Yãmb segla y meng n na n kõ kasetã baa y pa yi koɛɛgã mooneg yĩng bɩ?
1. Kiba-bʋg n wilgd tɩ d sã n kõt kasetã baa d pa yi koɛɛgã moonego, tõe n woma biisi?
1 D sã n segl d mens n na n kõ kasetã baa tɩ d pa yi koɛɛgã mooneg yĩnga, tõe n woma biisi. Biiblã gomda neb kẽer sẽn moon koɛɛgã woto tɩ wom biis yelle. (Zã 4:7-15) Bõe la d tõe n maan n tõog n kõ kasetã, baa d pa yi koɛɛgã moonego?
2. Wãn to la d sẽn na n manegd d mens sõma wã tõe n sõng tõnd tɩ d moon koɛɛgã?
2 D fu-yerdɩ wã la d mengã manegre: D sã n yeelgd fut sẽn yaa sõma la d manegd d mensã sõma wakat fãa, na n yɩɩ nana ne-d tɩ d tõog n wilg nebã tõnd sẽn tẽed bũmb ninsã. (1 Tɩm. 2:9, 10) Tõnd sã n wa tagsd tɩ d fu-yerdɩ wã pa sõma, d pa na n dat n moon koɛɛgã ye. La d sã n ningd fu-sõma la d manegd d mensã sõma, tõe n kɩtame tɩ nebã wa rat n bãng bũmb ning sẽn kɩt tɩ d manegd d mensã sõma wã. Wala makre, a Zeova Kaset soab ne a pag n da maneg b mens sõma, n zĩ n yɛg mor tɩ b fãa togd sore. Morã sẽn yã b sẽn maneg b mens to-to wã, a sokame tɩ b yaa kiris-neb laa. Woto kɩtame tɩ b paam n sõs ne-a Biiblã zug lɛɛr a tãabo.
3. Wãn to la a Zezi mak-sõngã sõng yãmb tɩ y tõog n sɩng sõsg ne neda?
3 D sẽn tõe n sɩng sõsg ne ned to-to: A Zezi sẽn wa n sɛg Samari pagã a Zakoob bulgã noorã, a kosa pagã koom n kell n tũnug ne rẽ n sɩng sõsg ne-a. Tõnd me tõe n tũnuga ne sokre, pa rẽ bɩ ne gomd n sɩng sõsg ne neda. Baa d sẽn mi n yɛɛsdẽ wã, d sã n kos a Zeova sõngre, d na n paama “raood” n tõog n sɩng sõsg ne nebã.—1 Tes. 2:2.
4. Bõe la d tõe n maan n segl d mens n kõ kasetã, baa d pa yi koɛɛgã mooneg yĩnga?
4 D bãng d sẽn tõe n maan to-to n moon wakat buud fãa: Koe-moondb wʋsg bãnga b sẽn na n maan to-to n tõog n moond koɛɛgã wakat buud fãa. Maneg-y n ges-y yãmb yɛlã sẽn yaa to-to, la y tags neb nins y sẽn tõe n sɛg daar fãa wã yelle. Zã-y sɛb takɩ, la Biibl bila. Gũusd-y n getẽ, la y wilgd tɩ nebã yell pak-y lame. Yãmb sã n deng n tags neb nins yãmb sẽn tõe n sɛg daar-n-kãngã wã yell n segl y mense, y na n tõog kõo kasetã sõma.—Fil. 1:12-14; 1 Pɩɛ. 3:15.
5. Bõe yĩng tɩ d segd n segl d mens n kõt kasetã, baa d pa yi koɛɛgã mooneg yĩnga?
5 Bʋʋm a yiib sẽn kɩtd tɩ d tũnugd ne segb buud fãa n moond koɛɛgã yaa d sẽn nong a Zeova la d nong nebã yĩnga. (Mat. 22:37-39) Sẽn mik tɩ koɛɛgã mooneg yaa tʋʋmd sẽn tar yõod wʋsgã yĩnga, d segd n segla d mens n tõog n moone, baa d pa yi koɛɛgã mooneg yĩnga. Bɩ d segl d mens sõma sẽn na yɩl n tõog n tũnug ne segb buud fãa n moon nebã Rĩungã koe-noogã tɩ dũni kãngã sãoong nan pa ta ye.—Rom 10:13, 14; 2 Tɩm. 4:2.