Ra zoe-y rabeem n pa moon koɛɛgã ye
1. Bõe maaneg n baood raoodo, la bõe yĩnga?
1 Rẽ yĩnga, y zoe n paama segb n tõe n moon koɛɛgã y lekollẽ wã, tɩ nebã sẽn tõe n yaal yãmbã kɩt tɩ y pa moon bɩ? Yaa vẽeneg tɩ yɩl n moon koɛɛgã baooda raoodo, sẽn yɩɩd fãa y sã n yaa ned sẽn zoet yãnde. La bõe n tõe n sõng-yã?
2. Koɛɛgã mooneg lekollẽ wã wɛɛngẽ, wãn to la y tõe n tʋm ne yam?
2 Tʋm-y ne yam: Yaa sɩd tɩ y lekollã tõe n yɩɩ y mooneg zĩiga. La tẽeg-y tɩ pa rat n yeel tɩ y sẽn seg a soab fãa y tog n taas-a-la koɛɛgã wa y sẽn maand to-to zak-zak moonegã sasa wã ye. Tʋm-y ne yam, n tõog n bãng wakat ning y sẽn segd n taas koɛɛgã.* (Koɛ. 3:1, 7) Karengã sasa, karen-saamb ning tõe n sõsda bũmb zugu, wall tõe n yɩɩ devoaar la a kõ-yã, tɩ y paam segb n wilg Biiblã sẽn yet bũmb ningã. Tõe me tɩ y karen-bi-taag wa sok yãmb n dat n bãng bũmb ning sẽn kɩt tɩ y pa naagd n maand yɛl kẽerã. Lekollã yikr sasa, karen-biis kẽer sẽn yaa kiris-neb togsda b karen-saamb dãmbã tɩ b yaa a Zeova Kaset rãmba, la b kõ-b sɛb sẽn wilgd a Zeova Kaset rãmbã sẽn tẽed bũmb ninsã. Sãnda me rɩgenda d sɛbã b zĩisẽ wã tɩ b karen-bi-taasã tõe n yã n wa sok-b sogsgo.
3. Wãn to la y tõe n segl y mens n tõog n moon koɛɛgã y lekollẽ wã?
3 Reng-y n segl y mense: Y sã n deng n segl y menga, y na n paama raood n paase. (1 Pɩɛ. 3:15) Bao-y sogsg nins b sẽn tõe n sok-yã, la y tags n ges y sẽn na n leok to-to. (Yel. 15:28) Sã n tõe bɩ y zãad Biibl la sɛb kẽer wa Comment raisonner sebrã, Les jeunes s’interrogent sɛbã, la d sɛb nins sẽn wilgd tɩ naand n be wã n kẽnd lekollẽ wã wakat fãa. Kos-y y roagdbã tɩ y zak pʋgẽ zaabr Biibl zãmsgã sasa, bɩ b mi n naag mak-n-wilgi.
4. Bõe yĩng tɩ y segd n ket n moond koɛɛgã y lekollẽ wã?
4 Tags-y tɩ tõe n woma biisi: Ra n tags-y tɩ y sã n gom Biiblã yell fãa, y karen-bi-taasã na n yaal-y lame ye. Kẽer na n pẽga yãmb y raoodã yĩnga, la b tõe n sak n kelgame menga. La baa b baa a ye sã n pa kelge, bɩ y ra koms raood ye. A Zeova sũur na n yɩɩ noog ne yãmba, y sẽn modg n na n moon koɛɛgã yĩnga. (Heb. 13:15, 16) Ket-y n kot a Zeova t’a kõ-y ‘raood kãseng tɩ y togs a koɛɛgã.’ (Tʋʋ. 4:29; 2 Tɩm. 1:7, 8) Tags-y n ges-y y sũur sẽn na n yɩ noog to-to, y sã n paam tɩ ned kelg-yã. Tõe meng t’a wa lebg a Zeova Kaset soaba!