D sẽn tõe n moon koɛɛgã to-to zãma zĩisẽ tɩ tall yamleoogo
1. B sagla tigims nins sẽn tar mooneg zĩis zãma sẽn waoogã tɩ b maan bõe?
1 B ra sagla tigims nins sẽn tar mooneg zĩis zãma wã sẽn waoogã, tɩ b rʋʋgd tõnd sɛbã taabl-dãmb wall puus-puus rãmb zut n moond koɛɛgã. Sã n yaa puus-puus zug la y rʋʋg sɛbã n na n moone, segdame tɩ baa yaa koe-moond a ye yals bɩ a zĩnd puus-puusã sɛɛgẽ. La sã n yaa taabl zugu, segd n yɩɩ koe-moondb a yiibu. Koe-moondb nins sẽn yas sɛbã zĩigẽ wã segd n talla yẽesem, n mi sãamb reegre, tɩ b pẽnegr yaa nana. Ned sã n kolg n na n ges sɛbã, koe-moond a ye tõe n sɩnga sõsg ne-a. Makre, a tõe n tika sebr ning gom-zug n sok-a woto: “Yãmb zoe n soka y meng Biiblã sẽn yet bũmb ning gom-zu-kãngã wɛɛngẽ bɩ?” Koe-moond a to wall b yiib me tõe n yasa kɩreng bilfu, n sõsd ne so-loaadbã.
2. Togs-y kibar sẽn wilgd koɛɛgã mooneg zãma sʋkã yõodo?
2 Koɛɛgã mooneg zãma zĩisẽ wã sõnga koe-moondb tɩ b paam n sɩng Biiblã zãmsg ne neb wʋsgo. Makre, inivɛrsite karen-biig sẽn yaa bi-pugl n da rat n gʋls sebr a Zeova Kaset rãmbã zugu, la a baoa Rĩung roog n pa yã ye. Semen poore, a yãa koe-moondb sẽn dɩgl tõnd sɛbã taabl zug inivɛrsite wã pʋgẽ, t’a pẽneg-b n na n sõse. B kãab-a-la Biiblã zãmsg t’a sake. Rũndã-rũndã, a reega lisgu, hal n sõngd n moond koɛɛgã zãma sʋka.
3. Bõe la koe-moondb kẽer yet koɛɛgã mooneg zãma sʋkã wɛɛngẽ?
3 Saam-bi-poak sẽn zoe n naag n moon koɛɛgã zãma sʋk yeela woto: “So-loaadb kẽer yalsd n deegda periodik-paalã. Sãnda ra na zɩ n wʋm a Zeova Kaset rãmbã kibar ye. Mam yãame tɩ koe-moonegã nen-kãngã sõngdame tɩ d paamd n taasd neb wʋsg koɛɛgã.” Saam-bi-poak a to me yeela woto: “Koɛɛgã mooneg zãma sʋkã tara yamleoogo. Bala, nebã meng n wat tõnd nengẽ n na n ges sɛbã, tɩ baa kẽer sã n pa rat n kelg koɛɛgã, b rat n bãnga sẽn yaa bũmb ning la d maanda.”
4. Bõe yĩng tɩ yaa sõma tɩ y yãk wakat la zĩig takɩ semennã pʋgẽ koɛɛgã mooneg zãma sʋkã yĩnga?
4 Yɩta sõma tɩ y yãk daare, wakat la zĩig takɩ semennã pʋgẽ koɛɛgã mooneg zãma sʋkã yĩnga. Woto, nebã na n minim n yãta sɛbã, tɩ b tõe n bas b yam n pẽneg-y-yã, n sok sogsgo, pa rẽ bɩ b reeg sɛba. Yãmb tigingã sã n sigla koɛɛgã mooneg zãma sʋka, bɩ y modg n wa paam n naag n “moon Wẽnnaam soolem koɛɛgã” ne manesem kãngã sẽn womd bi-sõma wã.—Luk 9:60.