sã n wa segend zãmsgã bɩ d pʋʋse: Sẽn mik tɩ yaa a Zeova n kɩtd tɩ koɛɛgã womd biisã, d segd n sɩnga d zãmsgã seglg ne pʋʋsgo. Sẽn yɩɩd fãa, d tõe n goma yɛl nins sẽn pak karen-biigã pʋʋsgã pʋgẽ. (1 Kor. 3:6; Zak 1:5) Pʋʋsgã le tõe n sõnga tõnd tɩ d zãms karen-biig t’a bãng Wẽnnaam la a raabã sõma.—Kol. 1:9, 10.
3. Bõe la d tõe n maan zãmsgã seglg sasa n wilg tɩ d tagsda karen-biisã yelle?
3 D tagsd karen-biisã yelle: A Zezi ra miime tɩ sẽn na yɩl n zãms neb tɩ kẽ b sũy sõma, a segd n tagsda b yelle. Sẽn ta naoor a yiibu, neb n sok a Zezi tɩ b “na n maana bõe n paam vɩɩm sẽn ka sɛta.” La a Zezi gesa ned fãa sẽn yaa a soab n leok-a. (Luk 10:25-28; 18:18-20) D sã n wa segend zãmsgã, d segd n tagsa karen-biigã sẽn segd n bãng bũmb ninsã yelle. Wala makre, verse bʋs la d na n yãk n karem ne-a? Sull a wãn la d tõe n zãms ne-a? Bõe n be zãmsgã pʋgẽ t’a võorã wʋmb tõe n yɩ toog ne-a, bɩ n yɩ toog t’a sak n deege? D tõe n tags n bãnga sogsg kẽer a sẽn tõe n soke, la d segl d mens n tɩ leok-a sõma.
4. Bõe la d tõe n maan tɩ wilgdẽ tɩ d segenda zãmsgã sõma?
4 D lebg n ges bũmb nins d sẽn seglã: Baa d sã n zoe n zãmsa sebrã naoor ka tɛka, yaa pipi d sẽn na n zãms-a karen-biigã. D sã n dat n zãms karen-biig tɩ kẽ a sũur sõma, d segd n segenda zãmsgã sõma wakat fãa. Woto rat n yeelame tɩ d maand bũmb ning d sẽn yet karen-biigã t’a maanã. D segd n lebg n gesa bũmb nins d sẽn seglã. Wala makre, verse rãmbã, sogsgã leoor d sẽn dẽesã, la d tagsd karen-biigã yelle.—Rom 2:21, 22.
5. Wãn to la d tõe n dɩk a Zeova togs-n-taare?
5 Karen-biisã bɩʋʋng paka a Zeova. (2 Pɩɛ. 3:9) D sã n dɩkd sẽk n segend zãmsg fãa sõma, d me wilgdame tɩ karen-biisã yel pak-d lame.