Zak-zak moonegã nafda tõnd mense
1 “Kẽng n saag zĩiga fãa Zerizalɛm n ning neb nins fãa sẽn wõosd n yãbd bõn-wẽns nins sẽn maand tẽnga pʋgẽ wã yĩnga rĩy bãnde.” Yaa woto la rao ning sẽn da tar bũmb sẽn tar n gʋlsdẽ wã ra segd n pids tʋʋmd ning a Zeova sẽn kõ-a tẽn-kʋdem wẽndẽ Zerizalɛmã yaoolem wakatã.—Eze. 9:2-11.
2 Rũndã-rũndã a Zeova Kaset rãmbã maanda tʋʋmd a woto buud dũniyã gill zugu. B taasda nebã koe-noogã ne yẽesem wʋsg zak-zaka, n baood neb nins sẽn dat n bãng sɩdã, la b keoogd neb nins sẽn ka rat n wʋm-a wã. Rẽ yĩnga yãmb maanda tʋʋm kãngã sẽn fãagd yõyã bɩ? Yãmb kẽesda y meng zãng-zãng a pʋgẽ, tɩ zems ne yãmb yɛlã sẽn kõt-y sor tɩ y tõe n maanã bɩ?
3 Modgr ning d sẽn maand tʋʋm kãngã pʋgẽ wã paamda keoobo, bala d neeme tɩ yʋʋmd fãa d sõngda neb tusa tɩ b bãngd sɩdã. Tõnd sẽn modgd n moond koɛɛgã zak-zakã wakat fãa wã, leb n nafda tõnd mens wʋsgo. Wãn-wãn to? Be neere, d ges sẽn pʋgdã:
■ A kɩtdame tɩ d nand sɩdã n paasdẽ. Tõnd sã n moond koɛɛgã zak-zak n paasdẽ fãa d yãta nebã sẽn ‘wõosd n yãbd bõn-wẽns nins sẽn maandã’ yĩnga n yɩɩda. D kɩta sɩd tɩ Biiblã bãngr-goam paamda pidsgu, la d bãngdẽ tɩ yaa a Zeova Rĩungã sẽn dɩt naam ne a Zezi Kirist maasmã la dũniyã zu-loees tɩɩm bala.
■ Rẽ sõngda tõnd tɩ d bao n tall la d bɩɩs vʋʋsem sõngã biisi. Sẽn na yɩl n tõog n ket n moond koe-noogã zak-zak la d ket n pẽdgd a pʋgẽ, rẽnda d bɩɩs vʋʋsem sõngã biis zãnga, sẽn yaa nonglem, sũ-noogo, laafɩ, sũ-mare, maan neere, sũ-maasem, tẽebo, sũ-bʋgsem la yõk-m-menga.—Gal. 5:22-24.
■ Rẽ sõngda tõnd tɩ d tõog ninsaal zoeese. Yãmb tẽra yãmb tagsg sẽn yɩ a soab y sẽn da wa n sɩng moonegã zak-zakã pipi wã bɩ? Bilf-bilfã d wat n bãngame tɩ sẽn tar yõod n yɩɩdã yaa koe-noogã mooneg la nebã keoogre, la tɩ nebã ne b sãbsgã fãa ka yell ne-d ye. Wala a Zeremi, d tara bas-m-yam t’a Zeova teend-d lame, tɩ rẽ me kengd tõnd tẽebã.—Zer. 1:17-19.
■ A kɩtdame tɩ d yɩ sik-m-mens rãmba. Pa kaoosd la d bãng tɩ ka ne tõnd tõog la d pãng la d sẽn maand tʋʋm-kãngã ye. D sã n kell n yaa sik-m-mens rãmba, n “ka tõdg” a Zeova n “leb poorẽ,” a Zeova na n kõo tõnd ‘gom-minim zɩlemd’ tɩ d bãng d sẽn “tog n leok” neba to-to.—Ezai 50:4-6.
■ A kɩtdame tɩ d tõe n gom n teel sɩdã sõma n paase. Sẽn na yɩl n tall Biiblã sẽn yaa Wẽnnaam Gomdã sẽn yaa wa sʋʋg sẽn dɩt noy a yiibã n tʋm sõma, rẽnda d minim n tʋmd ne-a. D sã n tũnugd ne Biiblã zak-zak koe-moonegã pʋgẽ wakat fãa, d na n yãame t’a “vɩɩme la a tara pãnga.”—Heb. 4:12.
■ A kengda tõnd tẽebo, la a kõt-d yĩns keelem. D sã n moond koɛɛgã zak-zak n ka vaandẽ, sõngd-d lame tɩ d yɩ gũusdb tẽebã wɛɛngẽ, tɩ rẽ kɩtdẽ tɩ d tar sũur kaset sẽn yaa sõma, tɩ paasd tõnd sũ-noogã. Koe-moondb wʋsg yãame tɩ b sẽn wɩsgd b mens n kẽnd n moond koe-noogã, paasda b yĩnsã laafɩ.
4 D sã n ges zak-zak moonegã sẽn nafd tõnd mens la sẽn kelgd-b tõndã wʋsg to-to wã, sãmbg sẽn ka be, d tara bʋʋm sõma n na n “ges bõn-kãensã n da bas ye,” sẽn dat n yeel tɩ d kẽes d meng a pʋgẽ zãng-zãnga, la wakat fãa.—1 Tɩm. 4:16.