Yʋʋmd 2015 Wẽnnaam tʋʋmdã lekoll na n sõnga tõnd tɩ d maneg n zãms nebã Biiblã

¹ Yɩɩl-gʋlsd a Davɩɩd ra yeela woto: “Zu-soabã sẽn yaa mam pĩig la mam fãagda, bɩ y kɩt tɩ mam noorã goam ne m sũurã tagsg zems yãmb nin gesgo.” (Yɩɩl 19:15) Tõnd me ratame tɩ d noorã goam ta a Zeova yam. Sẽn paase, d sũur nooma d sẽn paam n gomd sɩdã yell tigingã pʋgẽ, la koe-moonegã sasa wã. Wẽnnaam tʋʋmdã lekoll yaa bũmb a yembr Wẽnnaam sẽn tũnugd n sõngd tõnd tɩ d paasd d koe-moonegã minim. Dũniyã gill zugu, d maanda lekoll-kãngã semen fãa, d tigimsã sẽn yɩɩd tus-koabg la piig la a ye wã pʋsẽ. Lekollã sõnga rap la pagb toor-toor tɩ b tõe n moon koe-noogã sõma, la b zãms neb Biiblã ne yam la raoodo, tɩ b sak n deege.—Tʋʋ. 19:8; Kol. 4:6.

² Yʋʋmd 2015 soabã pʋgẽ, lekollã sõssã na n tika sɛb wala bãmbã: Y sẽn na n bãng bũmb ning Wẽnnaam Gomdã pʋgẽ sebrã, Étude perspicace des Écritures Volim a 1 sebrã, ne Gũusg Gasgã. Sẽn paase, b booga wakat ning b sẽn kõ pipi karen-biigã, la zãmsg d sẽn paam Biiblã kareng pʋgẽ wã wakat me. D na n goma rẽ yelle, la noy nins karen-biig fãa sẽn segd n tũ wã me yelle.

³ Zãmsg d sẽn paam Biiblã kareng pʋgẽ: Saam-biig ning sẽn na n wɛgs bab-kãngã wã segd n deng n sõsa minit a yiib pʋgẽ. A na n yãka bũmb a ye a sẽn yã zĩig ning d sẽn karem semennã pʋgẽ wã, n sõs rẽ zug sõma. Sẽn na yɩl n da loog minit a yiibã, rẽndame t’a segl neere. A segd n basa minit a yoob n kõ kɛlgdbã tɩ b wilg bũmb ning sẽn yɩ-b noog Biiblã kareng pʋgẽ. La ned kam fãa pa segd n gom tɩ yɩɩg segõnd 30 ye. Yɩl n tõog n togs bũmb sẽn kengd raood segõnd 30 pʋgẽ, rẽnda d segl sõma, la d ra gom wʋsg ye. La d sã n tõog n maan woto, na n nafd-d lame, la kɩt tɩ d taabã me paam n togs sẽn yɩ-b noogo.

⁴ Sõsg N° a 1: B booga wakat ning b sẽn yãk Biiblã kareng yĩngã tɩ lebg minit a tãab bɩ sẽn pa ta rẽ, la b kʋʋg karengã woglem me. Sẽn na n karm-a wã sã n wa segend a menga, a tog n zẽka a koɛɛg n karem babg ning b sẽn kõ-a wã n yɩlme, n boond gom-biisã sõma. Woto, a karengã na n talla yamleoogo, tɩ nebã tõe n wʋm nana-nana. Kiris-ned hakɩk fãa segd n maoome n bãng kareng sõma, bala, kareng tara yõod wʋsg tõnd tũudmã pʋgẽ. D sũur yaa noogo, d kom-bõonegã wʋsg sẽn karemd sõma wã. D pẽgda roagdbã, b sẽn sõngd b kambã sẽn na yɩl tɩ b bãng karengã.

⁵ Sõsg N° a 2: Yaa saam-bi-poak n segd n wɛgs sõs-kãngã minit a nu pʋgẽ. Karen-biigã pa segd n toeem gom-zug ning b sẽn kõ-a wã ye. Sõsgã sã n tika Y sẽn na n bãng bũmb ning Wẽnnaam Gomdã pʋgẽ sebrã, karen-biigã segd n wɛgs-a lame tɩ sɩd yɩ mak-sõng nebã sẽn tõe n tũ koɛɛgã mooneg sasa. Sã n yaa ned kibar sẽn be Biiblã pʋgẽ tɩ b wɛgs-a Étude perspicace volim a 1 sebrã pʋgẽ, karen-biigã segd n gesa gom-zug ning b sẽn kõ-a wã, n gom rẽ yell bala, la a tũus vɛrse nins a sẽn na n karmã. A segd n wilga yam ning d sẽn tõe n dɩk nin-kãng kibarã pʋgẽ me. A tõe n paasa vɛrse a taab me sẽn zems ne a gom-​zugã. Yaa lekollã yel-gɛt n na n yãk sõsd-n-taag n kõ-a.

⁶ Sõsg N° a 3: Yaa saam-biig bɩ saam-bi-poak n na n wɛgs sõs-kãngã minit a nu pʋgẽ. Sã n yaa pag n na n wɛgs sõs-kãngã, a segd n tũu noy nins b sẽn kõ sõsg N° a 2 wã yĩngã. La sã n yaa raoa, tɩ sõsgã yit Étude perspicace sebrã pʋgẽ, a segd n tagsa a kɛlgdbã yelle, n wɛgs-a wa diskuuri. Karen-biigã segd n gesa gom-zug ning b sẽn kõ-a wã, n gom rẽ yell bala, la a tũus vɛrse nins a sẽn na n karmã. A segd n wilga yam ning d sẽn tõe n dɩk kibarã pʋgẽ me.

⁷ Saam-biisã sẽn na n wɛgsd sõsg N° a 3 wã to-to masã: Sõsgã sã n tika Y sẽn na n bãng bũmb ning Wẽnnaam Gomdã pʋgẽ sebrã, saam-biig ning sẽn na n wɛgs-a wã segd n talla sõsd-n-taaga. A na n wɛgs-a lame tɩ yɩ wa zak rãmb sẽn zãmsd Biiblã, pa rẽ bɩ yɩ wa ned la a moond koɛɛgã. Naoor wʋsgo, yaa lekollã yel-gɛt n na n yãk sõsd-n-taaga, la a yãk kaadr n kõ sõsdã. A sõsd-n-taagã tog n yɩ a zakã neda, bɩ tigingã ned a to. Sõsdã tõe n paasa vɛrse a taab sẽn zems ne a gom-zugã. B tõe n mi n yãka kãsem-soab t’a wɛgs sõs-kãnga. Sã n yaa kãsem-soab n na n wɛgs-a, yẽ n na n yãk a sõsd-n-taagã, la a kaadre. Vẽenega, tigingã neb sã n yã kãsem-soab sẽn wɛgsd sõs-kãensã to-to ne a zakã neda, pa rẽ bɩ ne saam-biig a to, b na n dɩka yam.

⁸ Saglsã: Karen-biig fãa sõsg poore, lekollã yel-gɛt na n pẽg-a lame, la a tik Tirez profit de l’École du ministère théocratique sebrã n sagl-a minit a yiib pʋgẽ. Nand tɩ lekollã yel-gɛt bool karen-biigã t’a wa sɩnge, a pa segd n togs nebã lekollã sebr saglg ning karen-biigã sẽn na n tũ wã ye. La karen-biig fãa sõsg poore, lekollã yel-gɛt sã n pẽg-a n sa, a tog n togsa lekollã sebr saglg ning karen-biigã sẽn da tog n tũ wã. Karen-biigã sã n tũume bɩ a togs bũmb ning sẽn wilgd t’a sɩd tũu saglgã. La a sã n pa tũ, yel-gɛtã segd n sõng-a-la ne bʋgsem t’a bãng bũmb ning sẽn kɩt tɩ yaa sõma t’a maneg n tũ saglgã.

⁹ Saglsã bee École du ministère sebrã neng 79-​81. Karen-biig sã n wɛgs a sõsg n sa, lekollã yel-gɛt na n gʋlsa karen-biigã sebrã pʋgẽ, la a sok-a n ges a sã n tõog n tʋma tʋʋmdã sẽn be sebrã pʋgẽ wã. Tigsgã poor bɩ wakat a to, lekollã yel-gɛtã tõe n boola karen-biig ning n kõ sagls a taaba. Karen-biig fãa segd n ninga a yamẽ tɩ saglsã yaa sẽn na n sõng-a t’a tẽebã pãng paase.—1 Tɩm. 4:15.

¹⁰ Karen-biig sã n yõsg wakatã, lekollã yel-gɛt wall ned a sẽn yãk segd n maana rãamd t’a bãnge, la tog n yɩɩ ne yam. Karen-biigã sã n wʋm rãamdã, a segd n kʋʋga a sõsgã.—Ges-y École du ministère sebrã neng 282 sull a 4.

¹¹ Sagl neb nins fãa sẽn kõt mak-sõng tigingã pʋgẽ wã tɩ b kẽ Wẽnnaam tʋʋmdã lekolle. (Ges-y École du ministère sebrã neng 2​82 sull a 6.) Lekoll-kãngã sõnga a Zeova nin-buiidã tɩ b tõe n zãms nebã Wẽnnaam daabã la b taas-b Rĩungã koe-noog ne bas-yardo, ne waoogre, la ne nonglem. Sãmbg sẽn ka be, a Zeova sũur yaa noogo, a tʋʋmdã lekoll sẽn sõngd karen-biisã tɩ b pẽgd-a wã.—Yɩɩl 148:12, 13; Ezai 50:4.