D kõ kasetã sõma zãma sẽn beẽ
1. Wala pipi kiris-nebã, wãn-wãn la rũndã-rũndã kiris-nebã moond zĩis nins zãma wã sẽn beẽ, la rẽ womda bi-bʋse?
1 Wala a Zezi pipi karen-biisã, rũndã-rũndã kiris-nebã baoodame n na n moon koe-noogã zĩig ning fãa b sẽn tõe n yã neba. (Tʋʋ. 16:13; 17:17; 20:20, 21) B sẽn maand modgr n moond zĩis nins zãma sẽn beẽ wã, b yãta neb sẽn sɩd rat n bãng koɛɛgã n paase, tɩ b yaool n da pa na n tol n yã nin-kãens ne zak-zak koe-moonegã maasem ye.
2. Bõe yĩng tɩ d segd n tags tɩ bɩ, d sã n wa moond zĩis zãma sẽn beẽ, la wãn-wãn la d tõe n kɩt tɩ ra yɩ yaare?
2 D sã n wa moond zãma sẽn beẽ, d segd n tagsame tɩ bɩ. Naoor wʋsgo, yaa sõma tɩ d maan rẽ ne yam. Wala makre, koe-moondb wʋsg sã n tɩ sũ zĩ-yɛng n moondẽ wall b sã n yaa wʋsg n wat n kaagd koosem zĩ-yɛnga, neb kẽer yam tõe n yi-d lame. Rẽ sãbgda d tʋʋmdã, la tõe n kɩtame t’a pa wom biis sõma ye. Bõe la d tõe n maan n gil zu-loe-kãngã? Tigims kẽer sẽn tar zãma zĩis wʋsg n moondẽ yãame tɩ yaa sõma tɩ b pʋɩ-b tɩ yɩ mooneg zĩis toor-toore. (1 Kor. 14:40, Sebr Sõngo) Sẽn paase, d leb n tõe n sõng n kɩtame tɩ moonegã ra yɩ yaare, d sẽn na n moond d tigingã mooneg zĩisẽ bala, sã n pa mikame tɩ tigingã tʋʋmd yel-gɛtb sull rɩka sɛgls n na n sõng tiging a to n moone.—Ges-y yʋʋmd 1998 sɩpaoolg kiuug Rĩungã Tʋʋmd sebr seb-neng a 5, sull 18-19.
3. Wãn-wãn la neb kẽer moond zãma sẽn beẽ tɩ womd biisi?
3 D sẽn na n sõs ne nebã to-to: A Zezi sẽn wa n na n sõs ne pag a yembr bulg noorã, sɩngrẽ wã, a leoka pagã koɛɛg-koɛɛga, tɩ sẽn mik tɩ pagã tʋll n bãngame n paasã, a kẽng taoor ne a sõsgã bilf-bilfu. (Zã 4:7-26) Rũndã-rũndã, manesem kãngã me tõe n woma biis zĩis kẽere. Koe-moondb sãnda yãame tɩ sẽn na yɩl n tõog n moon sõma zãma sẽn beẽ, yaa sõma tɩ b reng n dɩk minit a wãn n pʋʋs nebã la b wilg-b tɩ b yell pak-b lame, n yaool n taas-b Rĩungã koɛɛga. B gomda bũmb nebã sẽn mi b babgẽ wã yelle, tɩ naoor wʋsgo, rẽ baasd ne sõsga. Nebã sã n gomd ne koe-moondbã b zu-loeesã yelle, b kelgda neere. La pa kaoosd la b kõ-b belsg sẽn yit Wẽnnaam Gomdã pʋgẽ ye.—Rom 15:4.
4. Wãn-wãn la d tõe sõng neb nins sẽn sõsd sõma-sõma ne-dã tɩ b bãng koɛɛgã n paase?
4 D sõng nebã tɩ b bãng koɛɛgã n paase: Wakat ning fãa d sẽn wat n paam n sõsd ne ned sõma, d segd n bao n sõng-a lame t’a bãng koɛɛgã n paase. Wãn-wãn la d tõe n maan dẽ? Y sã n wa baasd y sõsgã, y tõe n yiisa y karne wã la y yeel-a woto: “D sõsgã yɩ-m-la noogo. Rẽ yĩnga d tõe n kẽnga taoor ne-a nindaar bɩ?” wall y tõe n yeela woto: “M da nongẽ lame tɩ y karem sebr sẽn sɩd na n yɩ-y noogo. M tõe n tall-a lame n wa kõ-y yir wall y tʋʋmã zĩigẽ bɩ?” Koe-moondb kẽer sokda woto bala: “Yãmb tara telefon nimero m sẽn tõe n bool-y bɩ?” Naoor wʋsgo, rẽ womda bi-sõma.
5. D sã n wa moond zãma sẽn beẽ, bõe la d segd n bao n sɩnge?
5 Neb wʋsg koe-moondb sẽn seg pipi b sẽn wa moond zãma sẽn beẽ sakame n na n zãms Biiblã. Bãmb dãmbã tõe n zãmsa Biiblã b yiya, b tʋʋm zĩigẽ wall zãma sʋk tɩ sã n sakdẽ, wall ne telefonne. Bɩ d maan d sẽn tõe fãa n sɩng Biiblã zãmsg ne neba, d sã n wa moond zãma sẽn beẽ.