Wẽnnaam tʋʋmdã lekoll sẽn nafd tõnd to-to
1 A Zeova nin-buiidã tara zu-noog sẽn ka wõnd a taab b sẽn paam tɩ Wẽnnaam zãmsd-bã. (Ezai 54:13; Zã 6:45) La sẽn na yɩl tɩ zãms-kãng tõog n naf tõnd wʋsgo, bee ne tõnd modgrã. Rẽ yĩnga y tõe n bãnga Wẽnnaam tʋʋmdã lekoll sẽn nafd yãmb tẽebã to-to bɩ?
2 Pẽgr goama: Lekollã yel-gɛtb wʋsg mikame tɩ sõasg minimã tikr toɛy-toɛyã b sẽn zãms sõma wã kɩtame tɩ tigingã koe-mooneg yɩ sõma n paase. Sẽn paase, lekoll yel-gɛt a yembr mikame tɩ b sẽn kõt kɛlgdbã sor tɩ b tõe n kõ leoor Biiblã kareng tags-kãsemsã sõasg sasa wã, neb sõor sẽn paas n tũud Biiblã kareng na-kẽndr masã. Sõasg No a 2 wã wɛɛngẽ, saam-biis wʋsg wilgame tɩ sẽn ka leb n yaa tɩlae tɩ b segl sɩngr bɩ baasg goam tɩ yaa babg ning b sẽn yãkã bal la b karemdã, bee nafa wʋsgo. Bũmb ning sẽn pak b rãmb nins b sẽn kõ bab-kãngã n yɩɩd masã wã yaa b modg tɩ b karengã lebg sõma n paase.—1 Tɩm. 4:13.
3 Tõe n nafa neba fãa: Leoor kũun tigissẽ wã sɩd tõe n kõo sũ-noogo. (Yel. 15:23) B sẽn kõt tõnd lebg-n-ges ne sogsg la leoorã sogsg pĩndã, kɩtame tɩ d tõe n deng pĩnd n segl n wa kẽes d mens sõasgã pʋgẽ nana-nana. Sẽn paase, sẽn sɩng ne yʋʋmd 2004, yʋʋm-vẽkr kiuug 1 daar Gũusgã Gasgã, b ningda Biiblã sɛb tags-kãsems Gũusg Gasgã pʋgẽ, tɩ zems ne babg ning b sẽn yãk tɩ d karem Wẽnnaam tʋʋmdã lekollã yĩngã. Sõs-kãensã sõnga neb wʋsg tɩ b kõ leoor sẽn kengd tẽeb Biiblã kareng tags-kãsems sõss wakate.
4 Ned ning fãa sẽn yaa lekollã karen-biig tara zu-no-kãseng n tõe n segl la a kõ sõsse. Pẽgr goam nins lekollã yel-gɛt sẽn togsd lekollã wakatã tõe n nafa tõnd fãa. Karen-biisã yembr-yembr me leb n nafdame, lekollã yel-gɛt sẽn mi n wa bool-b kɛɛng n kõ sagls n paas tigisgã poorã. Tʋʋm nins sẽn tɩ loe ne sõasg minim tikrã sẽn be Tirez profit de l’École du ministère théocratique sak fãa baasgẽ wã me leb n sõngda tõndo.
5 D sã n paam tagsa sẽn zems la sẽn tik Gʋlsg Sõamyã zug lekollã wakat la a poore, bɩ d gʋls-b d École du ministère sebrã pʋgẽ. Bʋgs-y bũmb ning y sẽn zãmsã zugu, la y ges Wẽnnaam zãmsgã nen-kãng sẽn manegd yãmb tẽebã to-to.