Y tõe n kɩsa kasetã zĩig fãa!
1. a) Kɩs kasetã zĩig fãa wã rat n yeelame tɩ bõe? b) Neb nins sẽn wʋm koe-noogã pipi tɩ pa tũ ne zak-zak moonegã fãa zẽk b nus tɩ d gese.
1 Yãmb tigingã pʋgẽ, neb a wãn n wʋm koe-noogã pipi tɩ pa tũ ne zak-zak moonegã? Tõe tɩ nebã fãa sã n na n togse, na n ling-y lame. Kɩs kasetã zĩig fãa wã rat n yeelame tɩ d sã n wa togd sore, d sã n wa tɩ get d neb bɩ n be ne d yagse, d sã n wa be raagẽ, lekollẽ, d tʋʋmã zĩigẽ la zĩis a taaba, d segd n moona koe-noogã. Wala makre, b sẽn sok a Zeova Kaset rãmb 200 n gese, b mikame tɩ neb 80 wʋma koe-noogã pipi tɩ pa tũ ne zak-zak moonegã ye. Woto wilgdame tɩ kɩs kasetã wakat fãa la zĩig fãa wã womda biis wʋsgo.
2. Kiba-bʋs n be Biiblã pʋgẽ sẽn wilgd neb sẽn kɩs kasetã zĩig fãa?
2 Pipi kiris-nebã wakatẽ, koe-moondbã ra nong n kõta kasetã zĩig fãa. Wala makre, a Zezi sẽn da wa n pɩʋʋgd Samari, a moona pag sẽn wa n na n toog koom a Zakoob bulgẽ wã. (Zã 4:6-26) A Filip sɩnga sõsg ne Etiopi balem naaba, sẽn da karemd a Ezai sebrã. A Filip sok-a-la woto: “Yãmb wʋmda yãmb sẽn karemdã võor sɩda?” (Tʋʋ. 8:26-38) Tʋm-tʋmd a Poll sẽn wa n be bãens roog Filipi, a moona bãens roog gũuda. (Tʋʋ. 16:23-34) Kaoosg zugẽ, b sẽn wa n yõk a Poll n pag zak pʋgẽ, a “reega neb nins fãa sẽn wa yẽ nengẽ wã. La yẽ moona Wẽnnaam soolem koɛɛgã la a zãms nebã Zusoab a Zezi Kirist koɛɛga.” (Tʋʋ. 28:30, 31) Yãmb me tõe n kɩsa kasetã zĩig fãa, baa y sã n zoɛta yãnde. Wãn to la y tõe n maan dẽ?
3. Bõe n tõe n sõng tõnd tɩ d paam daood n kɩs kasetã?
3 D sẽn tõe n maan bũmb ninga: Tõnd sʋkã, yaa toog ne neb wʋsg tɩ b sɩng sõsg ne ned b sẽn pa mi. Tõe n yɩɩ toog tɩ d moon d mitinsã menga. D sã n tags a Zeova sõmblmã, a sẽn sõngd a nin-buiidã to-to tɩ b wʋmd Biiblã sẽn sɩd yetã võorã, la nebã sẽn namsd to-to wã yelle, d na n paama daood n moon nebã. (Zon. 4:11; Yɩɩl 40:6; Mat. 13:52) Sẽn paase, d tõe n kosa a Zeova t’a sõng-d tɩ d tõog n gom ne raoodo. (1 Tes. 2:2) Galaad lekollã karen-biig a ye yeela woto: “Naoor wʋsgo, mam yãame tɩ sã n wa yaa toog ne-m tɩ m gom ne nebã, pʋʋsgã sõngda maam.” Yãmb sã n wa yã tɩ yaa toog ne-y tɩ y gome, bɩ y pʋʋs a Zeova y sũurẽ koɛɛg-koɛɛga.—Neh. 2:4.
4. D sã n dat n kɩs kasetã, bõe la d tõe n deng n maane, la bõe yĩnga?
4 D sã n wa rat n kɩs kasetã, pa rat n yeel tɩ d zoe n sɩng Wẽnnaam yell goam bɩ n wilg vɛrse zĩig pʋgẽ ye. D tõe n sɩnga ne bũmb ning yell goam bala. Koe-moondb wʋsg wilgame tɩ b sã n sɩng woto bala, kõt-b-la raood tɩ b tõog n wa kɩs kasetã. A soabã sã n pa rat n sõs ne-do, bɩ d ra bao n na n modg n kell n gom ye. Kʋʋg-y sõsgã ne bʋgsem la y bas-a.
5. Bõe n sõng saam-bi-poak a ye sẽn zoet yãnd t’a tõog n kõ kasetã raagẽ?
5 Saam-bi-poak a ye sẽn zoet yãnd wilgame tɩ yẽ sã n wa kẽng raagẽ, a rengd n gesa ned ning a sẽn dat n gom ne wã, t’a soabã sã n ges-a, bɩ a bao gomd bal n togse. A soabã sã n leoke, kõt-a-la raood t’a kell n sõs ne-a. A kelgda a soabã sõma n bao n bãng bũmb ning a sẽn na n yeel Wẽnnaam Gomdã zug tɩ yɩ a noogo. A sẽn maand woto wã, a tõog n basa sɛb wʋsg ne nebã, la a pʋd n sɩnga Biibl zãmsg ne neda.
6. Wãn to la d tõe n sɩng sõsg ne neb zĩig fãa?
6 D sẽn tõe n sɩng to-to: Bõe la d tõe n yeel n sɩng sõsg ne neda? A Zezi sẽn wa n na n sõs ne pagã bulgã noorã, a reng n kosa koom n na n yũ. (Zã 4:7) Dẽnd tõnd me sã n wa rat n sõs ne neda, d tõe n sɩnga ne pʋʋsem bɩ ne sokre. Yãmb sã n wa sõsd ne taaba, y tõe n paama sor n gom bũmb Biiblã sẽn yet yelle, tɩ kẽ a soabã sũurẽ, wa f sẽn bʋd bõn-buudu. (Koɛ. 11:6) Neb kẽer yãame tɩ b sã n yeel bũmb sẽn na n kɩt tɩ nebã sok sokre, b paamdame n sõs ne-ba. Wala makre, y sã n wa naag neb n zĩ n gũud logtore, y tõe n yeela woto: “Mam gũuda wakat ning ned baa a ye sẽn pa na n le bẽ wã.”
7. D sã n gũusd n get yɛlã, wãn to la rẽ tõe n sõng tõnd tɩ d tõog n kɩs kasetã zĩig fãa?
7 D sã n gũusd n get yɛlã me, na n sõng-d lame tɩ d tõogd n sɩngd sõsg ne nebã. D sã n yã roagd sẽn zãad kamb sẽn tar manesem sẽn yaa sõma, d tõe n pẽg-a lame, la d sok-a woto: “Bõe n sõng yãmb tɩ y tõog n wub y kambã sõma woto?” Saam-bi-poak a ye mi n kelgda a tʋmd-n-taasã sẽn sõsd bũmb ning zugã, tɩ rẽ poor bɩ a wa kõ-b sebr sẽn gomd bõn-kãng yelle. A sẽn wa n bãng t’a tʋmd-n-ta-poak n dat n kẽ kãadem, a kõ-a-la Réveillez-vous ! sẽn wilgd ned sẽn tõe n segl a kãadem to-to. Woto kɩtame tɩ b tõog n sõs Biiblã yɛl a taab zug n paase.
8. Wãn to la d tõe n tũnug ne d sɛbã n sɩng sõsga?
8 Bũmb a to sẽn tõe n sõng tõnd tɩ d tõog n sɩng sõsg ne nebã, yaa d sẽn na n karemd tõnd sɛbã zĩig ning nebã sẽn tõe n yã-do. Saam-biig a ye nong n lakda Gũusg Gasgã bɩ Réveillez-vous ! wã sõsg sẽn tar yamleoogo, n sɩng karengo. A sã n yã tɩ ned n lɩkd n get bũmb ning a sẽn karemdã, a sokda a soabã sokre, pa rẽ bɩ a togs-a bũmb ning yẽ sẽn karemdã. Woto nong n kɩtdame t’a sɩng sõsga, n tõog n kõ kasetã. D sã n dɩgend sɛbã zĩig ning nebã sẽn tõe n yã, tõe n kɩtame tɩ d tʋmd-n-taasã bɩ d karen-bi-taasã wa rat n bãng bũmb ning sẽn be a pʋgẽ wã.
9, 10. a) Wãn to la d tõe n paam soay n kõ kasetã zĩig fãa? b) Wilg-y yãmb sẽn tõog n maan dẽ to-to?
9 D baood soay n kõt kasetã: Sẽn mik tɩ yaa masã la d segd n moon koɛɛgã n yɩɩdã, yaa tõnd mengã n segd n modg n bao soay n kõ kasetã, d sẽn wa n be zĩig ning fãa, la sẽn yaa wakat ning fãa. D segd n deng n tagsa neb nins d sẽn na n segã yelle, n ges d sẽn tõe n sɩng sõsg ne-b to-to. Zã-y Biibl y sẽn na n karem n wilg nebã, la sɛb sẽn na yɩl n kãab-ba.—1 Pɩɛ. 3:15.
10 Koe-moondb wʋsg sẽn dengd n tagsd sõma wã yĩnga, b paamda soay n kõt kasetã zĩig fãa. Saam-bi-poak a ye n vɩ etaas-bedr ned sẽn pa tõe n kẽ yaar pʋgẽ. Reem zĩig n be beenẽ t’a maan taablo buud n tabend zĩ-neer imaaz rãmba. Ned sã n pɩʋʋgdẽ n yals n ges n pẽge, a tũnugda ne rẽndã n sɩng sõsg ne-a, n wa wilg-a Biiblã sẽn yet bũmb ning “yĩngr paalgã la dũni paalgã” sẽn watã wɛɛngẽ. (Wil. 21:1-4) Tags-y n ges-y y sẽn tõe n maan to-to n paam soay n kõ kasetã zĩig fãa.
11. Ned sã n sak n kelg-do, bõe la d tõe n maan n sõng a soabã n paase?
11 D sõng neb nins sẽn kelgã: Ned sã n sak n kelg-do, bɩ d modg n le paam n sõs ne-a. Y tõe n yeela a soabã woto: “Tõnd sõsgã yɩɩ noogo, la yɛ la d tõe n le yã taab n sõse?” Koe-moondb kẽer nong n gʋlsda b adɛrs la b telefõn nimero, la b yeel a soabã woto: “Tõnd sõsgã yɩɩ noogo, la y sã n dat n bãng yɛl a taab n paase, mam adɛrs la m telefõn nimero la woto.” Yãmb mengã sã n pa na n tõog n tɩ sõs ne a soabã, y tõe n gʋlsa a soabã adɛrs Veuillez suivre l’intérêt (S-43) wã zugu, n kõ y tigingã sekertɛɛr tao-tao.
12. a) Bõe yĩng tɩ baa yaa minit a wãn bal la d kõ kasetã d segd n gʋls rẽ d rapoorã zugu? b) Bõe n wilgd tɩ d sã n kõt kasetã zĩig fãa, womda biisi? (Ges-y zĩ-gũbrã: “Kasetã kũun zĩig fãa wã womda biisi!”)
12 Wakat ning fãa d sẽn kõ kasetã, d segd n gʋlsa rẽ d rapoorã zugu. Bɩ d modg n gʋlse, baa yaa minit a wãn bal daar fãa. Koe-moond fãa sã n kõt kasetã minit a nu daar fãa la a gʋlsdẽ, rat n yeelame tɩ lɛɛr dãmb milyõ 17 n na n paas dũniyã gill rapoorã zug kiuug fãa.
13. Bõe n segd n kɩt tɩ d kõt kasetã zĩig fãa?
13 Tõnd sẽn nong Wẽnnaam la d nong nebã yĩng n kɩt tɩ d kõt kasetã. (Mat. 22:37-39) Tõnd sũurã sẽn yaa noog ne a Zeova sẽn yaa a soabã, la bũmb nins a sẽn dat n maan n kõ ninsaalbã yĩng kɩtame tɩ d gomd ‘a pãngã la a naamã ziir’ yelle. (Yɩɩl 145:7, 10-12) Tõnd sẽn sɩd rat d taabã neerã yĩng kɩtame tɩ d tũnugd ne sɛgb buud fãa n moond nebã koe-noogã tɩ nan ket n tõeyã. (Rom 10:13, 14) D fãa sã n dengd n tagsd sõma la d segend d sẽn na n yeel bũmb ningã, d na n tõog n kõo kasetã zĩig fãa, la tõe me tɩ d tõog n sõng pʋ-peelem soab t’a wʋm koe-noogã.
[Goam sẽn tar pãnga, seb-neng a 4]
Y sã n wa rat n kɩs kasetã, y tõe n sɩnga ne bũmb ning yell goam bala
[Goam sẽn tar pãnga, seb-neng a 5]
Koe-moondb wʋsg sẽn dengd n tagsd sõma wã yĩnga, b paamda soay n kõt kasetã zĩig fãa
[Zĩ-gũbri, seb-neng a 5]
Bũmb nins sẽn tõe n sõng-y tɩ y sɩng sõsga
◼ Pʋʋs-y la y yaool n sɩnge
◼ Bao-y neb nins sẽn pa yãgdã
◼ Ges-y ned ning y sẽn dat n gom ne wã, t’a soabã sã n ges-y bɩ y gom bũmb sẽn na n yɩ a noog yelle
◼ Kelgd-y nebã sõma
[Zĩ-gũbri, seb-neng a 6]
Kasetã kũun zĩig fãa wã womda biisi!
• Saam-biig a ye n da kẽng n tɩ kɩs a mobil garaasẽ tɩ b manegdẽ. A kõo neb nins sẽn da be beenẽ wã kasetã, la a kõ-b seb-vãad n bool-b tɩ b wa kelg zãma sõsga. Maana yʋʋmde, a wa n bee tigis-kãsengẽ tɩ saam-biig a sẽn pa mi wa pʋʋs-a sõma-sõma. Ra yaa neb nins a sẽn da kõ seb-vãad garaasẽ wã ned a yembre! Ra-kãnga ra sɩd kẽngame n tɩ kelg zãma sõsgã la a kos Biibl zãmsgo, hal tɩ yẽ ne a pagã fãa reeg lisgu.
• Pag a ye b sẽn moon tɩ pa tũ ne zak-zak moonegã t’a wa lebg a Zeova Kaset soab tagsdame t’a segd n moonda neb nins a sẽn segd a kambã maasem yĩngã. A ra moonda a yagsã, roagdb nins a sẽn segd a kambã lekollẽ wã, la neb nins a sẽn segd karen-biisã roagdb tigissẽ wã. A sã n pʋʋs-b la a togs yẽ sẽn yaa ned ninga, a yeta koɛɛg-koɛɛg bal tɩ Biiblã sõngda yẽ wʋsg a kambã wubr pʋgẽ, n yaool n gom bũmb a to yelle. A sẽn paam n sɩng Biiblã yell goama, lebgda nana ne-a t’a kell n gom Biiblã yell nindaare, sõsg a to pʋgẽ. A sẽn maand woto wã, a tõog n sõnga neb 12 tɩ b wa reeg lisgu.
• Ned sẽn tʋmd asirãns zĩigẽ n wa n ges saam-bi-poak a ye, t’a tũnug ne rẽ n kõ kasetã. Saam-bi-poakã sok-a lame n ges a sã n data asirãns buud sẽn na n kɩt t’a paam laafɩ, sũ-noog hakɩka, la vɩɩm sẽn kõn sa. A yeelame tɩ n-ye, la a sok-a tɩ yaa asirãns bʋg yell la a sẽn gomdã. Saam-bi-poakã wilg-a-la bũmb nins Wẽnnaam sẽn kãab ninsaalbã tɩ be Biiblã pʋgẽ wã, la a kõ-a sebre. Raoã karma sebrã tõr yʋn-yɛnga. A saka Biibl zãmsgo, n sɩng tigissã kẽnde, hal n wa reeg lisgu.
• Saam-bi-poak a ye sẽn da be sɩlg pʋgẽ n togd sor sɩnga sõsg ne pag sẽn da zĩ a sɛɛgẽ, n kõ-a kasetã. La b sẽn wa n sigã, a kõo pagã yẽ adɛrs la a telefõn nimero, n yeel-a t’a Zeova Kaset rãmbã sã n wa moon-a bɩ a kos tɩ b wat n zãmsd-a Biiblã. Vẽkembeoogã bala, a Zeova Kaset rãmb a yiib n wa pagã zakẽ wã. Pagã sɩd sɩnga Biibl zãmsgo, a reega lisg tao-tao, la pa yã n kaoos la yẽ mengã paam neb a tãab n zãmsd Biiblã ye.
• Saam-biig a ye sẽn yaa zoang n tar yʋʋm 100 n vɩ zĩig sẽn kʋʋl-bã sẽn beẽ. Wakat fãa a nong n yetame tɩ: “D ratame tɩ Wẽnnaam Rĩungã wa.” Woto kɩtame tɩ logtoɛɛmbã la bãad rãmb a taab nong n sokd-a t’a wilgd-b Rĩungã sẽn yaa bũmb ninga. Pag a ye sẽn tʋmd zĩ-kãng sok-a-la bũmb ning yẽ sẽn dat n maan arzãnã pʋgẽ. A leoka woto: “Mam na n paama nini, m na n kẽname, la m na n yõoga põor-weefã.” A sẽn yaa zoangã yĩnga, a ra kosa pagã t’a karemd periodik rãmbã t’a kelgdẽ. Saam-biigã bi-pugl sẽn wa n na n ges-a, pagã kosa biigã sor n na n zã sɛbã n kuili. La logtor a ye yeela bi-puglã woto: “Masã tõnd fãa gomd lebga ‘d ratame tɩ Wẽnnaam Rĩungã wa.’ ”
• Saam-bi-poak a ye sẽn tong n na n da rɩɩb rɛstorã pʋgẽ wʋma nin-kẽemb sẽn da zĩ n gomd politik yelle. Nin-kẽem a yembr yeelame tɩ goosneemã pa tõe n welg nebã zu-loees ye. Saam-bi-poakã yeela a meng woto: ‘Woto yaa segb m sẽn tõe n tũnug n kõ kasetã.’ A pʋʋsa a Zeova koɛɛg-koɛɛga, la a kolg n na n gom ne-ba. A togsa yẽ sẽn yaa ned ninga, la a gom ne-b goosneema buud sẽn na n wa welg nebã zu-loees yelle, n wilg tɩ yaa Wẽnnaam Rĩungã, la a kõ-b sebre. Rɛstorã wã yel-gɛtã kolgame, la saam-bi-poakã tagsame t’a waame n na n dig yẽ. La a yeelame t’a ra kelgda a sẽn yet bũmb ningã, la tɩ yẽ me rata sebre. Tʋm-tʋm-poak sẽn da kelgd me kolga ne nintãm. A ra zãmsda Biiblã ne a Zeova Kaset rãmbã, n wa base. La a yeelame t’a ratame n le sɩnge.