Koe-moonegã sasa bɩ y ra sãam y sẽkã ye
Yʋʋmd 2014 soaba pʋgẽ, a Zeova Kaset rãmbã moona koɛɛgã lɛɛr milyaar a yiib la bala. Woto wilgda vẽeneg tɩ d tʋll n tʋma a Zeova tʋʋmã ne d sũy fãa. (Yɩɩl 110:3; 1 Kor. 15:58) Wakatã sẽn lebg bilfã yĩnga, wãn to la d tõe n maan n da sãam d sẽkã, n paam neb wʋsg n moon koɛɛgã?—1 Kor. 7:29.
Yɩl n da sãam d sẽkã koe-moonegã sasa, rẽndame tɩ d sakd n toeemd yɛl kẽere. Wala makre, sẽn yaa neng ning fãa la y moond koɛɛgã n pa paamd neb n sõsda, y tõe n toeema bũmb kẽer n tõog n paam neb wʋsg n sõse. Yɛlã pa yembr zĩig fãa ye. La sagls nins sẽn pʋgdã na n sõng-y lame tɩ y tõog n moon koɛɛgã sõma n da sãam y sẽkã ye.—1 Kor. 9:26.
Koɛɛgã mooneg zak-zakã: Na maan yʋʋma, koe-moondbã sɩngda koe-moonegã zak-zak yibeoog fãa. La neb wʋsg sẽn tʋmd yibeoogã, y tõe n moonda zak-zakã zaabre, wall zĩigã sẽn wat n sɩng sobgre. Bala, wakat kãng tɩ neb wʋsg bee b zagsẽ, n tar vɩʋʋgo. La yibeoog n tall n tãag midi wã sẽnese, soayã noor la koosmã zĩisẽ mooneg tõe n woma biis n yɩɩge.
Zãma wã zĩisẽ moonego: Koe-moondbã segd n dʋʋga sɛbã taabl wall puus-puus zugu, b koe-moonegã zĩis nins nebã sẽn tũud wʋsgã. (Ges-y yʋʋmd 2013 sẽoog kiuug Rĩungã Tʋʋmde, s.n. a 5.) Tiging sã n da moonda zãma sʋk tɩ nebã wa pa le tũud be wʋsg-wʋsgo, kãsem-dãmbã sull ning sẽn get koe-moonegã yellã tõe n kɩtame tɩ b tall taablã wall puus-puusã n toeem zĩiga.
Lebg-n-tɩ-ges wall Biibl zãmsgo: Y sã n pa mikd nebã b zagsẽ wakat ning yãmb sẽn yãk n moond koɛɛgã zak-zakã, yɩta sõma tɩ y kẽnd n kaagd y Biibl karen-biisã, pa rẽ bɩ neb nins y sẽn da zoe n moonã wakat-kãnga. Makre, sã n yaa sibr yibeoog la y wae n paamd neb wʋsg b zagsẽ, y tõe n tɩ y zãmsa nebã Biiblã zaabre, bɩ zĩigã sẽn wat n sɩng sobgre. Y sã n lebg n na n tɩ kaag nebã, koe-moondbã tõe n tũu taab yiib-yiibu, sẽn na yɩl n moon koɛɛgã sõma.
Yaa sɩd tɩ sẽn yaa koe-moonegã neng ning fãa pʋgẽ la d tʋm-yã, d tõe n gʋlsa wakatã. La yaa d koe-moonegã sã n womd biis la d sũur noom n yɩɩda. Y sã n gũusame n ges tɩ y sẽn moond koɛɛgã neng ningã la wakat ningã pa womd biisi, yɩta sõma tɩ y toeeme. Pʋʋs-y-yã a Zeova sẽn yaa “tigsgã soabã” t’a wilg-y sore, tɩ y tõog n da sãam y sẽkã koe-moonegã sasa ye!—Mat. 9:38.