Kõ-y kaset sẽn ka yãk wakat n pẽg a Zeova
1 Daar fãa, a Zeova sõgen dãmb sẽn tar kɩs-sɩdã baooda soay n na n pẽg-a. (Yɩɩl 96:2, 3; Heb. 13:15) Sor a ye d sẽn tõe n tũnug ne n maan dẽ yaa kaset kũun sẽn ka yãk wakatã. Rũndã-rũndã a Zeova balemdb wʋsg tara mi-beoogo, b sẽn paam tɩ ned taas-b Rĩungã koɛɛg sɩngrẽ wã ne kaset sẽn ka yãk wakatã maasmã.
2 Tõnd sã n kõ ned kaset sẽn ka yãk wakate, rẽ pakda sor tɩ neb a taab me wʋm Rĩungã koɛɛga. Wala makre, a Zezi sẽn gom ne Samari poakã a Zakoob bulgẽ wã kɩtame tɩ neb wʋsg tʋlg n kelg koe-noogã. (Zã 4:6-30, 39-42) B sẽn da wa n pag a Poll ne a Sɩlas roog Filipã, b kõo bãens ro-gũudã kaseto, tɩ rao wã ne a zakã rãmb fãa sak sɩdã.—Tʋʋ. 16:25-34.
3 Soay d sẽn tõe n tũnug ne n kõ kaset sẽn ka yãk wakate: So-kãens la bʋse? Neb kẽer kõo kaset sẽn pa yãk wakat b sẽn da wa n daad teedo, n be biis bɩ tagsi pʋgẽ n debd zĩig ninga, bɩ b sẽn da wa n gũud logtor yiri. Neb a taab tõe n kõo kasetã tʋʋma zĩigẽ bɩ lekollẽ wã vʋʋsgã wakate. D sã n ning sɛbã sẽn gomd Biiblã yellã zĩig ning nebã sẽn tõe n yãẽ, rẽ tõe n kɩtame tɩ neb a taabã bao n na n bãng yɛl tõnd tẽebã wɛɛngẽ.—1 Pɩɛ. 3:15.
4 D sẽn na n maan to-to n sɩnge: Bipugl sẽn tar yʋʋm a yopoe wʋma tigisg a yembrẽ tɩ tara yõod wʋsg tɩ neba fãa moon koɛɛgã. Dẽ, yẽ ne a ma sẽn da wa n dabd teed raabo, a suii seb-bi a yiib a korgẽ wã. A ma wã sẽn wa n yaood teedã ligd sasa, bipuglã kãaba pag a yembr seb-bil t’a sak ne yamleoogo. B soka bipugl kãngã sẽn tar nin-zoeerã a sẽn maan to-to n paam raood n gom ne pagã, t’a leoke: “Mam yeela m meng woto bala, m segl n saame, haya, sɩnge! La m sɩd sɩnge!”
5 Tõnd fãa me segd n talla yẽesem ning bipugl kɩdgã sẽn tallã n tõog n kõ kaset sẽn ka yãk wakate. Bõe n tõe n sõng tõndo? D pʋʋs n paam daood sẽn na yɩl n kõ kasetã. (1 Tes. 2:2) Segl-y sokr bɩ gomd yell ning zugu, sẽn na yɩl n tũnug ne rẽ n sɩng sõasgã. Rẽ poor bɩ y tall bas-yard ne a Zeova t’a na n barka modgr ning y sẽn maandã.—Luk 12:11, 12.
6 Tõnd sã n kõt neb nins d sẽn segd daar fãa wã kasetã, rẽ waoogda a Zeova la kõt tõnd sũ-noogo. Rẽ tõe n sõnga nina t’a sɩng kẽnd sor ning sẽn tar n debd vɩɩm sẽn-kõn-saẽ wã zugu.