D kõ kasetã wakat buud fãa
1. Bõe n wilgd tɩ pipi kiris-nebã ra tagsdame tɩ b segd n kõo kasetã wakat buud fãa?
1 Pipi kiris-nebã kẽnga zĩis nins fãa b sẽn tõe n yãẽ nebã, n moon koe-noogã “n ka bas ye.” (Tʋʋ. 5:42) Yaa vẽeneg tɩ b sã n da moond zak-zak n yã ned sorã zugu, b pa basd n pa taas-a koɛɛgã ye. B sã n da moon koɛɛgã n sa, n tek n tũ raagẽ n na n da teedo, b sã n paam segb beenẽ, b taasda koɛɛgã. Wala a Zezi, b ra tagsdame tɩ b segd n kõo kasetã wakat buud fãa.—Mark 6:31-34.
2. B sẽn boond tõnd t’a Zeova Kaset rãmbã wilgda bõe?
2 Segl-y y meng segb fãa yĩnga: B sẽn boond tõnd t’a Zeova Kaset rãmbã, pa yʋʋr woto bal ye. Wilgdame tɩ wakat fãa, d kɩta Wẽnnaam kaseto. (Ezai 43:10-12) Dẽnd rat n yeelame tɩ d segla d mense, tɩ wakat fãa bɩ d tõe n wilg nebã bũmb nins d sẽn tẽedã, baa d pa yi n na n moon zak-zaka. (1 Pɩɛ. 3:15) Rẽ yĩnga y mi n tagsd n geta segb nins y sẽn tõe n paam n moon koɛɛgã, la y baood y sẽn na n yeel bũmb ninsã bɩ? Y nong n tara sɛb y sẽn tõe n kõ ned sẽn kelg koɛɛgã bɩ? (Yel. 21:5) Yaa zak-zak bal la y moond bɩ, bɩ y mi n moonda zĩis a taab me?
3. Sẽn na yɩl n tõog n tʋm d tʋʋmdã neere, yaa tɩlae tɩ d moond zĩ-bʋs me?
3 Zĩis a taab d sẽn segd n moone: D mi n yetame tɩ tʋʋmã zĩisẽ, soayã noy, koosmã zĩisẽ, la raasã pʋsẽ yaa zĩis d sẽn tõe n moone. La woto tõe n kɩtame tɩ d tags tɩ zĩ-kãensã moonegã pa tɩlae ye. Tʋm-tʋmd a Poll yaool n yeelame tɩ yẽ moona koɛɛgã “nebã sʋka,” la rot pʋsẽ. (Tʋʋ. 20:20) Woto yĩnga, d segd n ninga d yamẽ tɩ zĩ-kãensã yaa zĩis d sẽn segd n moone. Yaa sɩd tɩ yaa zak-zak la d moond n yɩɩda, tɩ ne rẽ bɩ d paamd n taasd nebã Rĩungã koɛɛgã tɩ womd biis wʋsgo. La pipi kiris-nebã sẽn da baood n yɩɩd yaa b paam neb n taas-b koɛɛgã. Sẽn da yaa zĩig ning fãa la b yã neda, yaa zamã sʋk tɩ yaa zak pʋgẽ bɩ zĩig a to, b taasd-a-la koɛɛgã. Bɩ tõnd me maand wa bãmba, sẽn na yɩl n tõog n tʋm d tʋʋmdã neere.—2 Tɩm. 4:5.