Koɛɛgã mooneg zak-zakã
1. Sok-bʋg la b sokd koɛɛgã mooneg zak-zakã wɛɛngẽ, la bõe yĩnga?
1 “Koe-moondb nins sẽn tar minim koɛɛgã mooneg nens toɛy-toɛy pʋsẽ wã sak n deegame tɩ rũndã-rũndã koɛɛgã mooneg wɛɛngẽ, L’AURORE DU MILLÉNIUM sebrã tall n sõs ne nebã zak-zakã yaa sõma n yɩɩda.” Gom-kãensã sẽn yit yʋʋmd 1893 sẽoog kiuug pipi daar Gũusg Gasgã ne ãngilindã pʋgẽ wã wilga koɛɛgã mooneg zak-zakã yõod sẽn ta zĩig ninga. Koɛɛgã mooneg zak-zakã kɩtame tɩ dũniyã gill zugu, nebã mi a Zeova Kaset rãmbã n bake. La tẽns wʋsg pʋsẽ, nebã yãab yir sẽn lebg toogã yĩnga, koɛɛgã mooneg zak-zakã ket n tara yõod bɩ?
2. Biiblã zĩ-bʋs n wilgd tɩ b segd n moona koɛɛgã zak-zaka?
2 A tika Biiblã zugu, la a tar yõod me: Koe-moonegã zak-zakã tika Gʋls Sõamyã zugu. A Zezi kõ a karen-biis 70 wã noor tɩ b tũ taab yiib-yiib n tɩ moon koe-noogã nebã zagsẽ. (Luk 10:5-7) Biiblã togsame t’a Zezi kũumã loogr poor bilf bala, “daar fãa Wẽnnaam dooga pʋgẽ ne dot pʋsẽ [karen-biisã] zãmsa nebã la b moon a Zezi Kirist koe-noogã n ka bas ye.” (Tʋʋ. 5:42) A Poll me tũu zak-zak n zãms nebã ne yẽesem.—Tʋʋ. 20:20.
3. Zak-zakã moonegã nafa kẽer la bʋse?
3 Koɛɛgã mooneg zak-zakã ket n kɩtdame tɩ koe-noogã tat zĩig zãng rũndã-rũndã. A sõngda tõnd tɩ d baood neb nins sẽn sɩd rat n kelg koɛɛgã zĩisã fãa sõma. (Mat. 10:11) Naoor wʋsgo, nebã sã n be b zagsẽ wã, b sakd n sõsdame. D sã n pẽneg nebã n gomd ne-ba, n kelgd-b la d get b nensã la bũmb nins sẽn kar n gũbg-bã, sõngd-d lame tɩ d bãng bũmb nins b sẽn datã la sẽn pak-bã. Naoor wʋsgo, woto kõt-d-la sor tɩ d tõe n sõs ne neb n kaoose.
4. Wãn to la d tõe n kɩt tɩ zak-zak koe-moonegã wom biis sõma?
4 D sak n maan toeengo: Tʋm-tʋmd a Poll ra toeemda a yɛlã koe-noogã yĩnga. (1 Kor. 9:23) Tõnd me tõe n manega d sẽkã n tõog n moon wakat ning d sẽn tõe n yã nebã b zagsẽ wã. Wala makre, zaabre, wɩkɛn dãmbã wall b sẽn wat n tar vʋʋsmã. Gʋls-y zags nins y sẽn pa yãẽ nebã nimero rãmb n lebg wa ges-b sasa a to wall daar a to.
5. Wãn to la d tõe n sõng neb nins sẽn pa tar laafɩ wʋsgã tɩ b tõog n moon koɛɛgã zak-zakã?
5 Baa neb nins sẽn pa tar laafɩ sõma wã tõe n naag n moona koɛɛgã zak-zakã. Wala makre, d tõe n dɩka segls tɩ nin-kãensã yãag-d tɩ d tɩ moon zags nins kõom sẽn yaa nana wã, la tɩ b ra kẽn wʋsg ye. Saam-bi-poak a ye n bẽed vʋʋsem bãaga, tɩ kɩt tɩ minit 30 pʋgẽ, yaa zak a ye bal la a tõe n moone. La ne rẽ fãa, a sũur yaa noog a sã n paam n tõog n moon koe-noogã ne a sullã nebã.
6. Bõe yĩng tɩ d segd n ket n moond koɛɛgã zak-zak wakat fãa?
6 Zak-zak koe-moonegã pʋgẽ, d ket n yãta neb nins sẽn wõnd piisã. Koe-moond a ye n kogs zak noor tɩ b yeela woto: “Kẽ tɩ mam mii fo sẽn yaa a soaba. M da pʋʋsda Wẽnnaam t’a tʋm ned t’a wa sõng-ma, la m sẽn wʋm ned sẽn kogs zakã noorã. Yaa Wẽnnaam n deeg-m pʋʋsgã n tʋm foo.” Woto wilgda vẽeneg t’a Zeova ningda zak-zak koe-moonegã barka. (Mat. 11:19) Bɩ d modg n ket n moond koe-noogã zak-zaka.