Yʋʋmd 2001 teokaratik ministɛɛr lekollã

¹ D tara bʋʋm wʋsg sẽn tik Gʋlsg Sõamyã zug sẽn kɩtd tɩ d segd n kẽes d mens zãng wa d sẽn tõe tɛk Teokaratik Ministɛɛr Lekollã pʋgẽ.​—Yel. 15:23; Mat. 28:19, 20; Tʋʋ. 15:32; 1 Tɩm. 4:12, 13; 2 Tɩm. 2:2; 1 Pɩɛ. 3:15.

² Semen fãa Biiblã kareng geelg-n-tʋm yɩɩ lekollã bũmb a yembr sẽn maand hal sẽn kaoose. Rẽ zema ne f sẽn na n karemd seb-neng a yembr la bal Biiblã pʋgẽ daar fãa. Sẽn sɩng ne rõandã yʋʋmdã, b na n yãka Biibl kareng zĩig me gʋlsg lebg-n-ges semen fãa yĩnga. Biiblã karen-paasdmã b sẽn da maan geelg-n-tʋm yʋʋm a tãabã sẽn loogã yĩngã saame. La y sã n tʋllame n karem Biiblã tɩ yɩɩg b sẽn yãk geelg-n-tʋmã pʋgẽ wã, y tõe n maana y meng geelg-n-tʋm.

³ Sõasg N° 2 zãmsda saam-biis Wẽnnaam Gomdã kareng “zãma sʋk yĩnga.” (1 Tɩm. 4:13) B sã n kõo yãmb sõasg sẽn yaa kareng tɩ y maane, bɩ y zẽk y koɛɛg n maan-a n minim sõma. Y tõe n tũnuga ne Sosiete wã Biibl kareng kasɛt rãmb n maan tɩ y gom-biisã boolgo, y koe-zoma toeengo, la karem sõma wã nens a taabã yɩ sõma n paase.

⁴ Sõasg N° a 3 la N° a 4 tika Comment raisonner sebrã b sẽn segl tɩ b rɩk n tʋm koe-moonegã pʋgẽ wã zugu. Sã n mikame tɩ kɩbay nins b sẽn kõ tɩ b vaeesã yɩɩda y na tõog n wɛgs wakatã b sẽn kõ wã pʋgẽ, tũus-y b rãmb nins sẽn na n zems n yɩɩg ne yãmb tigingã mooneg zĩiga. Y tõe n tũnuga ne yɛl maaneg zĩig sẽn zems ne yãmb moonegã zĩiga.

⁵ Modg-y n maan y sẽn tõe fãa wa sẽn zems n maan sõss nins fãa b sẽn kõ-y lekollã pʋgẽ wã. Rɩk-y sẽk n segl-b neere, la y gom ne pʋ-peelem. Y na n daoola tigingã neba, sẽn paase, y sã n kẽes y meng yʋʋmd 2001 Teokaratik ministɛɛrã lekoll pʋgẽ ne y sũur fãa, na n nafa yãmb mengã.