Yʋʋmd 2002 Wẽnnaam tʋʋmdã lekolle
1 Neb wʋsg getame tɩ d sẽn tõe n goma yaa tõog d sẽn segd n tarẽ bala. La goam tõog ya a Zeova kũuni. A sõngda tõnd tɩ d tõe n gom ne neb a taabã n wilg d tagsã la sẽn be d sũurẽ. Sẽn yɩɩd fãa d tõe n tũnuga ne rẽ n pẽg d Wẽnnaamã.—Yɩɩl 22:23; 1 Kor. 1:4-7.
2 B zãmsa rapa, pagba, la kamb Wẽnnaam tʋʋmdã lekoll pʋgẽ tɩ b moon a Zeova yʋʋrã. (Yɩɩl 148:12, 13) Yʋʋmd 2002 lekollã na-kẽndr tɩ loee ne Biiblã gom-zut toɛy-toɛy sẽn tõe n naf tõnd mengã, la tɩ d tõe n dɩk n tʋm koe-moonegã pʋgẽ. D sã n segend d mens lekollã yĩng la d kẽesd d mens a pʋgẽ, d tõe n paasa d bãngrã la d minimã sã n yaa ne zãms Wẽnnaam Gomdã neb a taabã pʋgẽ.—Yɩɩl 45:2.
3 Karm-y Biiblã daar fãa: Tõnd sã n nong n tar Biibl tɩ be ne-d wakat fãa, d tõe n tũnuga ne sẽk bilf d sẽn paam fãa n karm-a. Daarã pʋgẽ, tõnd wʋsg sẽn yɩɩd mi n paamda sẽk bilf d sẽn tõe n dɩk n karem Biiblã. Daar fãa d sã n karem baa yaa seb-neng a yembre na n naf-d lame. Woto maaneg seka sẽn na yɩl n tũ Biiblã kareng na-kẽndr sẽn be lekollã na-kẽndr sebr pʋgẽ wã!—Yɩɩl 1:1-3.
4 D sã n tõe n karem Biiblã sõma, rẽ tõe n sõnga tõnd tɩ d karem tɩ kẽ d kɛlgdbã sũyẽ, tɩ tus-b tɩ b pẽg a Zeova. Saam-biis nins sẽn kõt Sõasg N° a 2 wã segd n zẽka b koees n karem, n karem, n karem verse nins b sẽn kõ-bã n minim sõma. Lekollã yel-gɛt na n pẽga karen-biisã la a kõ-b sagls tɩ b karengã yɩ sõma n paase.
5 Tũnug-y ne Comment raisonner sebrã: Sõss N° a 3 la N° a 4 tika Comment raisonner sebrã zugu. Tõnd wʋsg sẽn yɩɩd segd n modgame n tũnug ne seb-kãngã sẽn zems sõma wã koe-moonegã pʋgẽ. Saam-bi-pogsã segd n yãka sõsgã sẽn maand zĩig ningã tɩ zems ne moonegã zĩigã. Lekollã yel-gɛt sẽn segd n ges n yɩɩd yaa b sẽn kõt zãmsgã la b tũnugd ne Biiblã to-to wã.
6 Bɩ Wẽnnaam tʋʋmdã lekoll sõng tõnd fãa tɩ d ket n tũnugd ne goamã tõog Wẽnnaam sẽn kõ-dã n togsd koe-noogã la d pẽgd d Wẽnnaam kãseng a Zeova!—Yɩɩl 34:2; Ef. 6:19.