A Zeova zãmsda tõnd sẽn na yɩl tɩ d tõog n tʋm a tʋʋmdã
1. A Zeova sã n bobl ned tʋʋmde, bõe la a maand n paase?
1 A Zeova sã n bobl ned tʋʋmde, a sõngda a soabã t’a bãng a sẽn segd n tʋm-a to-to. Wala makre, a sẽn yeel a Nowe t’a ka koglgã, t’a yaool n da zɩ n ka a buudã, a wilg-a-la a sẽn segd n maan to-to. (Sɩng. 6:14-16) A Zeova sẽn wa n yãk pe-kɩɩm a Moiiz t’a tɩ gom ne Israɛll nebã kãsem dãmbã la a Faraõ wã, a yeel-a-la woto: “Mam na n zĩnda ne fo noore, la m zãms foo bũmb ning fo sẽn tog n togsã.” (Yik. 4:12) A Zeova sẽn bobl tõnd koe-noogã moonegã, a wilgda tõnd d sẽn segd n moon to-to. A tũnugda ne Wẽnnaam tʋʋmdã lekollã, ne Tʋʋmdã tigisgã n wilgd tõnd d sẽn segd n moon koɛɛgã to-to. Wãn to la d tõe n dɩ tigis-kãensã a yiibã nafa?
2. Wãn to la d tõe n dɩ Wẽnnaam tʋʋmdã lekollã nafa?
2 Wẽnnaam tʋʋmdã lekollã: D reng n karem bũmb nins d sẽn na n zãms tigisgã sasa wã n yaool n kẽnge. Y sã n kelg karen-biisã sẽn na n wɛgs b sõssã to-to wã, na n sõng-y lame tɩ y bãng y sẽn na n zãms nebã Biiblã to-to. (Yel. 27:17) Zãad-y École du ministère sebrã n kẽnd tigisgã. Lekollã yel-gɛt sã n wa gomd saglg sẽn be a pʋgẽ yelle, bɩ y rẽeg zĩis nins y sẽn dat n tũ wã, wall y gʋls sebrã kɩrengã. Sẽn na yɩl n dɩ Wẽnnaam tʋʋmdã lekollã nafa, sẽn yɩɩd fãa yaa yãmb me sẽn na n gʋls y yʋʋr lekollã pʋgẽ. Yãmb gʋlsa y yʋʋr bɩ? B sã n kõ-y sõsga, bɩ y segl y meng sõma la y tũ sagls nins b sẽn na n kõ-yã. Y sã n wa moond koɛɛgã bɩ y tũ bũmb ning y sẽn zãmsã.
3. Bõe n na n sõng tõnd tɩ d rɩ Tʋʋmdã tigisgã nafa?
3 Tʋʋmdã tigisgã: D sã n deng n karem bũmb nins d sẽn na n zãms tigisgã sasa wã, la d segl d mens n kõ leoore, na n kɩtame tɩ d ra yĩm bũmb nins d sẽn zãmsã ye. D sã n leokd koɛɛg-koɛɛga, na n kɩtame tɩ neb wʋsg paam n leoke. Ges-y mak-n-wilg rãmbã sõma, la y tũ sagls nins y sẽn tagsd tɩ na n sõng-y-la koɛɛgã mooneg pʋgẽ wã. Rĩungã Tʋʋmd sã n gom bũmb yelle, tɩ y miẽ tɩ na n sõng-y-la moonegã sasa, bɩ y bĩng-a yambẽ.
4. Bõe yĩng tɩ d segd n tũ sagls nins d sẽn paamd a Zeova nengẽ tigissã sasa wã?
4 Wa a Zeova sẽn kõ a Nowe la a Moiiz tʋʋmd sẽn da pa nana wã, a sẽn yeel tõnd me tɩ d moon dũniyã neb fãa wã me pa tʋʋmd sẽn yaa nana ye. (Mat. 24:14) La d sã n teeg a Zeova sẽn yaa d karen-saamb sẽn ka to wã, la d tũud sagls nins a sẽn kõt-dã, d na n tõog n tʋma a tʋʋmdã sõma.—Ezai 30:20.