BĨNG-Y
D sẽn na n zãms nebã Biiblã to-to tɩ b bɩ tẽebã pʋgẽ
Seb-paasdem kãngã yaa sõss zĩ-kãsems b sẽn tigmi. Yaa sõss sẽn zoe n yi Rĩungã Tʋʋmd sebrẽ sẽn tik gom-zug ninga sẽn yaa: D sẽn na n zãms nebã Biiblã to-to tɩ b bɩ tẽebã pʋgẽ wã zugu. B sagenda d fãa tɩ d bĩng-a, tɩ d sã n wa zãmsd ned Biiblã bɩ d tikd a zug n tʋmdẽ. Sẽn paase, b tõe n sõsa b zut koe-moonegã yiib tigiss wakate. Tʋʋmdã yel-gɛtb sã n wa kaagd sebrã zãmsg sula, b leb n tõe n tika zĩ-kãensã kẽer n sõse.
Pipi babgo: Wakat bʋg la d tõe n gʋls tɩ yaa Biibl zãmsgo?
Tõnd sã n sõsd ne ned Biiblã zug wakat fãa, baa yaa sõs-koeese, ne Biibl bal wall d tik Biiblã zãmsg sebre, d maanda Biibl zãmsgo. D sẽn wilg a soabã Biiblã zãmsg sẽn maand to-to wã poore, d sã n lebg n tɩ maana zãmsgã naoor a yiib tɩ wõnd a na n ket n kẽngda taoore, d tõe n gʋlsa d rapoorã zug tɩ yaa Biibl zãmsgo.—km 7/04 s. n. a 1.
D sẽn tõe n tʋm ne sɛb ninsã
◼ Bõe la Wẽnnaam baood tɩ tõnd maane?
◼ Bãngr sẽn tar n debd vɩɩm sẽn-kõn-saẽ wã
◼ Balm-y sɩd Wẽnnaam yɛngã
◼ Y tõe n yɩɩ Wẽnnaam zoa! wã yaa sebr d sẽn tõe n tall n zãms neb nins sẽn pa karem n zãag bɩ sẽn pa tõe n karem sõma wã.
Babg a 2: Zãmsgã sẽn segend to-to
D segdame n zãms karen-biigã hal tɩ zãmsgã kẽ a sũurã sõma. Rẽ baoodame tɩ d segl zãmsgã sõma sẽn na yɩl t’a naf karen-biigã.—km 8/04 s. n. a 1.
D sẽn na n segl to-to
◼ Maag-y y yĩng n ges sakã bɩ zãmsgã gom-zugu, gom-zu-bi wã la fot rãmbã.
◼ Bao-y n bãng-y sogsgã leoore, n dẽesd gom-yẽgã bala.
◼ Yãk-y verse nins y sẽn na n wa karem zãmsgã wakatã. Gʋls-y tags-koees seb-nensã kɩremse.
◼ Segl-y zãmsgã tags-kãsemsã lebg-n-gese.
Maneg-y zãmsgã tɩ zems ne nedã yɛla
◼ Pʋʋs-y-yã a soabã yĩnga, la yɛl nins sẽn pak-a wã wɛɛngẽ.
◼ Tags-y n bãng-y karen-biigã sẽn na n wa maan sogsg ninsã la zĩis sẽn tõe n wa yɩ toog ne-a t’a wʋm b võor bɩ a sak-bã.
◼ Sok-y y menga: Bõe võor la a segd n wʋme, bɩ bõe la a segd n maan tɩ yɩ sõma n paas n tõog n bɩ tẽebã pʋgẽ? Wãn-wãn la m na n maan tɩ zãmsgã kẽ a sũurã?
◼ Sã n yaa tɩlae bɩ y segl makre, bũmb võor wilgri, bɩ sogsg sẽn na n sõng karen-biigã t’a wʋm zãmsg bɩ verse ning võore.
Babg a 3: D tʋm ne verse rãmbã sõma
Tõnd zãmsda Biiblã ne nebã sẽn na yɩl n ‘maan karen-biisi,’ d sẽn sõngd-b tɩ b wʋmdẽ la b sakd Wẽnnaam Gomdã zãmsgo, la b tũud-a b vɩɩmã pʋgẽ wã. (Mat. 28:19, 20; 1 Tes. 2:13) Woto yĩnga, zãmsgã segd n tika Gʋlsg Sõamyã zugu.—km 11/04 s. n. a 4.
Tik-y zãmsgã Wẽnnaam Gomdã zugu
◼ Sõng-y Biiblã karen-biis tɩ b bãng b sẽn tõe n maan to-to n yã verse rãmb takɩ b mengã Biibl pʋgẽ.
◼ Karem-y verse nins sẽn wilgd tõnd tẽebã zãmsg sẽn tik Biiblã n sõs b zutu.
◼ Maan-y-yã-a sogsgo. Ra wilg-y verse rãmbã võor y toor ye, kɩt-y tɩ karen-biigã wilg b võore.
◼ Kɩt-y tɩ zãmsgã yɩ nana. Ra bao-y n na n wilg verse wã babs fãa võor zãmsgã pʋgẽ ye. Wilg-y babg ning bal sẽn tɩ loe ne tagsg ning b sẽn zãmsdã võore.
◼ Wilg-y b sẽn tõe n tũ verse rãmbã to-to. Sõng-y karen-biigã t’a bãng a sẽn tõe n tũ verse wã a vɩɩmã pʋgẽ to-to.
Babg a 4: D sẽn na n wilg Biibl zãmsdbã zãmsgã sẽn segend to-to
Biibl karen-biig sã n dengd n karemd zãmsgã, n dẽesd leoorã, la a tagsd a sẽn na n leok to-to ne a meng no-goama, naoor wʋsgo yẽ soabã bɩta tao-tao tẽebã pʋgẽ. Woto yĩnga, yãmb sã n sɩng Biibl zãmsg ne ned n maand rẽ wakat fãa, bɩ y naag taab n segl zãmsg a yembr tɩ karen-biigã bãng sẽn maand to-to. Ne Biibl karen-biis wʋsgo, yɩta sõma tɩ y segl sak a ye bɩ zãmsg a ye tõr ne taaba.—km 12/04 s. n. a 1.
Leoorã rẽesg la tags-koees gʋlsg sebrã kɩrenga
◼ Wilg-y karen-biigã a sẽn tõe n yã zĩis nins sẽn leokd sogsg nins sẽn gʋlsã vẽenega to-to.
◼ Wilg-y-yã-a yãmb mengã zãmsg sebr t’a ges yãmb sẽn dẽes goam bɩ gom-bi-yẽgã to-to.
◼ Sõng-y-yã-a t’a bãng tɩ verse fãa teenda tagsg sẽn be sullã pʋgẽ. Wilg-y-yã-a a sẽn tõe n gʋls tags-koees to-to a zãmsgã seb-nens kɩremsẽ.
Zãmsgã reng-n-kʋms la a lebg-n-gese
◼ Wilg-y karen-biigã a sẽn tõe n ges sakã gom-zugu, a gom-zu-bi, la fot rãmbã koɛɛg-koɛɛg to-to n yaool n sɩng a zãmsgã seglg neere.
◼ Wilg-y-yã-a t’a seglgã baasgẽ, yɩta sõma t’a rɩk sẽk bilf n lebg n ges zãmsgã tags-kãsemse.
Babg a 5: D sẽn na n bãng d sẽn na n sõs zãmsgã bɩ sakã zug n ta zĩig ning to-to
Zãmsgã woglem bee ne karen-saambã la karen-biigã yɛl sẽn yaa to-to.—km 1/05 s. n. a 1.
Sõng-y karen-biigã t’a tall tẽeb sẽn tar pãnga
◼ Ra maan-y zãmsgã yãg-yãg tɩ karen-biigã wa pa wʋm bũmb ning a sẽn zãmsd Wẽnnaam Gomda pʋgẽ wã võor sõma ye.
◼ Rɩk-y sẽk n sõng karen-biigã t’a wʋm la a sak bũmb ning a sẽn zãmsdã.
◼ Rɩk-y sẽk tɩ sek n gom n tadg tags-kãsemsã zut la y sõs verse yẽg nins zãmsgã sẽn tikã zutu.
Kell-y n kẽng-y taoor ne zãmsgã n da bʋdg ye
◼ Karen-biig sã n nong n dɩkd sẽk wʋsg n gomd a meng yɛl yelle, d tõe n seglame n sõs ne-a rẽ zug zãmsgã poore.
◼ Ra gom-y wʋsg zãmsgã wakat ye. Y sã n na n paas kibay sẽn na n kõ vẽnegr n paase, bɩ y maan koɛɛg-koɛɛga, tɩ ra wa gɩdg karen-biigã t’a pa bãng Biiblã zãms-kãsemsã ye.
Babg a 6: Biiblã karen-biig sã n sok-d bũmbu
D sã n sɩng Biiblã zãmsg ne ned tɩ kẽngd taoor sõma-sõma, naoor wʋsgo, zemsame tɩ d sɩng ne sebrã pipi sak n tũ sags a taabã ball-ball n da loens gom-zutã ye. Rẽ sõngda karen-biigã t’a yẽbg a tẽebã bãngr hakɩkã zugu, la a bɩt n kẽngd taoore.—km 2/05 s. n. a 6.
Bãng-y sogsg nins y sẽn segd n leok zĩig pʋgẽ wã
◼ D tõe n leoka sogsg nins sẽn tar loees ne zãmsg ning d sẽn maandã zĩig pʋgẽ.
◼ La sogsg nins sẽn pa tar loees ne zãmsgã gom-zug wall sẽn baood tɩ d vaees sɛb a taab pʋsẽ n bãng n leok tɩ zemsã, sõmbame tɩ d leok-b wakat a to. Yɩta sõma tɩ d gʋls sogs-kãense.
◼ Sã n yaa toog ne karen-biigã t’a sak n deeg zãmsg sẽn be Biiblã pʋgẽ, bɩ y vaees sõsg a to sẽn wilgd Biiblã sẽn yet bũmb ning gom-zu-kãng wɛɛngẽ wã vẽenega.
◼ Karen-biigã sã n ket n pa rat n sak n deege, bɩ y bas gom-zugã nindaar yĩng la y kẽng taoor ne zãmsgã.
Tall-y sik-m-menga
◼ B sã n sok-y bũmb tɩ y pa mi a leoorã takɩ bɩ y ra leok sẽn zems ne yãmb meng tagsg ye.
◼ Wilgd-y karen-biigã bilf-bilf a sẽn tõe n tʋm ne vaeesgã tʋʋm-teed to-to.
Babg a 7: Biiblã zãmsgẽ pʋʋsgã
Sẽn na yɩl tɩ neb sẽn zãmsd Biiblã bɩ tẽebã pʋgẽ, yaa tɩlae tɩ b paam a Zeova barka. Woto yĩnga, zemsame tɩ d sɩng la d baas zãmsgã ne pʋʋsgo.—km 3/05 s. n. a 4.
Zãmsgã sɩngr la a baasg ne pʋʋsgã
◼ Ne neb nins sẽn yet tɩ b yaa kiris-nebã, daar ning d sẽn na n sɩng zãmsgã ne-b pipi wã bala, d tõe n sɩnga ne pʋʋsgo.
◼ Sã n yaa ne neb a taabã, d na n bao n bãnga wakat ning sẽn zems tɩ d wa sɩngdẽ la d baasd zãmsgã ne pʋʋsgã.
◼ D tõe n tika Yɩɩl Sõamyã 25:4, 5 la 1 Zã 5:14 zug n sõng karen-biigã t’a bãng bũmb ning sẽn kɩt tɩ d segd n pʋʋsã.
◼ D tõeeme n karem Zã 15:16 n wilg d sẽn segd n pʋʋs a Zeova a Zezi maasem yĩngã võore.
D sẽn tõe n yeel pʋʋsgã pʋgẽ
◼ Zemsame tɩ d pẽg a Zeova zãmsgã sẽn yit a nengẽ wã yĩnga.
◼ D tõe n wilgame tɩ karen-biigã yell pak-d lame.
◼ D segd n wilga a Zeova d mi-beoog a siglgã yĩnga.
◼ D tõe n kosa a Zeova t’a ning modgr ning karen-biigã sẽn maand n na n tũ bũmb ning a sẽn zãmsdã barka.
Babg a 8: D sõng Biiblã karen-biis tɩ b bãng siglgã sẽn yaa a soaba
Tõnd pa rat n zãms nebã bũmb ning sẽn be Biiblã pʋgẽ wã bal ye, d rat n sõng-b lame tɩ b wa lebg tigingã neb me. Rɩkd-y minit a wãn semen fãa y zãmsgẽ wã n sõsd a Zeova siglgã neng a ye zugu.—km 4/05 s. n. a 8.
Tigingã tigissi
◼ Sõng-y-b tɩ b bãng tigingã tigiss a nu wã fãa sẽn maand to-to. Y sã n sɩng Biiblã zãmsg ne-b pipi daarã bal bɩ y bool-b tɩ b wa tigissẽ wã.
◼ Gom-y ne-b tags-kãsems b sẽn zoe n wɛgs tigissẽ wã yelle.
◼ A Zezi kũumã Tẽegre, tigis-kãsemsã la tigims sull yel-gɛta kaagr sã n wa kolgdẽ bɩ y rɩk minit a wãn n bilg-b bõn-kãensã sẽn tar yõod to-to, sẽn na yɩl tɩ b tʋlg n wa b wakatã.
◼ Wilg-y-b tõnd tigiss toɛy-toɛyã foto rãmb sẽn be d sɛbã pʋsẽ wã.
◼ Kos-y-b tɩ b karem seb-bi-kãngã: A Zeova Kaset rãmba: B yaa ãnd rãmba? Yaa bõe la b tẽeda?
Tall-y kasɛt video rãmbã n sõng-ba
◼ Les Témoins de Jéhovah : Un nom, une organisation
◼ Toute la communauté de nos frères
◼ Unis grâce à l’enseignement divin
◼ Jusqu’aux extrémités de la terre
Babg a 9: D segl karen-biisã tɩ b kõ kaset sẽn pa yãk wakatã
Biiblã karen-biis sã n wa tẽed bũmb nins b sẽn zãmsdã, b rat n goma rẽ yell ne neb a taabã.—km 5/05 s. n. a 1.
Sõng-y-b tɩ b moon koɛɛgã
◼ A tara a zo-rãmb la neb a zakã pʋgẽ a sẽn tõe n bool tɩ b wa naag-a zãmsga sasa bɩ?
◼ A tara tʋmd-n-taase, karen-bi-taas wall mitb sẽn tʋll n wʋm koe-noogã bɩ?
B sẽn na n gom ne nebã b tẽebã yell to-to
◼ Tũus-y tagsa kẽer tɩ zãmsgã sasa bɩ y sok karen-biigã woto: “Wãn-wãn la fo na n tik Biiblã zug n wilg sɩd kãngã f zakã neda?”
◼ Sõng-y-yã-a t’a bãng t’a sã n na n gom Wẽnnaam la a raabã yell ne nebã, a segd n talla yam la sũ-mare, la a waoog-ba.
◼ Seb-bil ning gom-zug sẽn yaa: A Zeova Kaset rãmba: B yaa ãnd rãmba? Yaa bõe la b tẽeda? yaa sebr karen-biisã sẽn tõe n tik n sõng b zo-rãmb la b zagsã neb tɩ b bãng tõnd tẽebã la d tʋʋmã sẽn tar tikr Biiblã pʋgẽ wã.
Babg 10: D zãms karen-biisã zak-zak moonegã
Kãsem dãmbã sã n wa wilg tɩ Biibl karen-biig tõe n yɩɩ koe-moond sẽn pa reeg lisgu, a tõeeme masã n naagd tigingã neb n moondẽ.—km 6/05 s. n. a 1.
Naagd-y karen-biigã n segendẽ
◼ Wilg-y karen-biigã zĩig ning a sẽn tõe n yã koe-moonegã sɩngr goamã.
◼ Sõng-y-yã-a t’a yãk sɩngr goam sẽn yaa nana la sẽn zems ne moonegã zĩig nebã.
◼ Sagl-y-yã-a t’a tall Biiblã n tʋm koe-moonegã pʋgẽ.
◼ Lebsd-y n makd-y y sẽn na n moon to-to wã n wilgdẽ. Wilg-y-yã-a a sẽn tõe n leok sogsg nins nebã sẽn nong n sokd moonegã zĩigẽ wã ne yam to-to.
Naagd-y taab n moondẽ
◼ Kɩt-y tɩ karen-biigã ges y sẽn na n togs goam nins y sẽn naag taab n seglã to-to.
◼ Kɩt-y tɩ yɛlã zems ne karen-biigã la a pãn-tõogã. Zĩis kẽere, yɩta sõma tɩ y kɩt t’a karem verse la a wɛgs-a bala.
◼ Sõng-y karen-biigã sẽn nan sɩng koe-moonegã t’a sigl a sẽkã n yit n moond wakat fãa.
Babg 11: D sõng karen-biisã tɩ b lebg n tɩ ges nebã
Lebg-n-tɩ-gesã seglg segd n tika bũmb ning f sẽn da zoe n sõsã zugu. Sagl-y karen-biigã t’a get a sẽn sõsd ne neb ninsã yell neere. Wilgd-y-yã-a bilf-bilf t’a kɩtdẽ t’a kɛlgdbã gomda, t’a kelgd b goamã la a bãngd yɛl nins sẽn pak-bã.—km 7/05 s. n. a 1.
Segl-y n lebg n kẽnge
◼ Lebg-y n ges-y bũmb ning zug yãmb sõsgã sẽn da tikã, la y wilg karen-biigã t’a tik Rĩungã koɛɛgã neng ning sẽn na n kɩt t’a kɛlgdã sak n sõs ne-a wã zugu.
◼ Segl-y goam sẽn tik Biiblã verse zug n paas sebr d sẽn tikd n zãmsd Biiblã sull a yembre.
◼ Segl-y sokr y sẽn na n sok sõsgã baasgẽ.
Lebg-y n kẽng-y tao-tao
◼ Sagl-y karen-biigã t’a lebgd n tʋgd n get neb nins sẽn dat n bãng n paasã tao-tao.
◼ Sõng-y karen-biigã t’a bãng tɩ sẽn na yɩl n yã nebã yiri tõe n baoodame t’a leb naoor wʋsgo.
◼ Zãms-y karen-biigã a sẽn tõe n dɩk sɛk ne ned to-to la y wilg-a t’a segd n lebg n kẽnga wakat ning a sẽn kõ wã.
Babg 12: D sõng karen-biisã tɩ b sɩng Biiblã zãmsg ne neba
Y sẽn dɩkd a Zezi togs-n-taar n kõt mak-sõng y koe-moonegã pʋgẽ wã tara yõod wʋsgo. Karen-biigã sã n get makr ning y sẽn kõt koe-moonegã pʋgẽ wã, a na n bãngame tɩ y sẽn lebgd n tʋgd n kaagd nebã yaa sẽn na yɩl n sɩng Biiblã zãmsg ne-ba.—km 8/05 s. n. a 1.
Kãabd-y Biiblã zãmsgo
◼ Wilg-y karen-biigã tɩ pa tɩlae tɩ d wilg d sẽn zãmsd Biiblã ne nebã to-to ball-ball ye.
◼ Naoor wʋsgo, d sã n tik Biiblã zãmsg sɛbã sull a ye bɩ a yiib zut n wilg d sẽn maand rẽ to-to wã bala, sekame.
◼ Lebg-y n ges-y sagls sẽn wilgd d sẽn tõe n sɩng Biiblã zãmsg to-to la y maan rẽ mak-n-wilg a yembre.—km 8/05 s. n. a 8; km 1/02 s. n. a 6.
Zãms-y karen-biisã tɩ b lebg karen-saam dãmba
◼ Sagl-y karen-biigã t’a gʋls a yʋʋr Wẽnnaam tʋʋmdã lekollẽ.
◼ Rɩk-y segls tɩ karen-biigã yãagd-y tɩ y tʋgd n zãmsd neb Biiblã, tɩ zãmsgã sasa bɩ a tõe n kõ leoor sull zugu wall verse sẽn tar yõod sullã pʋgẽ zugu.