Koe-moonegã yam-paalse
1. Mak-sõng bʋg la pipi kiris-nebã kõ tõndo?
1 Pipi kiris-nebã pa moon koɛɛgã zak-zak bal ye. B moon-a-la zãma sʋk me. (Tʋʋ. 20:20) Wala makre, b ra moonda wẽnd-doogẽ wã, bala b ra miime tɩ b tõe n sega neb wʋsg beenẽ. (Tʋʋ. 5:42) Atɛn soolmẽ wã, tʋm-tʋmd a Poll ra moonda daar fãa raag pʋgẽ. (Tʋʋ. 17:17) Rũndã-rũndã, ket n yaa zak-zak la d moond koɛɛgã n yɩɩda. Tõnd me moonda , koosmã zĩisẽ, pemsem kokr zĩisẽ, la zĩig ning fãa d sẽn tõe n paam neba. Baa b sẽn sagend koe-moondbã tɩ b wɩng ne koɛɛgã mooneg zĩig ning fãa b sẽn tõe n yã nebã, masã, koe-moondb wʋsg na n paam n moona koɛɛgã ne manesem paal a yiib sẽn be yamleoogo.
2. Koe-moonegã yam-paal-bʋg la b sɩng yʋʋmd 2011 sɩpaolg kiuugã?
2 Koe-moonegã yam-paall b sẽn sɩnge: Wa b sẽn wilg yʋʋmd 2013 aniyɛɛrã seb neng 16-17 wã, yʋʋmd 2011 sɩpaolg kiuugã pʋgẽ, b maka koɛɛgã mooneg yam-paall Niuyork soolmẽ wã. Saam-biisã rɩgla taabl-dãmb la vɩtr-dãmb n dogl tõnd sɛbã ne buud-goam toor-toor sorã noore, zĩis nins naoã rãmb sẽn tũud wʋsg-wʋsgã. Daar fãa, yaa neb tusa n tũud be, tɩ zags nins d sẽn pa tõe n paam n kẽ n moon koɛɛgã neba, la neb nins d sẽn pa mikd b zagsẽ wã be b sʋka. So-loaadbã wʋsg reega sɛbã. Sẽn nan pa kaoose, kiuug pʋgẽ, b pʋɩya periodik-rãmb 3797 la sɛb 7986. So-loaadb wʋsg kosa Biibl zãmsgo. D sẽn moond woto wã yaa sẽn na yɩl n paam n sɩng Biiblã zãmsg ne nebã. Woto yĩnga, d toola neb nins sẽn wilg tɩ b rat n bãng n paasame wã adɛrs-rãmb tigims nins sẽn tõe n tɩ sõng-bã tao-tao.
3. Wãn to la b moond koɛɛgã ne yam-paalã tẽns kẽer pʋsẽ?
3 Koe-moonegã yam kãngã sẽn womd biis wʋsgã, woto masã la b na n moond tẽns kẽer pʋsẽ nebã sẽn waoogẽ wã n yɩɩda. Tẽng fãa pʋgẽ, yaa filiyallã n na n wilg zĩis nins b sẽn tõe n moon a woto wã. Wae n yaa gaar-dãmbã pʋse, biru rãmbã wall etaaz-rãmbã sẽn waoogẽ tɩ naoã rãmb pɩʋʋgd wʋsgã. Rẽ poore, filiyallã toonda tigims nins sẽn na n tɩ moonã lɛta, la b kõ-b saglse. Yaa sɩd tɩ zĩis kẽere, b sak n tʋma sõngr so-pakdb me. La wae n yaa wakat fãa so-pakdbã la zall so-pakdbã la b tʋmda.
4. Wãn to la b moond koɛɛgã ne yam-paall tẽns kẽer pʋsẽ?
4 B sẽn moond to-to: Saam-biisã rʋʋgda tõnd sɛbã n gũudẽ tɩ so-loaadbã tõe n yã. Ned sã n kolg n na n gese, so-pakdbã yet-a lame t’a tõe n yãka sebr ning a sẽn date. A sã n tar sokre, b tikda Biiblã n leok-a. A sã n yãk sebre, b pa gomd yamleoog kũunã yell ye. La a sã n sok n na n bãng ligd ning tõnd sẽn tar n tʋmd d tʋʋmdã sẽn yitẽ, b wilgd-a lame tɩ yaa ligd nebã sẽn kõt ne yamleoogo. Rẽ poore, b wilgd-a lame t’a sã n date, a tõe n tũnuga ne adɛrs-rãmbã sẽn be sebrã pʋgẽ wã n tool kũuni. B sã n mi n ges tɩ tõeeme, b sokda a soabã woto: “Yãmb datame tɩ ned wa kaag-y bɩ?” wall b sok woto: “Yãmb miime me tɩ y sã n data, d tõe n wat n zãmsd-y-la Biiblã tɩ pa tũ ne yaood bɩ?”
5. Nafa bʋs la rao ne a pag sẽn moon koɛɛgã ne yam-paallã paam-yã?
5 Neb wʋsg sẽn naag n moon koɛɛgã ne yam-paallã sũy yɩɩ noog wʋsgo. Saam-biig a ye ne a pag yeela woto: “Daar fãa d sẽn da yas d taabl-dãmbẽ wã n yãt neb tusa sẽn loogdã kɩtame tɩ d miẽ tɩ siglgã sɩd maooda wʋsg sẽn na yɩl tɩ koɛɛgã ta nebã dũniyã gill zugu. D sẽn get zãma wã n tẽegdẽ t’a Zeova rata b ned kam fãa neerã kengda d raoodo, tɩ d tʋll n ket n lʋɩɩsd koe-moonegã taoore. D mamsda d yamẽ t’a Zeova feesda sẽn pɩʋʋgdb tõnd taablã taoorã ned kam fãa sũur n baood sũ-tɩrg soaba. D bãnga vẽeneg tɩ malɛgsã sɩd sõngda tõnd tʋʋmdã pʋgẽ.”
6. a) Koe-moonegã yam-paal-bʋg me la tigims wʋsg sɩng-yã, la bõe yĩng t’a yaa toor ne yam-paalg a to wã? b) Tigims toor-toor sã n wa moond woto, bõe yĩng tɩ yẽsg yaa tɩlae?
6 Koɛɛgã mooneg zãma sʋka, kãsem-dãmb sul sẽn sigli: Koe-moonegã yam-paall a to me n be. Tẽns kẽer pʋsẽ, tiging fãa kãsem-dãmbã sull sigla koɛɛgã mooneg zãma sʋk tɩ zems ne yɛlã sẽn yaa to-to bãmb babgẽ wã. Koe-moondbã rʋʋgda tõnd sɛbã taabl zugu, wall b rogl-b bũmb b sẽn tusd n gilgdẽ zugu, zĩis nins naoã rãmb sẽn tũud wʋsgã. Yaa b tigingã mooneg zĩisẽ bal la b maand woto. Koe-moonegã yam kãngã yaa toor ne pipi soabã. Bala pipi soabẽ wã, yaa filiyallã n sigind moonegã, n toond tigims toɛy-toɛy neb lɛta n tʋm-b tɩ b tɩ moon galʋ-tẽns pʋsẽ, zĩis nins nebã sẽn waoogã.—Ges-y zĩ-gũbrã gom-zug sẽn yaa: “Yẽsg yaa tɩlae” wã.
7. Wãn to la kãsem-dãmbã tõe n sigl koɛɛgã mooneg zãma sʋkã?
7 Kãsem-dãmbã na n deng n gesa b sã n tara zĩis so-loaadb sẽn waooge, la b bao n bãng b sẽn na n sigl moonegã to-to tɩ zemse. Zĩ-kãens tõe n yɩɩ gaar-dãmba, pemsem kokr zĩisi, soay noyã, ra-kãsemse, inivɛrsite rãmba, sɩlg yiri, la tig zĩisẽ. Sẽn yaa sõma n yɩɩd yaa y sẽn na n tar taabl sẽn vigl sõma zĩig takɩ, la y yãk ray la wakat takɩ n kẽnd n dʋʋgd sɛbã. B gũusame n ges tɩ raas nins pʋsẽ b sẽn vigl taabl dãmb a woto buudã, tʋʋmdã womda biisi, n yɩɩd taabl dãmb nins b sẽn dɩgl koosem zĩ-kãseng fãa noorã. Bala, sẽn wat-b teedã raabã pa wae n kaoosd rig-noorẽ wã ye. B sãagda pʋgẽ n da b sẽn datã. Soay kẽer noyã, sẽn são yaa b sẽn na n dogl sɛbã bũmb b sẽn tusd n gilgdẽ zugu. B ninga Gũusg Gasgã la Réveillez-vous ! wã n paas Biiblã yetame sebrã tõnd sit wɛɛbã pʋgẽ, tɩ kãsem-dãmbã tõe n tɩ telesarz tɩ sõng-b moonegã buk kãngã wɛɛngẽ. Koe-moondb nins sẽn na n moonã segd n dɩka sẽn moond-b nasaar tẽns kẽer galʋ-tẽnsã pʋsẽ wã togs-n-taare, la b tũ tʋʋmdã yel-gɛt sẽn na n kõ-b sagls ninsã neere. Ned sã n dat n bãng n paas n yaool n pa b moonegã zĩigẽ neda, b segd n deega a adɛrsã n gʋls Veuillez suivre l’intérêt (S-43) wã zug n kõ tigingã sekertɛɛr tao-tao.
8. Baa tiging sã n pa sigl koɛɛgã mooneg zãma sʋka, bõe la koe-moondbã tõe n maane?
8 Moon-y koɛɛgã zãma sʋk y moonegã zĩigẽ: Tigims kẽer tõeeme n pa tar zĩis so-loaadbã sẽn waoog tɩ b tõe n sigl koe-moonegã yam-paal-kãensã b yiibã ye. Baasgo, b sagenda tigims kãens koe-moondbã tɩ koe-moonegã sasa bɩ b moond zĩis nins zãma sẽn be wã me. Koosem zĩis bee yãmb moonegã zĩigẽ bɩ? Pemsem kokr zĩig wall zĩig nebã sẽn wae n sũud taab beeme bɩ? Zĩis bee nebã sẽn nong n tigimd taab reem wall bũmb a to yĩng bɩ? Zĩis a woto sã n beeme, y tõe n moonda be.
9. Bõe yĩng tɩ d segd n mao n moon koɛɛgã neb sẽn beẽ fãa?
9 A Zeova ratame tɩ neb buud fãa paam fãagr la b bãng sɩdã. (1 Tɩm. 2:4) Woto kɩtame tɩ d modgd n dat n taas neb wʋsg koɛɛgã nand tɩ saabã ta. (Mat. 24:14) Tẽns wʋsg pʋsẽ yɩl n yã nebã yir lebga toogo. La d tõe n segda nin-kãens rãmbã zãma sẽn beẽ n moon-b koɛɛgã. Tõe tɩ na n tũu ne zãma sʋk koe-moonegã maasem tɩ neb wʋsg wʋm koe-noogã. Woto yĩnga, bɩ d wɩsg d mens n moon koɛɛgã zĩig ning fãa neb sẽn beẽ.—2 Tɩm. 4:5.
[Zĩ-gũbri, seb-neng a 5]
Yẽsg yaa tɩlae
B wilgame tɩ wakat ninga, koe-moonegã sasa, tigims sẽn pẽ taab koe-moondb mi n yeka taab so-kõor noore, koosem zĩisẽ la gaar-dãmbẽ. Sẽn paase, tiging ning koe-moondb mi n pʋɩya periodik-rãmbã tʋʋm zĩisẽ la zĩis a taab n loog tɩ tiging a to koe-moondb pʋgl b poore. Baa b sẽn pa yek taabã, sãama kɛlgdbã sũyã. Woto yĩnga, yɩta sõma tɩ tiging fãa moond zĩig ning b sẽn kõ-a bala.
Koe-moondb sã n dat n tɩ moon tiging a to koe-mooneg zĩigẽ, b segd n deng n yãa bãmb tigingã tʋʋmdã yel-gɛta, t’a yẽs ne tiging a to wã tʋʋmdã yel-gɛt n ges b sã n tõe n kõ-b-la sore. Tigims sẽn pa gomd buud-gom-yɛng sã n moonda zĩ-yɛnga, yɩta sõma tɩ tʋʋmdã yel-gɛtb yẽs ne taaba, n bãng b sẽn na n moond zĩigẽ wã to-to n da wa sãam kɛlgdbã sũy zaalem ye. Tigimsã sã n yẽsd ne taaba, b na n tõogame tɩ ‘bũmba fãa maan tɩ zemse, tɩ bʋrg ra zĩnd ye.’—1 Kor. 14:40.
[Foto, seb-neng a 6]
[Foto, seb-neng a 6]