Y segla y mens lekollã yikr yĩng bɩ?
1. Lekollã sẽn yikdã, zu-no-bʋg la y tara?
1 Y sã n nan dat n kẽe lekoll bɩ y sã n yaa karen-biig n gũud lekollã yikri, yaa vẽeneg tɩ y miime tɩ y na n sega zu-loeese. La y tara zu-noog n na n ‘kõ kasetã.’ (Zã 18:37) Rẽ yĩnga yãmb segla y mens n na n kõ kasetã bɩ?
2. Bõe la y paam tɩ tõe n sõng-y lekollã yikr yĩnga?
2 A Zeova, y roagdbã la tʋm-tʋmd sẽn tũud sɩd la sẽn tar yamã zãmsa yãmb bũmb wʋsgo, sẽn na yɩl n sõng-y tɩ y vɩɩmã yɩ sõma. (Yel. 1:8; 6:20; 23:23-25; Ef. 6:1-4; 2 Tɩm. 3:16, 17) La masã, yaa vẽeneg tɩ y mii zu-loees nins y sẽn tõe n seg lekollẽ wã. Y sẽn paam n bãng Wẽnnaam sẽn dat tɩ y maan bũmb ninsã, la y mi zu-loees nins y sẽn tõe n segã, segl-y y mens sẽn na yɩl n kõ kasetã. (Yel. 22:3) Tũ-y saglsã sẽn be Les jeunes s’interrogent rãmb a yiibã pʋsẽ wã, la sõssã sẽn be Réveillez-vous ! rãmbã pʋsẽ n gomd kom-bɩɩsã yellã sẽn wilg bũmb ninsã.
3. Bõe n na n kɩt tɩ y tõog n kõ kasetã?
3 Y na n paam n kõo kasetã y lekollẽ wã sẽn yaa y moonegã zĩigã. Nebã sã n ne y manesmã, y goama, la y sẽn manegd y mens tɩ yaa sõma wã, la b ne y sẽn waoogd y karen-saam-dãmbã, y karen-bi-taasã la neb a taabã tɩ y vɩɩmã yaa sõma wã, kẽer tõe n sok-y-la woto: “Bõe yĩng tɩ yãmb yaa toore?” (Mal. 3:18; Zã 15:19; 1 Tɩm. 2:9, 10) Woto tõe n kɩtame tɩ y paam zu-noog n kõ kasetã la y wilg-b y sẽn tẽed bũmb ninsã. Yʋʋmdã fãa, tõe tɩ y na n sega zu-loeese. Wala makre, kibs rãmb b sẽn maand tẽngã yʋʋr yĩnga, la kibs rãmb a taaba b sẽn maandã yĩnga. Nebã sã n sok yãmb tɩ bõe yĩng tɩ y pa maand kibs rãmbã, “rẽ yĩnga y na n yeelame tɩ yaa y tũudmã n gɩdg bɩ, bɩ yaa y sẽn yaa a Zeova Kaset soabã yĩnga?” Bɩ y na n tũnuga ne rẽ n gom a Zeova sẽn yaa y saasẽ ba wã yelle? Y sã n tũ a Zeova sor-wilgr n segl y mens sõma, y na n tõog n kõo kasetã y karen-saam-dãmbã, y karen-bi-taase, la neb a taaba.—1 Pɩɛ. 3:15.
4. Bõe n kɩt tɩ y tar bas-yard tɩ y karengã na n yɩɩ sõma?
4 Tõe tɩ y zoeta rabeem bilf ne y sẽn na n sɩng karengã. La baa ne rẽ, bãng-y tɩ neb wʋsg teend-y lame n dat tɩ y karengã yɩ sõma. Sẽn paase, d sũy yaa noog ne y sẽn na n paam zu-noog n kõ kasetã y lekollẽ wã. Woto yĩnga, bɩ y tall raood la y segl y mens lekollã yikr yĩnga!