D paas d koe-moonegã minim: D segl d meng tɩ d sã n paam segb bɩ d moon koɛɛgã

Saglgã yõodo: D sã n moond koɛɛgã zak-zaka, wakat ninga, d pa yãt neb yir ye. La d tõe n paama nin-kãens kẽere, d sã n wa kẽ tagsɩ wall bũmb a to n dabd zĩiga, d sã n kẽng logtor yiri, pa rẽ bɩ d sã n paam vʋʋsg bilf d tʋʋm zĩigẽ, lekollẽ wall zĩis a taaba. A Zeova ratame tɩ ned fãa wʋm Rĩungã koɛɛgã. (1 Tɩm. 2:3, 4) La naoor wʋsgo, yɩl n tõog n taas koɛɛgã, rẽnda d reng n segl d menga.

Ad y sẽn tõe n maan to-to:

• Yɩ-y gũusdba. Bao-y n bãng-y a soabã yam sã n bee sõsga, la yɛlã sẽn yaa to-to wã sã n kɩtame tɩ y tõe n sõs ne-a sõma. Koe-moondb kẽer geta nedã, tɩ b ninã sã n seg taab bɩ b sɩng ne laado. A soabã sã n la ne-ba, b sɩngda sõsga.

• Rabeem sã n tar-y bɩ y pʋʋs y sũurẽ koɛɛg-koɛɛga.—Neh. 2:4; Tʋʋ. 4:29.

• Reng-y n pʋʋs-yã a soabã. Tẽeg-y t’a Zezi sẽn sõs ne Samari pagã, a pa sɩng ne Rĩungã yell goam ye. (Zã 4:7) Wakat ninga, y sã n pẽg neda, tõe n kɩtame t’a tʋlg n kelg-yã. Sã n yaa roagda, y tõe n yeel-a-la woto: “Yãmb kambã yaa kom-sõma!” Y tõe n soka ned sokr me n paam n sɩng sõsga. Makre: “Yãmb kelga kibayã yʋngẽ bɩ?”

• Y sã n paam n sɩng sõsga, bɩ y bao weer n taas koe-noogã. La gũus-y n da yãg n sɩng ne rẽ ye. Reng-y n sõs n zãag bilfu. Y tõe n togsa bũmb sẽn na n kɩt tɩ y sõsd-n-taagã bao n na n wʋm a võore. Makre, y sã n da gomda zak pʋgẽ vɩɩmã yelle, y tõe n yeela woto: “Mam paama sagls sẽn tõe n sõng-y tɩ y wub y kambã.” Sã n yaa kibay zug la y ra sõsda, ad y sẽn tõe n yeele: “Kibayã d sẽn paamdã wae n pa noom ye, la sẽn nan pa kaoose, mam karma kiba-noogo.” Baa sõsgã sã n kʋʋg tɩ y pa paam n kõ kasetã bɩ y ra koms raood ye.

• Y sã n yit bɩ y sui seb-vãad wall sɛb a taab y sẽn tõe n kõ ned ning fãa sẽn wilg t’a rat n bãnga koɛɛgã n paase.

Mak-y woto ki-kãngã:

• Modg-y tɩ semen fãa, y sã n paam segb bɩ y sɩng sõsg ne neda.