Yãmb segla y kambã lekollã yikr yĩng bɩ?
1. Bõe yĩng tɩ y kambã segd n segl b mens lekollã yikr yĩnga?
1 Lekollã yikr kolgdame. Yaa vẽeneg tɩ y kambã na n sɛga zu-loees b lekollẽ wã. B leb n na n paama sor me n “kɩs sɩdã kaseto.” (Zã 18:37) B segla b mens rẽ yĩng bɩ?
2. Bõe la y kambã tog n bãnge?
2 Yãmb kambã mii bũmb ning sẽn kɩt tɩ b pa segd n kẽes b mens yɛl kẽer b sẽn maan lekollẽ wã, la kibs kẽer pʋsẽ wã bɩ? Rẽ yĩnga b mii manesem nins sẽn wilgd tɩ ned kẽesa a meng a pʋgẽ bɩ? B mii b sẽn na n maan to-to, ned sã n wa pẽdg-b n dat tɩ b karem n zãage, tɩ b ro pʋg-sadb bɩ rapa, bɩ n dat tɩ b yũ rãam bɩ doroog bɩ? B na n yeelame bal tɩ yaa bãmb tũudmã n gɩdg woto bɩ, bɩ b na n tõog n tika Biiblã zug n wilg bũmb ning sẽn kɩt tɩ b pa maand rẽ wã?—1 Pɩɛ. 3:15.
3. Roagdbã tõe n tũnuga ne zak pʋgẽ zaabr Biibl zãmsgã n maan bõe?
3 Tũnug-y ne zak pʋgẽ zaabr Biibl zãmsgã: Yaa vẽeneg tɩ wakat-wakate, y na n sõsda ne y kambã yɛl kẽer b sẽn paamd lekollẽ wã zugu. Y sã n modg n sõsd rẽ zug ne y kambã tɩ lekollã nan pa yiki, na n sõng-b lame. Y tõe n maana rẽ naoor a wãn y zak pʋgẽ zaabr Biibl zãmsgã sasa. Y tõe n soka y kambã tɩ b togs bũmb ning sẽn kõt-b yɩɩre, lekollã yikr sã n wa kolgdẽ. Y sã n data, y tõe n lebg n sõsa yɛl kẽer y sẽn da zoe n sõs zugu, sẽn mik tɩ kambã yamã vẽnega bilf n paasã. (Yɩɩl 119:95) Y tõe n maana makre, tɩ yãmb yaa y biigã karen-saamb bɩ a karen-bi-taaga, n sok-a bũmbu, n ges a sẽn na n leok to-to. Wilg-y y kambã b sẽn tõe n tik Biiblã la sɛb a taab wala Les jeunes s’interrogent ne Comment raisonner wã zug n leok nebã to-to.—Ges-y yʋʋmd 2010 yʋʋm-sar kiuugã rasem 15 Gũusg Gasgã, seb-neng a 3-5.
4. Roagdb nins sẽn maand gũusgã maanda bõe?
4 Zu-loees nins kambã sẽn paamd yaoolem da-kãensã wã tara paasgo. (2 Tɩm. 3:1) Roagdb nins sẽn maand gũusgã rengd n tagsa zu-loees nins kambã sẽn tõe n wa paam lekollẽ wã yelle. (Yel. 22:3) Woto yĩnga, nand tɩ lekollã yiki, bɩ y maan y sẽn tõe fãa n sõng y kambã tɩ b segl b mens rẽ yĩnga.