Modg-y n yit koe-moonegã hat daar fãa!
1. A Poll ne a tũud-n-taasã sẽn maan bũmb ning Filipã kõta tõnd yam bʋgo?
1 Tʋm-tʋmd a Poll ne a tũud-n-taasã sẽn wa n gilgd tẽnsã n moond koɛɛgã, b wa n kẽnga Filipi. Beenẽ, vʋʋsg daar fãa, zʋɩf rãmbã wʋsg basda b tʋʋmã n vʋʋse. A Poll dãmb me sã n da basẽ b tʋʋmdã n vʋʋs baraare, ned pa tõe n yeel tɩ b pa maan neer ye. La b sẽn da mi tɩ zʋɩf rãmbã yita tẽngã kɩreng n tigimd taab n pʋʋsdẽ wã, b tũnuga ne segb kãng n na n moon-b koɛɛgã. Yɩɩ rẽ sasa la a Lidi kelg koɛɛgã tɩ yẽ ne a zakã rãmb fãa reeg lisgu. Tags-y n ges a Poll ne a tũud-n-taasã sũ-noogã sẽn yɩ to-to! (Tʋʋ. 16:13-15) Rũndã-rũndã, neb wʋsg sẽn pa tʋmd hat daarã yĩnga, yaa sõma tɩ tõnd me bao sẽk hat daar fãa n taasd-b koɛɛgã.
2. Sɩngrẽ wã, zu-loe-bʋg la a Zeova nin-buiidã tõog-yã, tɩ kɩt tɩ tõnd tõe n moon hat daare?
2 Hat daar moonegã sɩngr pa yɩ nana ye: Yʋʋmd 1927 wã, a Zeova siglgã taoor lʋɩtbã sagla koe-moondbã fãa tɩ b modg n moond koɛɛgã hat daar fãa. B sẽn sɩngã bal la nebã sẽn sɩng b namsgo. Etazĩni, b yõga wʋsg n kẽes bãens roogẽ, n yeel tɩ b kɩɩsda tẽngã noor ning sẽn yet tɩ hat daar yaa vʋʋsg daarã, tɩ b tiisda nebã, la tɩ b koosda sɛb tɩ laloa wã yaool n pa kõ-b sor ye. Baa ne rẽ, a Zeova nin-buiidã pa bas ye. Yʋʋmd 1930 wã poore, b sigla koe-mooneg buud b sẽn bool tɩ “ campagnes divisionnaires, ” tɩ tigims wʋsg koe-moondb segd taab zĩ-yɛng n moon koɛɛgã. Woto ra kɩtdame tɩ b tõogd n moond zĩig ning b sẽn yãk n na n moon baraarã fãa gilli. Koe-mooneg kãng sasa tɩ b sã n na n yõg-ba, b sẽn waoogã yĩnga, b mikdame tɩ b pa tõe n yõg b fãa ye. Saam-bi-kãensã gẽnega b yõy tɩ tõnd tõe n moon koɛɛgã hat daare. Rẽ yĩnga y wilgdame tɩ y nanda b modgrã bɩ?
3. Bõe yĩng tɩ hatã sɩd zems ne koe-moonegã?
3 Yaa daar sẽn sɩd zems ne koe-moonegã: Neb wʋsg pa tʋmd hat daar ye. B nong n tara vɩʋʋg n sõsda. Sẽn kẽnd-b wẽnd-dotẽ wã nong n sakd n gomda Wẽnnaam yell baraare. D sã n tara tigsg hato, d tõe n sigla koe-mooneg tigsgã poor wall nand t’a sɩnge, bala d sẽn zoe n maneg d mens tigsgã yĩngã, d tõe n kell n yii koe-moonegã. D tõeeme meng n zã rɩɩb bilfu.
4. Bark bʋg la d tõe n paame, d sã n yit koe-moonegã hat daar fãa?
4 D sã n yãk wakat hatã daar n yit koe-moonegã, pa rẽ n na n kɩt tɩ d pa tõog n vʋʋs ye. Koɛɛgã mooneg sẽn kõt sũ-noog ningã na n pʋd n kɩtame tɩ d vʋʋsgã yɩ-d noog n paase. (Yel. 19:23) Tõe meng tɩ d paam ned sẽn nong Wẽnnaam koɛɛgã wa a Lidi, tɩ d sũ-noogã maneg n paase.