D sẽn tõe n tall d puus-puus rãmbã n moon koɛɛgã to-to

D sẽn dʋʋgd d sɛbã puus-puus rãmb bɩ taabl-dãmb zut n moond koɛɛgã sõnga sũ-tɩrs-rãmb wʋsg tɩ b sak sɩdã. (Zã 6:44) Rẽ n so tɩ b sagl kãsem-dãmbã tɩ b sigl koe-moonegã nen-kãngã, b moonegã zĩis nins naoã rãmb sẽn tũud wʋsg-wʋsgã. Puus-puusã pa bũmb sẽn dɩg zĩ-yend ye. D tõe n tusd-a lame n toeemd zĩiga. Woto wã, pa mi n yaa tɩlae tɩ d kos pãn-soaadbã sor n yaool n tall-a n moon ye. La ãnd dãmb n tõe n moon koɛɛgã ne puus-puusi? Yaa koe-moondb nins sẽn kõt mak-sõngo, sẽn manegd b mens neere, la sẽn tõe n sõs ne ned sõma. Ad bũmb kẽer koe-moondbã sẽn segd n maane, la b sẽn pa segd n maane, n tõog tɩ tʋʋmdã wom biisi.

Y sẽn segd n maane:

Pʋʋsd-y so-loaadbã, reegd-y-b noog-noogo, la y sõngd-ba. Koe-moondb kẽer laada ne-ba, n pʋʋsd-b sõma. So-loaad sã n ges sɛbã, y tõe n yeel-a lame t’a sã n dat bɩ a wa yãke.
Ra zãag-y wʋsg ne puus-puusã ye. Zĩis kẽere, koe-moondbã mikame tɩ b sã n pẽ puus-puusã, b tʋʋmdã womda biisi. La koe-moondb sãnda gũus n gesame tɩ b sã n maan woto, so-loaadbã yam yoodame tɩ b pa rat n yals ye. Rẽ wã, b zãagda bilfu, tɩ ned sã n kolg bɩ b wa. Ned sã n kolg sɛbã, bɩ y bao n sõs ne-a. Wala makre, y tõe n sok-a-la woto: “Yãmb zoe n soka y meng sok-kãngã bɩ?”
Sã n tõe fãa bɩ y lakd Biiblã n karemdẽ.
Ned sã n yãk sebr d sẽn tar n zãmsd nebã Biiblã, wala makre, Biiblã yetame sebrã, bɩ y wilg-a d sẽn zãmsd nebã Biiblã to-to. Sã n tõe bɩ y ning Bõe yĩng tɩ y tog n zãms Biiblã? video wã t’a gese.
Ned sã n wilg t’a rat n bãnga koɛɛgã n paas bɩ y reeg a adɛrs la a telefõn nimero.