Lekoll sẽn segend tõndo, yɛl nins sẽn tar yõod n yɩɩdã yĩnga

¹ Neba rabda lekoll sẽn na yɩl n paam bãngr sẽn na n sõng-b tɩ b pids b bõn-datɩ vɩɩmã pʋgẽ. La bõn-datl bʋg n le be t’a yõod yɩɩd f sẽn na n pẽg vɩɩmã Kõat menga, la f sõng neb a taabã tɩ b bãng a raabã la a soayã? Kae ye. Wẽnnaam tʋʋmdã lekoll bõn-datl yaa segl tõnd tɩ d zãms neb a taabã tõnd tẽebã. Dẽ, d sã n kelgd zãmsgã b sẽn kõt Wẽnnaam tʋʋmdã lekollẽ wã semen fãa, d paamda tõod sẽn na n segl-d vɩɩmã tʋʋm nins sẽn tar b yõod n yɩɩdã yĩnga.

² B yiisa “Wẽnnaam tʋʋmdã lekoll na-kẽndr yʋʋmd 2003 yĩnga” kiuug ning sẽn loogã Rĩungã Tʋʋmd pʋgẽ. Lekollã na-kẽndr tara yɛl toɛy-toɛy sẽn wilgd lekollã sẽn segd n maan to-to. Y sẽn na n talld Tirez profit de l’École du ministère théocratique sebrã n wat Wẽnnaam tʋʋmdã lekollẽ semen fãa wã yĩngã, yɩta bũmb sẽn zems tɩ y kell n bĩng lekollã na-kẽndr sebr seb-kãng pʋgẽ. D ges Wẽnnaam tʋʋmdã lekoll yʋʋmd 2003 wã yĩngã yel-zẽngds kẽere.

³ Sõasg minim: Sẽn sɩng ne yʋʋm-vẽkr kiuugã, lekoll fãa na n sɩnga ne minit a nu diskuuri, sẽn gomd sõasg minim tikr yelle, bɩ sebr karengã, zãmsgã la zãmsg kũunã neng a yembr yelle. Yaa lekollã yel-gɛt n na n kõ sɩngr sõs-kãense, a tõeeme me n yãk kãsem soab a to sẽn tar tõog t’a kõ sõsgã. Sõasdã tõe n sõsa sõasg minim tikr võor bɩ a yõod zugu. Rẽ poore a segd n paasa yɛl a taaba, n gom makr sẽn be Gʋlsg Sõamyã pʋgẽ yelle, bɩ a mak b sẽn tõe n tũnug ne sõasg minim tikrã to-to n wilgi. A na n wilga rẽ maaneg sẽn tõe n sõng tɩ koe-moonegã yɩ sõma n paas to-to vẽenega.

⁴ Sõasg N° a 1: B leb n sagla saam-biis nins sẽn kõt zãmsg sõasgã tɩ “b segd n wilga sõasgã tagsa yõod vẽenega.” Woto rat n yeelame tɩ b wilg tigingã b sẽn tõe n tũ zãmsgã to-to. B sã n kõ yãmb sõs-kãngã, bɩ y ges École du ministère sebrã seb-neng 48-9 wã n paam sagls sẽn wilgd zãmsgã sẽn segend to-to, la y vaees referãns rãmbã sẽn be sebrã ẽndɛgsẽ, zĩig ning b sẽn yet tɩ “Application pratique.”

⁵ Biiblã kareng na-kẽndre: Pĩndã yãmb sã n da ka tõog n maan semen fãa Biiblã karengo, bõe yĩng tɩ y ka na n dɩk sard kãn-kãe n tũ rõandã karengã na-kẽndre? Neb nins sẽn maand woto wã na n tõog n saa kiris-neb Gɛrk Gʋlsgã kareng yʋʋmdã sɛɛbẽ. École du ministère sebrã seb-neng 10 sull a 5 pʋgẽ, b wilga Biibl kareng na-kẽndr sẽn sɩngd ne kiris-neb Gɛrk Gʋlsgã yõodo.

⁶ Biiblã kareng tags-kãsemse: Sõs-kãngã woglem paasame tɩ ta minit piiga, sẽn na yɩl tɩ kɛlgdbã tõog n togs b tagsg sags nins b sẽn karem semenã pʋgẽ wã zutu. Neb nins b sẽn kõ sõs-kãngã wã ka segd n loog wakatã ye. B na n wilga sõs-kãngã semen fãa, semen ning b sẽn na n maan lebg-n-ges ne sogsg la leoorã sẽn naage. Yãmb sã n karemd sags nins b sẽn yãk semenã yĩngã, bao-y tagsa sẽn na n naf yãmb y zak pʋgẽ zãmsgã pʋgẽ, y koe-moonegã wakate, bɩ y mengã vɩɩm pʋgẽ. A Zeova zʋg-sõma bʋs n puk a manesmã ne nebã la ne buud toɛy-toɛyã pʋsẽ? Bõe la yãmb zãms-yã, tɩ keng yãmb tẽebã la paas yãmb mi-beoogã ne a Zeova? Y tõe n togsa y tagsgã zĩig ning fãa y sẽn data, babg ning b sẽn yãk tɩ b karmã pʋgẽ, baa yaa verse nins b sẽn na n karem sõasg n^o a 2 soabã wakatã pʋsẽ, bala saam-biig ning sẽn na n karem verse kãensã wã ka na n togs a tagsg b zut ye.

⁷ Sõasg N° a 2: Semen fãa, pipi karen-biigã sẽn na n maan bũmb ning yaa karem sebr zãma taoore. Kiuug fãa, zĩig ning b sẽn yãk tɩ b karmã na n yii semenã Biibl kareng pʋgẽ, sã n pa kiuugã yaoolem semene. Kiuugã yaoolem semene, karengã na n yɩɩ Gũusg Gasgã pʋgẽ. Karen-biigã na n karma verse nins b sẽn yãk t’a karmã n ka bao n togs sɩngr bɩ baasg goam ye. Woto, a na n tõog n tika a yamã a karengã minim zug n yɩɩda.—1 Tɩm. 4:13.

⁸ Sõasg N° a 3 la a N° a 4: Sõs-kãensã kẽer tagsa yita Comment raisonner sebrã pʋgẽ n yɩɩda, la ne sõss kẽere, yaa gom-zugã la b kõ n ka wilg tagsa wã sẽn segd n yiẽ ye. B rãmb nins b sẽn kõ sõasg tɩ seb-tikdmã b sẽn kõ wã ka tar tagsa wʋsgã, bɩ yaa gom-zug bal la b kõ n ka paas seb-tikdmã na n vaeesa tõnd kiris-neb sɛbã n paam tagsa n wɛgs b sõasgã. Tõe tɩ woto kɩt tɩ yɩ nana n yɩɩg ne saam-bi-pogsã tɩ b zems b tagsa wã ne b sõsd-n-taagã.

⁹ Sõasgã zĩiga: Wa b sẽn wilg École du ministère sebrã seb-neng 45 pʋgẽ wã, lekollã yel-gɛt tõe n yãka sõasgã zĩig n kõ karen-biigã. A sã n ka yãke, saam-bi-pogsã tõe n yãka sõasg zĩig sõasg zĩisã sẽn be seb-neng 82 pʋgẽ sʋka. Saam-bi-poak sã n kõt sõasg vugr kiis a yiib fãa, a na n dɩka yʋʋm a 5 bɩ sẽn yɩɩd woto n tõog n tũnug ne sõasg zĩis toɛy-toɛy 30 wã fãa b sẽn kõ wã n sa. Saam-bi-pogs nins sẽn na n yãk n^o 30 soabã, sẽn yaa “Sõasg zĩig a to sẽn zems ne yãmb babgã,” segd n gʋlsa sõasgã zĩig sẽn ya a soabã b sõasg kũun sebrã (S-89) tẽngre, bɩ a poore. Lekollã yel-gɛt na n gʋlsa karen-biigã sẽn kõ sõasgã wakat ningã a sebrã seb-neng 82 wã pʋgẽ, n kɛgl sõasg zĩig ning a sẽn tũnug ne wã. A tõe n maana rẽ wakat ning a sẽn gʋlsd karen-biigã sagls sebr pʋgẽ karen-biigã tʋʋmd sẽn yɩ to-to wã.

¹⁰ Sagls sebre: Yãmb sagls sebrã bee yãmb sebrã pʋgẽ. Y tõe n yã-a-la seb-neng 79-81 pʋgẽ. Woto yĩnga, sõasg fãa y sẽn kõ poore, y segd n kɩsa lekollã yel-gɛt y sebrã. Lekollã yel-gɛt segd n tara zĩig a sẽn gʋlsd zĩis nins karen-biisã sẽn tʋmdã n bĩngdẽ.

¹¹ Lebg-n-ges ne sogsg la leoore: Wẽnnaam tʋʋmdã lekoll lebg-n-ges na n maana ne sogsg la leoor bal tɩ gʋlsg ka zĩnd ye. B na n maan-a-la vugr kiis a yiib fãa, la a na n dɩka minit 30. Sogsg nins b sẽn na n maan lebg-n-gesã wakatã na n ket n pukda Rĩungã Tʋʋmd pʋgẽ. Lebg-n-ges ne sogsg la leoorã semen sã n sɛga tigims gĩnd tigis-kãsengã bɩ tigims gĩnd yel-gɛtã gesg semene, semen kãnga b na n maana semen ning sẽn pʋgdã sõsse, la b viig lebg-n-ges ne sogsg la leoorã n lebs semen ning sẽn pʋgdã pʋgẽ.

¹² Karen-do-pʋgdse: Tigingã pʋgẽ tɩ karen-biisã sõor sã n yɩɩd 50, kãsem dãmbã tõeeme n maan karen-do-pʋgdse. “Karen-do-pʋgdsã tõe n yɩɩ karen-biisã fãa yĩnga, bɩ yaoolem karen-biis a yiibã yĩng bala.” (École du ministère, s.n. 285) B kõo sagl-kãngã sẽn na yɩl n sõng tigims nins sẽn tar saam-bi-pogs wʋsgo, tɩ saam-biis wʋsg ka be n na n maan Biiblã karengã. Kãsem dãmbã segd n yãka saam-biis sẽn tar tõog tɩ b ges karen-do-pʋgdsã yelle.

¹³ Sagend sõngdã: Wa b sẽn wilg Wẽnnaam tʋʋmdã lekoll na-kẽndr pʋgẽ wã, kãsem dãmbã sull na n yãka sagend sõngd t’a kõt kãsem dãmb la kãsemb sõngdb nins sẽn kõt Biiblã kareng tags-kãsemsã la zãmsg sõssã saglse, la a ka maand rẽ neba sʋk ye. Saam-biig ning sẽn segd n maan tʋʋm kãngã wã segd n yaa ned sẽn tar minim, n yaa ned kãsem dãmb a taabã sẽn na n sak a saglse. A saglsã segd n kenga raoodo. A na n pẽga goam bɩ zãmsg kũun manesem sẽn yaa sõma b sẽn tũnug ne, la a kõ saglg zĩig a yembr bɩ a yiib zugu, sẽn na yɩl tɩ b maan tɩ yɩ sõma n paase. Pa tɩlae t’a kõt saam-biig sẽn kõt sõss naoor wʋsg saglse, a sõasg fãa poor ye. La sagend sõngdã segd n yɩɩ tags-tɩ-bɩ soaba, la a bãng t’a tõe n sõnga baa saam-biis nins sẽn kõt zãma sõss masã wã tɩ b maan tɩ yɩ sõma n paase.—1 Tɩm. 4:15.

¹⁴ Sagendbã sẽn segd n bao n yã bũmb ningã: Bõe n tõe n sõng sagend t’a vaees sõasg wɛgsgo? École du ministère sebrã sags 53 wã sʋka, sags wʋsg sẽn yɩɩd pʋsẽ zĩ-gũbr a tãab-n-soabã kʋmsa a sẽn segd n bao n yã bũmb ningã koɛɛg-koɛɛga. Lekollã yel-gɛt leb n segd n baoo sebrã sagls a taab sẽn na n sõng-a t’a tõog tao-tao n bãng sõasg tagsa siglame tɩ zems taab neer bɩ a wɛgsg sã n yɩɩ sõma. Wala makre, ges-y sogsgã sẽn pʋg taab seb-neng 55 wã zugã, la tagsa nins sẽn be seb-neng 163 pʋgẽ yaoolem sullẽ wã.

¹⁵ Pids-y zĩ-vɩɩdã: Seb-nensã kɩremsẽ b sẽn yãk zĩ-yalems n bas vɩɩdã sẽn yãk b toogo, École du ministère sebrã tara zĩ-vɩɩd wʋsg b sẽn yãk n kõ-y tɩ y tõe n gʋls tagsa y meng zãmsgã sasa, la Wẽnnaam tʋʋmdã lekoll maaneg wakate. (Ges-y seb-neng 77, 92, 165, 243, 246, la 250.) Modg-y n tall y sebrã n wa lekollã wakat semen fãa. Sɩngr sõasgã wakat bɩ y get sebrã pʋgẽ n tũud sõasdã tagsa. Lekollã wakat ning sẽn ketã pʋgẽ bɩ y ra pag y sebrã ye. Ges-y sagls nins lekollã yel-gɛt sẽn kõtã. Gũus-y n kelg bɩ n ges zãmsg kũun manesem, sogsgo, makre, gom-makdem la te-makdem toɛy-toɛy sõasdbã sẽn tũnugd ne wã. Y sã n gʋls tagsa sẽn tar yõodo, y tõe n wa tẽegame n tũnug ne tags sõma wʋsg y sẽn paam lekollã pʋgẽ.

¹⁶ A Zezi Kirist ra miime tɩ Wẽnnaam Rĩungã koe-moonegã yaa waoogr tʋʋmd sẽn yaa kãseng n yɩɩd b sẽn tõe n kõ ned buud fãa t’a maane. Ra yaa yẽ mengã tʋʋmd ning sẽn da ya-a kãseng n yɩɩdã. (Mark 1:38) A yeelame: “Yaa tɩlae tɩ mam moon Wẽnnaam soolem koe-noog[ã] . . . tɩ bõe, b tʋma maam bõn-kãng yĩnga.” (Luk 4:43) Wa neb nins a Zezi sẽn bool tɩ b wa tũ-a tɩ b sakã, tõnd me wɩngda sõma ne koe-noogã moonego, la wakat fãa d maooda sẽn na yɩl tɩ d sẽn kõt ‘maand daar fãa sẽn yaa pẽgrã’ yɩ sõma n paase. (Heb. 13:15) Sẽn na yɩl n tõog n maan dẽ, bɩ d rɩk sard sẽn ka vigsd n kẽesd d mens Wẽnnaam tʋʋmdã lekollẽ wakat fãa, t’a yaa lekoll sẽn na n sõng n segl-d vɩɩmã yɛl nins sẽn tar yõod n yɩɩdã yĩnga.