Retrɛt yaa sor sẽn pak tɩ d tõe n maan tʋʋmd n paas bɩ?

¹ Neb sẽn tʋmd wʋsg gẽegda wakat ning b sẽn na n wa rɩk retrɛt n tɩlg ne nug-tʋʋmdã sẽn wat ne zɩɩb la yɩɩr ninsã. Naoor wʋsgo, retrɛtã wata ne yam-ka-m-meng la kʋʋlem zu-loeese. Ned sã n ka leb n tʋmd tʋʋmd sẽn tar yõodo, a wat n baas n maanda yɩɩr ne bũmb nins sẽn pak yẽ mengã bala. Berzill kɩbay sebr a yembr yeelame tɩ goosneem tʋm-tʋmdb nins sẽn dɩk retrɛtã paama zu-loees toɛy-toɛya, tɩ rẽ tõe n yɩ ‘sũ-pa-noaang ne yɛlã, mo-toogo, yam sẽn ka gãe bãane, tags tɩ b ka le tar yõodo, tɩ b pa gomd b sẽn tar yam-ka-m-mengã bɩ b tagsdẽ tɩ b vɩɩmã ka le tar võorã ye.’

² Sẽn yaa lebend ne rẽ, kiris-neb wʋsg yãame tɩ retrɛtã yaa kʋɩleng sẽn pak tɩ b tõe n maan tẽeb tʋʋm n paase. Saam-biig a ye sẽn sɩng so-pakrã tʋʋmd semen a yiib bal a sẽn paam yʋʋm 65 poor yeela woto: “Mam vɩɩmã pʋgẽ, mam zɩ n paam bark wʋsg n ta bark ning m sẽn paam yʋʋm piigã sẽn loogã m sẽn yɩ so-pakdã sasa ye.” Ned ne a pag gʋlsa woto: “Tõnd kʋʋlmã wakat yʋʋm nins sẽn yɩ noog n yɩɩdã sɩnga tõnd sẽn dɩk so-pakrã tʋʋmdã tɛka.” N-ye, neb wʋsg getame tɩ retrɛtã wakat yaa sasa sẽn yaa sõma n yɩɩd sẽn na yɩl n tʋm n paas koe-moonegã pʋgẽ, n paam a Zeova barka.

³ Ket-y n tʋmdẽ la y womd biis wʋsgo: Neb wʋsg sẽn dɩk retrɛt rũndã-rũndã bɩɩme n ka yã naar ning neb wʋsg rũndã-rũndã sẽn be a pʋgẽ wã ye, sẽn paase b rag n zãmsame n tʋmd sõma hal b yãadem wakate. Baa b sẽn ka leb n tar bi-bɩɩlmã pãngã, b ket n yaa tʋm-tʋmdb sẽn tʋmd tɩ womd biisi. Sosiete wã tʋʋmd will a yembr mooneg zĩigẽ, so-pakdb 22 koabg zug tara yʋʋm 60 bɩ yɩɩd woto, sẽn dat n yeel tɩ yaa saam-biis la saam-bi-pogs 20 000. Sẽn kʋʋl-bã sõngda ne moonegã tʋʋmd wʋsgo. B minimã n paas b zʋg-sõma wã nafda tigims nins pʋsẽ b sẽn be wã wʋsgo.—Zak 3:17, 18.

⁴ Nin-kãensã sẽn moond koe-noogã wʋsga kɩtdame tɩ b laafɩ wã paasdẽ la kɩt tɩ b vɩɩmã me yaa noog n yɩɩda. Saam-bi-poak sẽn tar yʋʋm 84 sẽn sɩng so-pakrã tʋʋmd a sẽn dɩk retrɛtã tɛk yeelame: “M sẽn zãmsd Biiblã ne sẽn dat-b sɩdã sõnga maam tɩ m yamã ket n vẽenẽ. M sẽn ka tar mobillã yĩng kɩtame tɩ m kẽnd wʋsgo. Rẽ kõt-m-la laafɩ.” Ned ne a pag sẽn kʋʋl sẽn yaa so-pakdb yeelame: “Koe-moonegã kɩtdame tɩ d yamã ra menem la tɩ d ket n tar yĩns keelem. Wakat fãa tõnd bee ne taaba. Tõnd laada wʋsgo, d sũur nooma ne vɩɩmã.”

⁵ Zĩig ning raab sẽn beẽ wã moonego: Kiris-neb kẽer sẽn dɩk retrɛt n tar ligd bilf yikame n tɩ zĩnd zĩig ning Rĩungã koe-moondb raab sẽn yaẽ kãseng n yɩɩdã. Neb a taab me leb n paasa b moonegã, n moond buud-gom-zẽng neba. Wala tʋm-tʋmd a Polle, koe-moondb kãensã sẽn tar yẽesmã ‘maanda bũmb fãa koe-nooga yĩnga sẽn na yɩl n tõog n’ pʋɩ-a ne neb a taaba.—1 Kor. 9:23.

⁶ Ned a ye ne a pag n wub b kom-dibli a yiib n yaool n sɩng so-pakrã tʋʋmde. B sẽn yɩ so-pakdb yʋʋm a wãn poore, b sɩnga sinoa rãmbã buud-gomd zãmsgo. Masã b kolga yʋʋm 80, la sẽn pa kaoos pʋgẽ b paama sũ-noogo, sinoa buud-gomd sull ning b sẽn da tʋmd ne wã sẽn lebg tigingã yĩnga. Ad nin-kãensã sɩd tʋmame tɩ naf neb a taaba!

⁷ Retrɛt ka be koe-moonegã tʋʋmd pʋgẽ ye: Yaa sɩd tɩ neb wʋsg wat n baas n dɩka retrɛt b tʋʋm zĩigẽ, la kiris-ned ka rɩkd retrɛt Wẽnnaam tʋʋmdã pʋgẽ ye. Tõnd fãa tog n kell n yɩɩ wẽn-sakdb “hal tɩ saabã ta.” (Mat. 24:13, 14) Yaa vẽeneg tɩ kʋʋlmã yĩnga, neb kẽer ka leb n tõe n maan a Zeova tʋʋmdã wʋsg wala b sẽn da maand pĩndã ye. La ad yaa bũmb sẽn noogd sũuri, tɩ d neẽ tɩ b tʋmda ne b sũur fãa koe-moonegã pʋgẽ! Wẽnnaam Gomdã kõt-b-la bas-m-yam t’a Zeova ka na n yĩm b tʋʋmdã la nonglem ning b sẽn tar yẽ yʋʋrã yĩngã ye.—Luk 21:1-4; Heb. 6:10.

⁸ Yãmb sã n kolgda retrɛte, bõe yĩng tɩ y ka na n pʋʋs la y tags n ges y sẽn na n dɩk weer ning retrɛtã sẽn na n kõ-yã n tʋm to-to? Ne Wẽnnaam sõngre, y na n yãame tɩ retrɛtã paka kʋɩleng n kõ-y tɩ y tõe n maan tʋʋmd n paase, tɩ rẽ na n wa ne pẽgr n kõ a Zeova la kõ-y bark wʋsgo.—Yɩɩl 148:12, 13.