Modg-y n ‘kɩs kasetã sõma’
1, 2. Bõe n be yamleoog ne yãmb a Poll sẽn da get koe-noogã mooneg to-to wã pʋgẽ, la wãn to la y tõe n dɩk togs-n-taar ne a makrã n ‘kɩs kasetã sõma’?
1 Sẽn yaa zĩig ning bɩ yell ning fãa pʋgẽ, wala a Zezi ne Wẽnnaam pĩnd sõgen dãmb wʋsg sẽn maanã, a Poll ra moonda koe-noogã ne yẽesem, n ‘kɩt kasetã sõma.’ Baa b sẽn da wa n yõk-a n tɩ pag zak pʋgẽ wã, a ra ‘reegda neb nins fãa sẽn wat yẽ nengẽ wã. A ra moonda Wẽnnaam soolem koɛɛga la a zãmsd neba Zusoab a Zezi Kirist koɛɛga vẽenega.’—Tʋʋ. 28:16-31.
2 Tõnd me tõe n modgame n ‘kɩs kasetã sõma’ wakat fãa. Wala makre, d tõe n kõo kasetã neb nins d sẽn segdã, d sã n wa rabd tigims gĩn sull tigis-kãsengã gom-zug sẽn yaa “Pẽg-y Wẽnnaamã” zĩigẽ, la d sã n wa yi be n lebdẽ, n paas tigis-kãsengã galʋ-tẽngẽ me.—Tʋʋ. 28:23; Yɩɩl 145:10-13.
3. D na n maana wãn tɩ d kaset kũun sẽn pa yãk wakatã ra wa yɩ kaset kũun sẽn maan yaar bala?
3 Kaset kũun sẽn pa yãk wakatã yaa bõe? Kaset kũun sẽn pa yãk wakatã ka bũmb d sẽn maand yaar bala, wala a yaa bũmb d sẽn ka reng n segle, bɩ bũmb yõod sẽn paood ye. Yaa vẽeneg tɩ tõnd koe-moonegã tʋʋmd ka woto ye. Wala a Polle, kõ kasetã n pẽg Wẽnnaamã yaa bũmb sẽn tar yõod ne-do, la d segd n tʋllame n kõ kasetã zĩig ning fãa rẽ maaneg sẽn zemse, d sã n togd sor rõandã. La b sɩd tõe n bilga tõnd sẽn sɩngd sõasgã to-to ne nebã wala bũmb sẽn maan n pa reng n yãk wakate, sẽn dat n yeel tɩ tũu ne segb bala tɩ b maan-a ne zood manesem.
4. Bõe n sõng a Poll t’a tõog n kõ kasetã zak ning a sẽn gãẽ wã?
4 Segl-y y meng sẽn na yɩl n wa kõ kasetã: A Poll ra segd n baoo soay n kõ kasetã, b sẽn da wa n yõk-a n pag zak pʋgẽ Rommã. A Poll zĩnda a sẽn da gãẽ wã n bool tẽngã Zʋɩf rãmb taoor dãmb tɩ b wa a zakẽ wã. (Tʋʋ. 28:17) Yaa sɩd tɩ kiris-neb tiging n da be Rom, la a Poll wʋmame tɩ Zʋɩf rãmbã sẽn da be be wã rag n ka paam zãmsg sẽn yit bãmb tʋm-tʋmdbã meng nengẽ kiris-neb tẽebã zug ye. (Tʋʋ. 28:22; Rom 1:7) Rẽ kɩtame t’a ‘kɩs-b kasetã sõma’ a Zezi Kirist ne Wẽnnaam Rĩungã wɛɛngẽ.
5, 6. Soay nins d sẽn tar n tõe n kõ kaset sẽn pa yãk wakatã la bʋse, la segl-bʋs la d tõe n maan sẽn na yɩl n maan dẽ sõma?
5 Tags-y neb nins fãa y sẽn tõe n seg y so-togsã sasa, sẽn ka mi a Zeova Kaset rãmbã sõma wã yelle. B tõeeme meng n ka miẽ tɩ tõnd kãabda neb Biibl zãmsg zaalem ye. Bao-y n kõ kasetã neb nins y sẽn segd so-toakã wakatã, y sã n wa yals n na n vʋʋsã, n na n ning esãensã, n na n da teedã, y sã n be lotɛllẽ wã, y sã n wa rɩt rɩɩb koosg roogẽ, y sã n kẽ mobill bɩ tagsi n debd zĩig ninga, la y sã n maand yɛl a taaba. Reng-y pĩnd n segl y sẽn na n yeel bũmb ning n sɩng sõasg ne nedã, la y kõ kasetã koɛɛg-koɛɛgã. Rasem a wãn sẽn deng tɩ y so-toakã wakat ta, y tõeeme n zoe n kõt kaset sẽn pa yãk wakat y yagse , y roagdba, y tʋmd-n-taase, la y mitins a taab sẽn na yɩl n segl y mengã
6 Rẽnd y bao sɛb sẽn na yɩl n tũnug ne n kõ kaset sẽn ka yãk wakatã. Seb-bʋse? Y tõe n dɩka seb-vãoog ning gom-zug sẽn yaa Aimeriez-vous en savoir plus sur la Bible ? n kõ kasetã. Gom-y pipi sul a nu wã zutu, zĩig ning b sẽn wilg bũmb nins sẽn kɩt tɩ d segd n karem Biiblã. Wilg-y zĩ-gũbrã sẽn be sebrã poorẽ tɩ b tõe n wõrg n kos Biibl zãmsg zaalmã. Y sã n yã ned sẽn sak n na n kelge, bɩ y kãab-a Baood seb-bilã. Y tõe n deng n segla y meng neb sẽn gomd buud-goam a taab y sẽn tõe n wa seg yĩnga, n zɩ Une bonne nouvelle pour toutes les nations seb-bilã. Sebrã seb-neng a 2 zugu, b wilga b sẽn tõe n dɩk-a n kõ kasetã to-to. Sã n yaa ne mobill la y togd sorã, y tõe n zɩɩ sɛb a taab neb nins sẽn na n wilg raab sẽn yaa kãseng ne Rĩungã koɛɛg yĩnga.
7, 8. Sagl-bʋs la b kõ tɩ d segd n tũ, tõnd yalẽ wã la d manesmã sẽn segd n yɩ to-to so-toakã la tigis-kãsengã sõss poor wɛɛngẽ?
7 Gũus-y y yalẽ wã la y manesmã: D segd n modgame tɩ d manesmã ne d futã la d sẽn manegd d mengã to-to wã ra wa kɩt tɩ neb a taabã tags bɩ b gom a Zeova siglgã wẽng ye. (Tʋʋ. 28:22) La ka d sã n wa be tigis-kãsengã zĩigẽ bal la segd n maan woto ye, yaa d sã n wa be sorẽ bɩ zĩig a to tigis-kãsengã sõss poor me. Yʋʋmd 2002, sa-sik kiuug 1 daar Gũusg Gasgã, seb-neng 30, sull 14 keooga woto: “Tõnd yalẽ wã pa segd n puk wilg-m-menga, n yɩ sãang wʋsgo, n nek pag ne rao lageng tʋlsem, n pukd yĩngã babs nins sẽn da segd n solgã, bɩ n puk nagem modɛll paals tɩ loog noor ye. Sẽn paase, d segd n ninga futã tɩ zems ne neb ‘sẽn sakd Wẽnnaam.’ Rẽ pa kɩtd tɩ d tags neer yellã zug sɩda? B sẽn baoodã pa f ning fut sẽn zemse, f sã n kẽngd tigingã tigissẽ [bɩ tigis-kãsengã sõss wakate], tɩ rẽ poor tɩ f maan f toog kae wakat a taabã ye. Wakat fãa, tõnd mengã yalẽ segd n puka tõnd waoogr manesmã, d sẽn yaa kiris-neb la d yaa Wẽnnaam tʋm-tʋmdb wĩndg la yʋngã.”—1 Tɩm. 2:9, 10.
8 D segd n yeelga d futã ne maan-tɩ-zems la burkĩndi. Wakat fãa, tõnd yalẽ wã la d manesmã segd n wilgame tɩ d yaa wẽn-tũudba. Ka segd abada n yɩ tɩlae tɩ d yõkd d mens n ka rat n kõ kaset sẽn pa yãk wakatã, tɩ bala tõnd yalẽ wã ka zems ne Wẽnnaam sõgen ye.—1 Pɩɛ. 3:15.
9. Wãn-wãn la kaset ning a Poll sẽn kõ Rom tẽngẽ wã wom biisi?
9 Kaset kũun sẽn pa yãk wakatã womda biisi: Yʋʋm a yiibã b sẽn da yõk a Poll n tɩ pag zak pʋgẽ Rommã a yãame tɩ kasetã a sẽn modg n kõ wã woma biisi. A Luk wilgame tɩ “kẽer deega bũmb nins yẽ sẽn togsã.” (Tʋʋ. 28:24) A Poll mengã wilga yẽ sẽn ‘kɩs kasetã sõma’ wã sẽn wom biis to-to, n gʋlse: “Bũmb nins sẽn maan maama kɩtame tɩ Koe-nooga saag n yɩɩda. Tɩ bõe, naaba zaka fãa ne zĩiga fãa neba bãngame tɩ yaa Kirist yĩng la b balg maam. La sẽn kolg ba-biisa fãa sẽn tũud Zusoaba paama raood mam balgra yĩng n togsd Wẽnnaam koɛɛga ne daood n yɩɩd pĩnda tɩ rabeem kaẽ ye.”—Fil. 1:12-14.
10. Wãn-wãn la saam-biig ne a pag kõ kasetã tɩ wom biis rɩẽ?
10 Rɩẽ, saam-biig ne a pag n kõ rɩ-koosg zĩigẽ tʋm-tʋmd poak kaset tɩ wom biisi, b sẽn kelg tigims gĩn sull tigis-kãsengã sõss raarã pʋgẽ n sa poore. Tʋm-tʋmdã ra yãa b tigis-kãsengã badz rãmb n sok n na n bãng b võore. B goma ne-a tigis-kãsengã yelle, la b leb n togsa saagr ning Biiblã sẽn kãabd ãdem-biisã beoog-daarã. B kõ-a-la Aimeriez-vous en savoir plus sur la Bible ? seb-vãoog la b wilg-a t’a tõe n paamame tɩ b wa zãms Biiblã ne-a zaalem yiri. Pagã yeelame t’a ratame tɩ ned wa ges-a, n gʋls a yʋʋr la a adɛrs seb-vãoogã poore, la a kos saam-biigã ne a pagã tɩ b maan seglsã rẽ yĩnga. Yãmb sã n ‘kɩs kasetã sõma’ rõandã, bi-bʋs la y na n tõog n paame?
11. Zʋg-sõma bʋs la d segd n mao n talle, n ‘kɩs kasetã sõma’ rõandã n sõng tɩ koe-noogã kẽng taoore?
11 Modg-y n sõng tɩ koe-noogã kẽng taoore: Tags-y n ges sũ-noog ning a Poll sẽn talle, a sẽn wʋm tɩ kiris-neb a taabã da rɩkda togs-n-taar ne yẽesem ning yẽ sẽn tallã. Bɩ tõnd me maan d sẽn tõe fãa n sõng tɩ koe-noogã kẽng taoore, n kõt kaset sẽn pa yãk wakat tõnd tẽebã sẽn tik Biiblã zugã wɛɛngẽ, d sã n wa kẽng rõandã tigims gĩn sull tigis-kãsengẽ wã.
[Zĩ-gũbri, seb-neng a 3]
Sɛb nins d sẽn d segd n tall n kõ kaset sẽn pa yãk wakatã
■ Aimeriez-vous en savoir plus sur la Bible ? (seb-vãoogo)
■ Bõe la Wẽnnaam baood tɩ tõnd maane? (seb-bila)
■ Une bonne nouvelle pour toutes les nations (seb-bila)
■ Sɛb a taab sẽn tar zãmsg sẽn yaa kãsemse
[Zĩ-gũbri, seb-neng a 4]
D ra yĩm-b ye!
D ra yĩm ãnda? Sɩdã ratb nins fãa sẽn wa Kirist kũumã Tẽegrẽ bɩ sẽn wa n kelg zãma sõasg sẽn yaa zallã. Rẽ yĩnga tõnd bool-b lame tɩ b wa rõandã tigims gĩn sull tigis-kãsengã bɩ? Tõeeme tɩ d sã n bool-ba, bãmb wʋsg na n waame. B sã n paam tũud-n-taar sẽn kengd tẽeb tigis-kãsengẽ wã la b kelg sõssã sẽn kengd tẽebã, rẽ na n kɩtame tɩ b pẽneg a Zeova la a siglgã n paase. Bõe yĩng tɩ y ka na n bool-b n ges b sã n na n waame? Togs-y bũmb nins fãa b sẽn segd n bãngã, wala tigis-kãsengã wakate, b sẽn tõe n maan to-to n kẽng tigis-kãsengã zĩigẽ, tigim-taab toɛy-toɛyã sẽn sɩngd la b baasd wakat ninsi, la tigis-kãsengã tags-kãsems b sẽn kʋms tɩ be yʋʋmd 2003, sigr kiuug rasem a 8 Réveillez-vous ! wã poorã.